އަންނަ އަހަރުގެ ރިޔާސީ އިންތިޚާބު ރައީސަށް އެމްޑީޕީއަށް ކާމިޔާބު ކޮށްދެވޭނެ ކަމަށް ލަފާނުކުރެވޭ: ހަސަން ލަތީފް
3 ޖުލައި 2022 | އާދީއްތަ 02:36ރައީސާއެކު އަންނަ އަހަރުގެ ރިޔާސީ އިންތިޚާބުގައި މަސައްކަތް ކުރަން ދަތި
ޙަސަން ލަތީފް ރައީސް ސާލިޙާއި ސަލާމްކުރައްވަނީ
2023 ގެ ރިޔާސީ އިންތިޚާބު އެމްޑީޕީއަށް، ރައީސުލްޖުމްހޫރިއްޔާ އިބްރާހިމް މުހައްމަދު ސާލިޙަށް ކާމިޔާބު ކޮށްދެއްވޭނެކަމަށް ލަފާ ނުކުރެއްވޭކަމަށް އެމްޑީޕީގެ ކުރީގެ ޗެއަރޕާސަން އަދި ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެމްބަރު ޙަސަން ލަތީފް ވިދާޅުވެއްޖެއެވެ.
ޙަސަން ލަތީފް ކުރެއްވި ޓުވީޓެއްގައި ވަނީ ރައީސް ސާލިޙް މީގެ ކުރިން ދެއްކެވި ވާހަކަފުޅުތަކެއްގެ ވީޑިއޯ ހިއްސާކުރައްވާފައެވެ. އަދި ވިދާޅުވީ ރައީސްގެ ސިޔާސީ ހަޔާތްޕުޅުން އެ މަނިކުފާނަށް އޭނާ ދޫކޮށްނުލެއްވުނަސް، އޭނާއަށް ރައީސާއެކު އަންނަ އަހަރުގެ ރިޔާސީ އިންތިޚާބުގައި މަސައްކަތް ކުރަން ދަތި ކަމަށެވެ.
ހަސަން ލަތީފް މިހެން ވިދާޅުވެފައިވާއިރު ރިޔާސީ ދެވަނަ ދައުރަކަށް ރައީސް ސާލިޙު ކުރިމަތިލެއްވުން އެއީ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ)އަށް ރަނގަޅު ގޮތެއް ނޫންކަމަށް ރައްޔިތުން މަޖިލީހުގެ ރައީސް މުހައްމަދު ނަޝީދު ވެސް ވަނީ ވިދާޅުވެފައެވެ.
"އާސްކް ސްޕީކަރ" ޕްރޮގްރާމްގެ 5 ވަނަ އެޕިސޯޑްގައި ރައީސް ނަޝީދު ވިދާޅުވީ، ރައީސުލްޖުމްހޫރިއްޔާ އިބްރާހިމް މުހައްމަދު ސާލިޙު ދެވަނަ ދައުރަކަށް ކުރިމަތިލެއްވުން އެއީ އެމްޑީޕީއަށް ރަނގަޅު ގޮތެއް ނޫންކަމަށެވެ. 2018 ވަނަ އަހަރު ރައީސް ސާލިޙު އިންތިޚާބުގައި ކުރިމަތިލެއްވީ ފޮރިން މިނިސްޓަރު ޝާހިދުއާ ބައްދަލުކުރައްވައި، އޭރު އެންމެ ރަނގަޅު ކެންޑިޑޭޓަކީ ރައީސް ސާލިޙު ކަމަށް ވިދާޅުވެ، އަދި މަޑުކުރައްވަން ވިދާޅުވުމަށްފަހުގައި ކަމަށް ރައީސް ނަޝީދު ވިދާޅުވިއެވެ. އަދި ޝާހިދުގެ އަރިހުގައި އެމަނިކުފާނު އެގޮތަށް އެދިވަޑައިގެންނެވިއިރުވެސް، ވެރިކަން ހިންގުމުގެ ހުރިހާ ސިފަތަައް ޝާހިދުގެ ކިބައިގައި ހުންނެވިކަން ސާފުވެވަޑައިގެންނެވި ކަމަށް ރައީސް ނަޝީދު ވިދާޅުވިއެވެ.
