ޝިންޒޯ އަބޭއަށް ދިން ހަމަލާ – އުޅުނީ އަވަހާރަކޮށްލަން، ހާލުކޮޅު ސީރިއަސް

ޖަޕާންގެ ކުރީގެ ބޮޑުވަޒީރު ޝިންޒޯ އަބޭއަށް ހަމަލާ ދިނީ އެމަނިކުފާނު އަވަހާރަކޮށްލުމަށް ކަމަށް ޖަޕާންގެ ފުލުހުން ބުނެފިއެވެ.

ޖަޕާންގައި އެންމެ ގިނަ ދުވަސްވަންދެން ބޮޑުވަޒީރުކަން ކުރައްވާފައިވާ ޝިންޒޯ އަބޭއަށް ބަޑިން ހަމަލާދީފައިވަނި ހުކުރު ދުވަހުގެ ހެނދުނުގެ ވަގުތެއްގައެވެ. ހަމަލާ އަމާޒުވިއިރު އަބޭ ހުންނެވީ މަޖިލިސް އިންތިހާބުގެ ކެމްޕޭން ކުރެއްވުމުގައެވެ. އަބޭ ކެމްޕޭއިން ކުރައްވަމުން ގެންދެވީ އާދީއްތަ ދުވަހު އޮންނަ ޖަޕާންގެ މަތި ގޭގެ އިންތިހާބަށެވެ.

ޖަޕާންގެ ދައުލަތުގެ މީޑިއާ އެންއެޗްކޭއިން ރިޕޯޓްކޮށްފައިވާ ގޮތުން، އަބޭ އަށް ހަމަލާދިނީ ފިރިހެނެކެވެ. އަދި އޭނާ ހަމަލާދިނުމަށް ބޭނުންކުރި ބަޑިއަކީ އަމިއްލައަށް ހަދާފައިވާ އެއްޗެކެވެ.

އަބޭއަށް ދިން ހަމަލާ ޖަޕާންގެ ބޮޑުވަޒީރު ފުމިއޯ ކިށީޑާ ވަނީ ހަރުކަށި އިބާރާތުން ކުށްވެރިކުރައްވާފައެވެ. އަދި ހާދިސާއާއި ގުޅިގެން ހިތާމަފާޅުކުރައްވާފައިވެއެވެ.

ހޮސްޕޮޓަލުގެ އޮފިޝަލަކާއި ހަވާލާދީ ރޮއިޓަރސްގައި ބުނެފައިވަނި އަބޭ ހޮސްޕިޓަލަށް ގެނެވުނު އިރު ވެސް ހިތް ހުއްޓިފައިވާ ކަމަށެވެ.

މި ހަމަލާއާއި ގުޅިގެން 41 އަހަރުގެ ފިރިހެނަކު ވަނީ ހައްޔަރުކޮށްފައެވެ. ޓެޓްސުޔާ ޔަމަގާމި ނަމަކަށް ކިޔާ މި މީހާ ފުލުހުން ކައިރި ބުނެފައިވަނީ އޭނާ އަބޭ އާއި ދޭތެރޭ ހިތްހަމަ ނުޖެހޭ ކަމަށާއި، ބޭނުންވީ އަބޭ މަރާލަން ކަމަށެވެ.

ޖަޕާންގެ ދައުލަތުގެ މީޑިއާއިން ބުނެފައިވަނީ އަބޭއަށް ހަމަލާދިން އިރު، އެމަނިކުފާނު ހުންނެވީ ރޭލު ސްޓޭޝަނެއްގެ ބޭރުގައި ސްޕީޗެއް ދެއްވާށެވެ. އަދި ދެ ފަހަރަށް ބަޑީގެ އަޑު އިވުނު ކަމަށާއި، އޭގެ އިރުކޮޅެއް ފަހުން އަޅި ކުލައިގެ ޓީޝާޓެއް ލައިގެން ހުރި މީހަކު ހިފެހެއްޓުނު ކަމަށެވެ. ރިކޯޑްކުރެވުނު އިތުރު ވީޑިއޯއަކުން ފެންނަ ގޮތުން އަބޭ ހުންނެވިތާ ފަހަތުން ބޯ ދުންގަނޑެއް ފެނިގެންދިޔައެވެ.

އާންމުވެފައިވާ ބައެއް ފޮޓޯތަކުން ފެންނަ ގޮތުން ހަމަލާގެ ސަބަބުން ވެއްޓިވަޑައިގެން އަބޭ އޮންނެވީ އުއްޑުން ގާޑް ރެއިލް ކައިރީގައެވެ. އަދި އެމަނިކުފާނުގެ ހެދުންކޮޅުގައި ލޭ ހުރި މަންޒަރު ފެނެއެވެ. އަދި އަބޭ ވަށައިގެން މީހުން އެއްވެ އެހީތެރިކަން ފޯރުކޮށްދެމުން ގެންދިޔަ އިރު، އެތަނުން އެކަކު ފަސްޓްއެއިޑް ދެމުންދިޔަތަން ފެނިފައިވެއެވެ.