ކަސްޓަމްސް އޮފިޝަލުންގެ ގާބިލިއްޔަތުކަން އިތުރުކުރުމަށް އިންޑިއާއަށް
ކަސްޓަމްސްގެ 30 އޮފިސަރުން އިންޑިއާއިން ތަމްރީން ހޯދާނެ
ކަސްޓަމްސް
މޯލްޑިވްސް ކަސްޓަމްސް ސަރވިސް އޮފިޝަލުންގެ ގާބިލިއްޔަތުކަން އިތުރުކުރުމަށް އިންޑިއާއަށް ފޮނުވާ އޮފިޝަލުންނާ ލިޔުން ހަވާލުކޮށްފިއެވެ.
މި އޮފިޝަލުންނާ ލިޔުން ހަވާލުކޮށްފައިވަނީ ބުރާސްފަތި ދުވަހު ބޭއްވި ޚާއްސަ ރަސްމިއްޔާތެއްގައެވެ. މި ރަސްމިއްޔާތުގައި އިންޑިއަން ހައިކޮމިޝަނަރ މުނު މަހާވަރުއާއި މޯލްޑިވްސް ކަސްޓަމްސް ސަރވިސްގެ ކޮމިޝަނަރ ޖެނެރަލް އަބްދުﷲ ޝަރީފް ބައިވެރިވެވަޑައިގެންނެވިއެވެ.
މި ތަމްރީނުގައި ބައިވެރިވާން ރާއްޖޭން އިންޑިޔާގެ ފަރީދްއާބާދުގައި ހުންނަ ނެޝަނަލް އެކެޑެމީ އޮފް ކަސްޓަމްސް، އިންޑައިރެކްޓް ޓެކްސް އަދި ނާރކޮޓިކްސް (އެން.އޭ.ސީ.އައި.އެން)އަށް ކަސްޓަމްސްގެ 30 އޮފިސަރުން ދާނެއެވެ. މި ތަމްރީންތައް ކުރިއަށްދާނީ ޖުލައި 11ން 15އަށެވެ.
މި ދަތުރުގައި ކަސްޓަމްސް އޮފިސަރުން، ޕޯސްޓް ކަސްޓަމްސް އޯޑިޓް ހިމެނިގެންވާ، ކާގޯ ޕްރޮފައިލިންގް އެންޑް ރިސްކް މެނޭޖްމަންޓް މައުލޫއަށް ބިނާކޮށް ހިންގޭ ތަމްރީނެއްގައި ބައިވެރިވާނެއެވެ. މި ތަމްރީން ޕްރޮގްރާމްގައި; އިންޓަރެކްޓިވް ސެޝަންތަކާއި، ވަޔާއި ކަނޑުގެ ކާގޯގެ ރިސްކް ބޭސްޑް ސިލެކްޓިވިޓީ، އަދި ރިސްކް ބޭސްްޑް ކޮމްޕްލައަންސް މެނޭޖްމެންޓްފަދަ، ކަމާގުޅޭ މައުލޫތަކުގެ ކޭސް ސްޓަޑީއާއި،ވޯރލްޑް ޓްރޭޑް އޯގަނައިޒޭޝަން ޓްރޭޑް ފެސިލިޓޭޝަން އެގްރިމެންޓާ ގުޅުންހުރި، ވޯރލްޑް ކަސްޓަމްސް އޯގަނައިޒޭޝަން އިންސްޓްރުމެންޓް ފަދަ ބައިތައް ހިމެނެއެވެ.
ހައިކޮމިޝަނަރ މުނު މަހާވަރުވަނީ 6 ޖޫންއިން 1 ޖުލައިއަށް މުމްބާއީގެ އެން.އޭ.ސީ.އައި.އެންގެ ފަރާތުން އިންތިޒާމްކޮށް ބޭއްވިފައިވާ ތަމްރީން ޕްރޮގްރާމްތަކުގެ ހުރިހާ އިވެންޓްތަކުގައި ކަސްޓަމްސް އޮފިސަރުންގެ ބައިވެރިވުން ފާހަގަކުރައްވާފައެވެ. އަދި ކަސްޓަމްސް އޮފިސަރުންނަށް ބޭނުންވާ މިފަދަ އިތުރު ތަމްރީންތައް މިއަހަރުތެރޭ ބޭއްވުމަށް އިންތިޒާމްކުރެވެމުން ދާކަމަށް ވިދާޅުވިއެވެ.
ކަސްޓަމްސް ކޯޕަރޭޝަން އެމްއޯޔޫގައި ސޮއިކޮށްފައިވަނީ ޖޫން 2019ގައި އިންޑިއާގެ ބޮޑުވަޒީރު ނަރެންދްރަ މޯދީ ރާއްޖެއަށް ކުރެއްވި ރަސްމީ ދަތުރުފުޅުގައެވެ.
ކަސްޓަމްސުން ބުނީ އިންޑިޔާއާ ދިވެހިރާއްޖޭގެ މެދުގައި ކަސްޓަމްސް ދާއިރާގެ ގުޅުން ވަނީ ފާއިތުވި އަހަރުތަކުގައި ވަރުގަދަވެފައިކަމަށެވެ. އެގޮތުން މި ބެޗް ހިމެނޭހެން 130 ކަސްޓަމްސް އޮފިޝަލުންވަނީ އިންޑިޔާއަށް ފޮނުވައި ކަސްޓަމްގެ އެކި ދާއިރާތަކުން ތަމްރީން ދެވިފައިކަމަށާއި، 90 ކަސްޓަމްސް އޮފިޝަލުން ވަނީ އޮންލައިން ޕްރޮގްރާމްތައް މެދުވެރިކޮށް ތަމްރީންކޮށްފައިކަމަށް އެ އިދާރާއިން ބުނެއެވެ.
ސެންޓްރަލް ބޯޑް އޮފް އިންޑައިރެކްޓް ޓެކްސް އެންޑް ކަސްޓަމްސް (ސީ.ބީ.އައި.ސީ)އާއި އެމް.ސީ.އެސްއާ ދެމެދު ޖުލައި 2021ގައި އަލަށް ސޮއިކުރެވުނު ޕްރީ-އެރައިވަލް އެކްސްޗޭންޖް އޮފް ކާގޯ ޑޭޓާއާބެހޭ އެމް.އޯ.ޔޫގެ ދަށުން، ޕްރީ-އެރައިވަލް ކަސްޓަމްސް ޑޭޓާ އެކްސްޗޭންޖްގެ އައު މަޝްރޫއެއް ވަނީ އިފްތިތާހުކޮށްފައެވެ. މި މަޝްރޫއުގައި ދެ ކަސްޓަމްސްގެ ދެމެދުގައި ޓެކްނޮލޮޖީގެ ޒަރީއާއަށް އިސްކަންދީ ކަސްޓަމްސް ޑޭޓާ ވަގުތުން ބަދަލުކުރުމަށް މަގުފަހިވެގެންދާނެކަމަށް ކަސްޓަމްސުން ބުނެއެވެ.
މީގެ އިތުރުން ދެ ގައުމުގެ ދެމެދުގައި ހިނގާ ވިޔަފާރި، ރިސްކް މެނޭޖްމަންޓް ބޭނުންކޮށް ފުޅާކުރުމަށް މަގުފަހިވުމާއެކު، އިންޓަރނޭޝަނަލް ބެސްޓް ޕްރެކްޓިސްގައި ކޮމްޕްލަޔަންސް މޮނިޓަރކުރުމަށް އެހީތެރިވާނެކަމަށް ބެލެވޭކަމަށްވެސް ކަސްޓަމްސުން ބުންޏެވެ.
