ބިދޭސީން ގެނައުމަށް ބޭނުންކުރާ ޕޯޓަލް ނަކަލުކޮށްގެން ޕޯޓަލްތައް ހަދަނީ، ސަމާލުވޭ!
ނަކަލުކޮށްފައިވާ 6 ޕޯޓަލަކާއި ވެބްސައިޓް މިނިސްޓްރީއަށް ވަނީ ފާހަގަކުރެވިފައި
ބިދޭސީންތަކެއް
ބިދޭސީން ގެނައުމުގެ ކަންކަން ކުރުމަށް އިކޮނޮމިކް މިނިސްޓްރީން ފަރުމާކޮށްފައިވާ ޕޯޓަލް، އެކްސްޕެޓް އޮންލައިން ނަކަލުކޮށްގެން ޕޯޓަލްތައް ހަދަމުންދާކަން ސަމާލުކަމަށް އައިސްފައިވާ ކަމަށް އެ މިނިސްޓްރީން ބުނެފިއެވެ.
އިކޮނޮމިކް މިނިސްޓްރީން އާދީއްތަ ދުވަހުގެރޭ ނެރުނު ބަޔާނެއްގައި ވަނީ، މިފަދަ ޕޯޓަލްތައް ގިނަފަހަރަށް ހަދަނީ އޮޅުވާލައިގެން ޔޫޒަރ އެކައުންޓުތަކާއި އެހެނިހެން ޒާތީ މައުލޫމާތު ހޯދައި އޭގެ ބޭނުން ނަހަމަގޮތުގައި ހިފުމަށް ފަރުމާކޮށްފައި ހުންނަ ޕޯޓަލްތަކާއި ވެބްސައިޓްތައްކަމަށެވެ. އެހެންވެ އެކަމަށް ސަމާލުކަން ދިނުމަށް ވަނީ އިލްތިމާސްކޮށްފައެވެ.
ނަކަލު ކޮށްގެން ހަދާފައިވާ ވެބްސައިޓުތަކެއް އިކޮނޮމިކް މިނިސްޓްރީއަށް ވަނީ ފާހަގަކުރެވިފައެވެ. އޭގެ ތެރޭގައި 6 ޕޯޓަލާއި ވެބްސައިޓް ހިމެނެއެވެ.
ނަކަލު ކޮށްފައިވާ ޕޯޓަލްތައް
އިކޮނޮމިކް މިނިސްޓްރީން ވަނީ ބިދޭސީން ގެނައުމުގެ ކަންކަން ކުރުމަށް މިނިސްޓްރީގެ ޕޯޓަލް ބޭނުންކުރާ ފަރާތްތަކުން އެކްސްޕެޓް އޮންލައިން ޕޯޓަލް އެއީ ސައްހަ ޕޯޓަލްތޯ ޔަގީންކުރަން އިލްތިމާސްކޮށްފައެވެ. އެކްސްޕެޓް އޮންލައިންގެ އަސްލު ޕޯޓަލަކީhttps://xpat.egov.mvއެވެ.
މިނިސްޓްރީގެ ޕޯޓަލް ނޫން އެހެން އެއްވެސް ޕޯޓަލަކަށް މައުލޫމާތު ނުދިނުމަށާއި ނަކަލުކޮށްފައިވާ ޕޯޓަލަކަށް ލޮގިންކުރެވިފައިވާކަމަށް ޝައްކުކުރެވޭނަމަ ޕާސްވޯޑް ރިސެޓްކުރުމަށްވެސް ވަނީ އިލްތިމާސްކޮށްފައެވެ.
