ހިޔާގެ 4 ޓަވަރެެއްގައި 700 އަށްވުރެ ގިނަ ކެމެރާ ހަރުކޮށްފި

ހުޅުމާލެ ދެވަނަ ފިޔަވަހީގައި ތަރައްޤީކޮށްފައިވާ ހިޔާ ޓަވަރުތަކުގެ ތެރެއިން 4 ޓަވަރެއްގައި މިހާތަނަށް 700 އަށްވުރެ ގިނަ ސީސީޓީވީ ކެމެރާ ހަރުކޮށްފައިވާ ކަމަށް ހައުސިން ޑެވެލޮޕްމަންޓް ކޯޕަރޭޝަން (އެޗްޑީސީ) އިން ބުނެފިއެވެ.

އެ ކުންފުނިން ބުނީ މިހާތަނަށް ކެމެރާ ހަރުކޮށްފައިވާ ހިޔާ ޓަވަރު 13، 14، 15 އަދި 16 ގައި ކަމަށެވެ. އެގޮތުން ކޮންމެ ޓަވަރެއްގައި 192 ކެމެރާ ހިމެނޭހެން ޖުމްލަ 768 ކެމެރާ މިހާތަނަށް އެ ޓަވަރުތަކުގައި ހަރުކުރެވިފައިވާ ކަމަށް އެ ކުންފުނިން ބުންޏެވެ.

Advertisement

އެޗްޑީސީން މައުލޫމާތު ދޭ ގޮތުގައި ކުރިއަށް އޮތް ދުވަސްތަކުގައި ބާކީ ހުރި ޓަވަރުތަކުގައި ވެސް ކެމެރާ ހަރުކުރާނެއެވެ. މިއީ އެ ޓަވަރުތަކުގައި ދިރިއުޅޭ ރައްޔިތުންގެ ރައްކާތެރިކަން ކަށަވަރުކުރުމުގެ ގޮތުން ކުރަމުން އަންނަ މަސައްކަތުގެ ތެރޭގައި ހިމެނޭ ކަމެކެވެ.

ހިޔާ މަޝްރޫއުގެ ދަށުން ހުޅުމާލެ ދެވަނަ ފިޔަވަހީގައި 16 ޓަވަރު އިމާރާތް ކޮށްފައިވާއިރު ކޮންމެ ޓަވަރެއްގައި 192 ކެެމެރާ ހަރު ކުރާނެއެވެ. އެއީ 3،072 ކެމެރާއެވެ.

އެޗްޑީސީން އަންނަނީ ހިޔާ ޓަވަރުތަކުގެ ސެކިއުރިޓީ އިތުރަށް ވަރުގަދަ ކުރުމަށް މަސައްކަތް ކުރަމުންނެވެ. އެ ސަރަހައްދަކީ މުޅިން އަލަށް މީހުން ދިރިއުޅެން ފެށި ސަރަހައްދަކަށްވުމާއެކު އެތަނުގައި ދިރިއުޅޭ ގިނަ ބައެއްގެ އެންމެ ބޮޑު ކަންބޮޑުވުމަކަށް ވެފައި އޮތީ އެތަނުގެ ސެކިއުރިޓީއެވެ. އެގޮތުން، ކޮންމެ މީހަކަށް ވެސް ޓަވަރުތަކަށް ވަދެ ނުކުމެ ހެދޭއިރު އެތަނުގައި ސެކއިުރިޓީގެ ކަންކަން ވަރަށް ރަނގަޅަށް ބެލެންވާނެ ކަމަށް ގިނަ ބަޔަކު ގަބޫލުކުރެއެވެ.

ދެވަނަ ފިޔަވަހީގެ ސެކިއުރިޓީ ކަންކަން ހަރުދަނާ ކުރުމަށް އެ ސަރަހައްދުގައި މިހާރު ވަނީ ޕޮލިސް ޕޯސްޓު ވެސް ބަހައްޓައިފައެވެ.

އެޗްޑީސީން އަންނަނީ ހިޔާގައި ސެކިއުރިޓީ ކަންކަމުގެ އިތުރުން އެތަނުގެ މެއިންޓަނެންސްގެ ކަންކަން ވެސް ބަހަލައްޓަމުންނެވެ. އެގޮތުން، ވާރޭ ވެހޭ ވަގުތުތަކުގައި ބައެއް ޓަވަރުތަކުގެ އެޕާޓްމަންޓުތަކުގެ ކުޑަ ދޮރުން ފެން އެއްލާ މައްސަލަ ހައްލު ކުރުމަށް މިހާރު މަސައްކަތްތައް ކުރަމުން އަންނަ ކަމަށް އެޗްޑީސީން މައުލޫމާތުދެއެވެ.

ހިޔާ ޓަވަރުތަކުގައި އާއްމުން ދިރިއުޅެން ފެށީ 2022 ވަނަ އަހަރުގެ ސެޕްޓެމްބަރު މަހުއެވެ. މިހާތަނަށް އެ ޓަވަރުތަކަށް 10،000 އަށްވުރެ ގިނަ މީހުން ވަނީ ބަދަލުވެފައެވެ.