ދެކުނުގެ ރަށްތަކަށް އުދަ އަރައި ބޮޑެތި ގެއްލުންތަކެއް ވެއްޖެ
1 ޖުލައި 2022 | ހުކުރު 13:21އައްޑޫ ސިޓީ އާއި ގދ. ގ އެކި ރަށްތަކަށް ދަނީ އުދަ އަރަމުން
އައްޑޫ ސިޓީ އަށް އުދަ އަރަނީ
ރާއްޖޭގެ ދެކުނުގެ ރަށްތަކަށް ހުކުރު ދުވަހު އުދަ އަރައި ބޮޑެތި ގެއްލުންތަކެއް ވެއްޖެއެވެ.
އުދަ އެރި ސަރަހައްދުތަކުގެ ތެރޭގައި ގދ. އަތޮޅުގެ ބައެއް ރަށްތަކާއި އައްޑު ސިޓީ ހިމެނެއެވެ. މި ދެ ސަރަހައްދަށް ވެސް ޓީމުތައް ފޮނުވައި އެހީތެރިކަން ފޯރުކޮށްދިނުމުގެ މަސައްކަތް ކުރަމުން އަންނަ ކަމަށް އެމްއެންޑީއެފުން މައުލޫމާތުދީފައި ވެއެވެ.
އައްޑު ސިޓީ މޭޔަރ އަލީ ނިޒާރު "ރާއްޖެ އެމްވީ" އަށް ވިދާޅުވީ އައްޑޫގެ ހުރިހާ ރަށަކަަށް ވެސް އުދައިގެ އަސަރު ކޮށްފައިވާ ކަމަށެވެ. އެގޮތުން، ބައެެއް ރަށްރަށުގެ ގެތަކާއި ފިހާރަތަކަށް ލޮނު ވަދެފައިވާއިރު ބޮޑެތި ގެއްލުންތަކެއް އެ ގެތަކާއި ވިޔަފާރިތަކަށް ވެފައިވާ ކަމަށް ވެސް އޭނާ ވިދާޅުވިއެވެ.
މޭޔަރ ވިދާޅުވީ ސިޓީ ކައުންސިލްގެ ޕަބްލިކް ސާވިސަސް ގޮފިން މިހާރު އައްޑޫގެ ގެތަކަށް އެހީތެރިކަން ފޯރުކޮށްދިނުމުގެ މަސައްކަތް ކުރަމުން އަންނަ ކަމަށެވެ. މި މަސައްކަތުގައި އެމްއެންޑީއެފް އާއި ފުލުހުންގެ ވެސް އެއްބާރުލުން ލިބޭ ކަމަށް އޭނާ ވިދާޅުވިއެވެ.
މެދުރާއްޖެ ތެރޭގެ އަތޮޅުތަކުން ފެށިގެން އައްޑުއާ ހަމައަށް އުދަ އަރާނެ ކަމަށް ލަފާ ކޮށް ހުކުރު ދުވަހުގެ މެންދުރު ވަނީ ވައިޓް އެލަރޓް ވެސް ނެރެފައެވެ. މި އެލަރޓް ނެރފައިވަނީ ހުކުރު ދުވަހުގެ 6:00އާއި ހަމައަށެވެ.
