އެމްޑީޕީއަށް ސަރުކާރުން ލިބޭ ފައިސާ ބަހާނެ ގޮތްތައް ކަނޑައަޅައިފި
21 ޖުލައި 2022 | ބުރާސްފަތި 06:36ސަރުކާރުން ދޭ ފައިސާގެ 60 އިންސައްތަ ދާއިރާތަކަށް ބަހަން ފައްޔާޒު ވައުދުވެވަޑައިގެންނެވި
އެމްޑީޕީ ޤައުމީ މަޖިލިސް ބައްދަލުވުން
މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އަށް ސަރުކާރުން ދޭ ފައިސާ ބަހާނެ ގޮތުގެ އުސޫލެއް ކަނޑައަޅައި އެ އުސޫލު ފާސްކޮށްފިއެވެ.
މި އުސޫލު ފާސްކޮށްފައިވަނީ ބުދަ ދުވަހުގެ ރޭ ކުރިއަށްދިޔަ އެމްޑީޕީގެ ޤައުމީ މަޖިލީހުގެ 4 ވަނަ ދައުރުގެ 5 ވަނަ ބައްދަލުވުމުގައެވެ. މި ބައްދަލުވުމުގައި 71 މެމްބަރުން ބައިވެރިވިއިރު އުސޫލު ފާސްވެފައިވަނީ ބައިވެރިވި ހުރިހާ މެމްބަރުންގެ އިއްތިފާގުންނެވެ.
އެމްޑީޕީގެ މަތިއުތުރު ޕްރޮވިންސްގެ ރައީސް އިބްރާހިމް ވަހީދު (އިިބުރޭ) "ރާއްޖެ އެމްވީ" އަށް ވިދާޅުވީ އެ އުސޫލުގައި ބުނެފައިވާ ގޮތުގައި ޕާޓީއަށް ސަރުކާރުން ދޭ ފައިސާގެ 60 އިންސައްތަ ދާއިރާތަކަށް ބަހަން ނިންމާފައިވާ ކަމަށެވެ. އެގޮތުން، މި 60 އިންސައްތައިގެ ތެރެއިން 20 އިންސައްތަ ފައިސާ ބަހާނީ ހުރިހާ ރަށަކަށް ހަމަހަމައަށް ކަމަށާއި 25 އިންސައްތަ ފައިސާ ވަކި ދާއިރާތަކަށް ބަހަން ނިންމާފައިވާ ކަމަށް އޭނާ ވިދާޅުވިއެވެ.
މީގެ އިތުރުން 45 އިންސައްތަ ފައިސާ ދާއިރާތަކަށް ބަހަން ނިންމާފައިވަނީ އެ ދާއިރާއެއްގައި ތިބޭ މެމްބަރުންގެ ނިސްބަތުން ކަމަށާއި ބާކީ 10 އިންސައްތަ ފައިސާ، ހުރިހާ ދާއިރާތަކާ ގުޅުންހުރި ކަންކަމުގައި ބޭނުން ކުރުމަށް އެ އުސޫލުގައި ނިންމާފައިވާ ކަމަށް އިބްރާހިމް ވަހީދު ވިދާޅުވިއެވެ.
އެމްޑީޕީއަށް ސަރުކާރުން ދޭ ފައިސާގެ 60 އިންސައްތަ ދާއިރާތަކަށް ބެހުމަކީ އެ ޕާޓީގެ މިހާރުގެ ޗެއަރޕާސަން އަދި އިކޮނޮމިކް މިނިސްޓަރު ފައްޔާޒް އިސްމާއިލް އެ މަގާމަށް ވާދަކުރެއްވިއިރު ކެމްޕޭނުގައި ވެވަޑައިގެންނެވި ވައުދެކެވެ.
ބުދަ ދުވަހުގެ ރޭ ބޭއްވި ޖަލްސާގައި ކުރިއަށް އޮތް ކޮންގްރެސްއަށް ތައްޔާރުވުމަށް ކޮމިޓީތަކެއް ވެސް ވަނީ އެކުލަވާލައިފައެވެ.
