އެމްއެސްއެސްގެ 3ވަނަ ބޯޓު ގަނެފި
1 ޖުލައި 2022 | ހުކުރު 13:16ގްރެފީންއަކީ އެއްފަހަރާ 420 ކޮންޓެއިނަރުގެ މުދާ އުފުލޭ ބޯޓެއް
ގްރެފީން ގަތުމަށް އެއްބަސްވުމުގައި ސޮއި ކުރުމުގެ ރަސްމިއްޔާތު
މޯލްޑިވްސް ސްޓޭޓް ޝިޕިން (އެމްއެސްއެސް) ގެ 3 ވަނަ ބޯޓު ގަތުމުގެ އެއްބަސްވުމުގައި ސޮއި ކޮށްފިއެވެ.
ހުކުރު ދުވަހު އެސްޓީއޯ ހެޑް އޮފީހުގައި ބޭއްވި ހާއްސަ ރަސްމިއްޔާތެއްގައި އެމްއެސްއެސްގެ ފަރާތުން ސޮއި ކުރެއްވީ އެސްޓީއޯގެ ސީއީއޯ އަދި މެނޭޖިންގ ޑިރެކްޓަރ ހުސައިން އަމްރުއެވެ. އަދި ޖަރުމަނުވިލާތުގެ ކެންޑްލަރ ކުންފުނީގެ ފަރާތުން ސޮއި ކުރެއްވީ އެ ކުންފުނީގެ މެނޭޖިންގ ޑިރެކްޓަރ ޖީނަސް ކެލަރ އެވެ.
މިއީ ރާއްޖޭގައި ތިބެގެން ޝިޕިން ބޯޓެއް ގަތުމުގެ އެއްބަސްވުމުގައި ސޮއި ކުރެވުނު ފުރަތަމަ ފަހަރެވެ. މި އެއްބަސްވުމުގެ ދަށުން އެމްއެސްއެސް އިން ގަތް ބޯޓު ހުކުރު ދުވަހު ވަނީ ރާއްޖެއަށް ވެސް ގެނެސްފައެވެ. މި ބޯޓުގެ ދަތުރުތައް އަންނަ އޮގަސްޓް މަހު ފަށޭނެ ކަމަށް އެމްއެސްއެސް އިން ބުންޏެވެ.
"އެމްއެސްއެސް ގްރެފީން" ގެ ނަމުން ނަން ދީފައިވާ މި ބޯޓަކީ އެއްފަހަރާ 420 ކޮންޓެއިނަރުގެ މުދަލާއި 60 ރީފާ ކޮންޓެއިނަރ އުފުލޭ ވަރުގެ ބޯޓެކެވެ. މި ބޯޓުގެ ކެޕޭސިޓީ އެންމެފަހުން އެމްއެސްއެސް އިން ގެނައި ގަލޭނާގެ ކެޕޭސިޓީ އާއި އެއްވަރެކެވެ.
އެސްޓީއޯގެ މެނޭޖިން ޑިރެކްޓަރ ހުސައިން އަމްރު ވިދާޅުވީ ފާއިތުވި 2 އަހަރު ދުވަހުގެ ތެރޭގައި އެމްއެސްއެސް އިން ބޮޑު ކާމިޔާބީތަކެއް ހޯދާފައިވާ ކަމަށާއި 3 ވަނަ ބޯޓާއެކު ދުނިޔޭގެ އެހެން ބައެއް ޤައުމުތަކާ ރާއްޖެއަށް ގުޅުވާލެވޭނެ ކަމަށެވެ. އެގޮތުން، ގްރެފީން އިން ދަތުރު ކުރާނީ ސިންގަޕޫރާއި މެލޭޝިއާ އަދި ރާއްޖެއާ ދެމެދު ކަމަށާއި އަރަބި ކަރައާ ވެސް ގުޅާލުމަށް މަސައްކަތް ކުަރަމުންދާ ކަމަށް އޭނާ ވިދާޅުވިއެވެ.
މީގެ އިތުރުން އެމްއެސްއެސް މެދުވެރިކޮށް ރާއްޖޭގައި ޝިޕިން ދާއިރާ ކުރިއަރުވައި ރާއްޖެއަށް ބޭރު ފައިސާ ވަންނަ މައިގަނޑު ދާއިރާގެ ތެރޭގައި އެ ދާއިރާ ވެސް ހިމެނޭވަރު ކުރުމަށް މަސައްކަތް ކުރަމުން ގެންދާ ކަމަށް ވެސް އަމްރު ވިދާޅުވިއެވެ.
އެމްއެސްއެސް ގްރެފީންގެ ދަތުރުތައް އަންނަ އޮގަސްޓް މަހު ފަށަން ނިންމާފައިވާއިރު ދެން ކުރިއަށްދާނީ އެ ބޯޓު ރާއްޖޭގެ ބޯޓެއްގެ ގޮތުގައި ރަޖިސްޓްރީ ކުރުމުގެ މަސައްކަތް ކަމަށް އެމްއެސްއެސް އިން ބުނެއެވެ. މި މަސައްކަތް ނިންމައި ދަތުރުތައް ފެށުމުން ހުރިހާ ބާވަތެއްގެ މުދަލެއް އެ ބޯޓުން ގެނެވޭނެ ކަމަށް ވެސް އެ ކުންފުނިން ބުންޏެވެ.
އެހެން ބޯޓުތަކާ އެއްގޮތަށް ގްރެފީންގައި ވެސް މެޖޯރިޓީ މުވައްޒަފުން ވާނީ ދިވެހިންނަށް ކަމަށް ވެސް އެމްއެސްއެސްއިން ބުންޏެވެ.
އަމިއްލަ ބޯޓުގެ އިތުރުން އަމިއްލަ ކޮންޓެއިނަރ ހޯދުމުގެ މަސައްކަތް ވެސް އެމްއެސްއެސް އިން ކުރަމުން އަންނަ ކަމަށް އަމްރު ވިދާޅުވިއެވެ. މިއާއެކު ޚިދުމަތްތައް އިތުރަށް ފުޅާވެގެންދާނެ ކަމަށް ވެސް އޭނާ ވިދާޅުވިއެވެ.