ރިޔާސީ ޓިކެޓްގައި ނުކުންނަވާނީ ތިންވަނަ ބޭފުޅެއްތޯ އެއީ އެމްޑީޕީގެ މެމްބަރުން ކުރަމުންދާ ސުވާލެއް ކަމަށާއި، ކުރިއަތް އޮތް ހަފުތާގައި އެކަންތައްތައް ސާފުވެގެންދާނެ ކަމަށް ރައީސް ނަޝީދު ވިދާޅުވިއެވެ. ކާމިޔާބު ނުވާނެކަމަށް ނިންމަވައިގެން އެއްވެސް އިންތިޚާބަަކަށް ނުނިކުންނަވާނެ ކަމަށާއި، ކުރިއަތް އޮތް އިންތިޚާބުތަކަށް ވެސް ނުކުންނަވާނީ ކާމިޔާބު ކުރެއްވޭނެކަމަށް ނިންމަވައިގެން ކަމަށް ރައީސް ނަޝީދު ވިދާޅުވިއެވެ.
ނަމަވެސް އަންނަ އަހަރުގެ އިންތިޚާބުގައި މިހާރުގެ ކޯލިޝަންގެ ބައިވެރިންނާ ގުޅިގެން ވާދަ ކުރައްވައިގެން ކާމިޔާބު ކުރެއްވޭނެ ކަމުގެ ޔަޤީންކަން އެބައޮތް ކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ސާލިޙު ވަނީ ނޫސްވެރިންނާއި ބައްދަލުކުރައްވާ ވާހަކަފުޅު ދައްކަވަމުން ވިދާޅުވެފައެވެ. ރައީސް ސާލިޙު ވިދާޅުވީ، އަންނަ އަހަރު އެންމެ މުހިންމު ކަމަކީ އެމްޑީޕީއަށް ވެރިކަން ލިބުން ކަމަށެވެ. އަދި މިއީ ރާއްޖެއަށް ވެސް މިވަގުތު އެންމެ ފައިދާހުރި ގޮތް ކަމަށާއި، އެއީ މިހާރު ފެށިފައި ހުރި މަޝްރޫއުތައް ކުރިއަށްގެންދިއުމަށް މުހިންމު ކަމެއް ކަމަށް ރައީސް ވިދާޅުވިއެވެ.
އެމަނިކުފާނު ވިދާޅުވީ ރިޔާސީ އިންތިޚާބުގައި އެނގިގެންދާ އެއް ކަމަކީ އެކަނި ޕާޓީއެއް ނުކުތުމުން ކާމިޔާބު ނުކުރެވޭނެ ކަން ކަމުގައެވެ. އެގޮތުން، ވެރިކަމަށް އަންނަންވާނީ ރައްޔިތުންގެ 50 އިންސައްތަ ވޯޓާއެކު ކަމަށް ވާއިރު، 30 އިންސައްތައާއެކު ވެރިކަމަށް އައުމަށް ތައީދު ނުކުރައްވާ ކަމަށް ރައީސް ވިދާޅުވިއެވެ.
ކޯލިޝަނަކާއެކީގައި އެމްޑީޕީ އިސްވެ އޮވެ އެމަނިކުފާނަށް ކާމިޔާބު ކުރެއްވޭނެ ކަމުގެ ޔަޤީންކަން ވެސް ރައީސް ސާލިޙު ވަނީ އެމްޑީޕީއަށް ދެއްވާފައެވެ. ރައީސް އިތުރަށް ވިދާޅުވީ، ޕާޓީގެ ކެންޑިޑޭޓް ކަނޑައަޅާނީ ޕާޓިގެ ކޮންގްރެސްއިން ކަމަށާއި ޤަވާއިދުގައި ޕްރައިމަރީއެއް ބާއްވަން އޮންނަ ނަމަ އެކަންތައް އެގޮތަށް ކުރައްވާނެ ކަމަށެވެ. އަދި ޕްރައިމަރީއެއް ބޭއްވުމަކީ ޑިމޮކްރަސީގެ ރީތި އުސޫލެއް ކަމަށް ވެސް ރައީސް ފާހަގަކުރެއްވިއެެވެ.
