މޫސުމީ ބަދަލުތަކަކީ ގައުމުތައް ދަރަނިވެރި ކޮށްލާ ކަމެއް: ރައީސް ނަޝީދު

މޫސުމީ ބަދަލުތަކަކީ ގައުމުތަކުގެ މާލީ ހާލަތު ދަށްކޮށްލާ، ގައުމުތައް ދަރަނިވެރިކޮށްލާ ކަމެއް ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

ރައީސް ނަޝީދު މިފަދައިން ވިދާޅުވީ 21 ވަނަ އިންޓަރނޭޝަނަލް އޯގަނައިޒޭޝަން އޮފް ސުޕްރީމް އޮޑިޓް އިންސްޓިޓިއުޝަންގެ ވަރކިންގ ގްރޫޕް އޮން އެންވަޔަރަންމަންޓް އޮޑިޓިންގ އެސެމްބްލީގައި ބައިވެރިވެވަޑައިގެން ވާހަކަފުޅުދައްކަވަމުންނެވެ. ރައީސް ނަޝީދުގެ ވާހަކަފުޅުގައި ވަނީ ގައުމުތަކުން ނަގާފައިވާ ލޯނުތައް ދެއްކުމަށް ގައުމަކަށްފަހު ގައުމެއް ފެއިލް ވަމުންދާނެ ކަމަށް ވިދާޅުވެފައެވެ.

މޫސުމީ ބަދަލުތަކުގެ ސަބަބުން ރާއްޖެއަށް ކުރަމުންދާ އަސަރަށް އަލިއަޅުވާލައްވައި ރައީސް ނަޝީދު ވިދާޅުވީ ރާއްޖޭގެ މޫސުން ގޯސްވުމުގެ ސަބަބުން ފާއިތުވި ދެ ދުވަހުގެ ތެރޭގައި ކަނޑުގެ ލޮނުގަނޑު އިންތިހާއަށް އުފުލި، ރާއްޖޭގެ ގިނަ ރަށްރަށަކަށް އުދަ އަރާފައިވާ ކަމަށެވެ. އުދައިގެ ސަބަބުން ރަށްރަށަށް ލިބުނު ގެއްލުން 30 މިލިއަން ޑޮލަރަށް އަރާނެ ކަމަށް ވިދާޅުވިއެވެ.

މޫސުމީ ބަދަލުތަކުގެ އަސަރު އެންމެ ބޮޑަށް ކުރާ ގިނަ ގައުމުތަކަކީ ބޮޑެތި ދަރަނި ނަގާފައިވާ ގައުމުތައް ކަމުގައި ރައީސް ނަޝީދު ވިދާޅުވިއެވެ. ރާއްޖެއަށް ބަލާލާއިރު، ދައުލަތަށް ލިބޭ އާމްދަނީގެ 20 އިންސައްތައަށްވުރެ ބޮޑު ބައި ދަރަނި އަނބުރާ ދެއްކުމަށް ހޭދަވާއިރު، އާމްދަނީގެ 30 އިންސައްތައަށްވުރެ ބޮޑު ބައި، މޫސުމީ ބަދަލުތަކަށް ހޭނުމަށް ކުރާ މަސައްކަތަށް ހޭދަކުރާ ކަމަށް އެމަނިކުފާނު ވިދާޅުވިއެވެ.

ރައީސް ނަޝީދު ވިދާޅުވީ މީގެ ކުރިން ނަގާފައިވާ ލޯނުތަކަކީ މުޅިން ނުބައި ސައިންސަކަށް ބިނާކޮށް ނަގާފައިވާ ލޯނުތަކެއް ކަމަށެވެ. އެ ލޯނުތައް ނެގިއިރު އިންޓަރ ގަވަރންމެންޓަލް ޕެނަލް އޮން ކްލައިމެޓް ޗޭން (އައިޕީސީސީ) އަދި ވޯލްޑް އޯޑަރއިން ބުނަމުންދިޔައީ، މޫސުމަށް އަންނަ ބަދަލުތަކަކީ ކާބަން އެމިޝަންއާ ގުޅިފައި އޮތް ކަމެއް ނޫން ކަމަށެވެ. އެހެންނަމަވެސް އެންމެފަހުން 2021 ވަނަ އަހަހަރު އައިޕީސީސީން މިކަމަށް އެއްބަސްވެފައިވާކަމަށް ރައީސް ނަޝީދު ވިދާޅުވިއެވެ.

ރައީސް ނަޝީދު ވިދާޅުވީ މި ލޯނުތަކަކީ ނުބައި ސައިންސެއްގެ މައްޗަށް ބަރޯސާވެ ނަގާފައިވާ ލޯނުތަކެއް ކަމުން، މިހާރު މި ދިމާވާ ކަންކަމުން އަރައިގަތުމަށް މަސައްކަތްކުރުމަށް ވަނީ ދަތިވެފައި ކަމަށެވެ. އަދިވެސް އެ ލޯނުތައް އަނބުރާ ދައްކަން ޖެހޭ ކަމަށް ނަޝީދު ވިދާޅުވިއެވެ.

ލޯނުތައް ނަގައިގެން ތަރައްގީކޮށްފައިވާ މަގުތައް ހަލާކުވެ، ބްރިޖް ވެއްޓި، ސްކޫލްގައި ފެން ބޮޑުވެ، މިއަށްވުރެވެސް ބޮޑެތި ގެއްލުންތައް ލިބިފައިވާކަމަށް ނަޝީދު ވިދާޅުވިއެވެ. ލޯނު ނަގައިގެން ކުރި މަސައްކަތް ނެތިދިއުމުން އެ ލޯނު އަނބުރާ ދެއްކޭނެ ގޮތެއް ކިޔައިދެއްވުމަށް ރައީސް ނަޝީދު ވަނީ ސަމިޓުގެ ބައިވެރިންގެ ކިބައިން އެދިވަޑައިގެންފައެވެ.