ރާއްޖެއިން ޙައްޖަށްދާ ދެވަނަ ގްރޫޕް ފުރައިފި
30 ޖޫން 2022 | ބުރާސްފަތި 02:04ދެވަނަ ގުރޫޕުގައި 175 ޙައްޖާޖީން ފުރި
1443 ވަނަ އަހަރު، ދިވެހި ހައްޖާޖީންގެ ދެވަނަ ގްރޫޕް އެއާޕޯޓުގައި
1443 ވަނަ އަހަރު ރާއްޖެއިން ޙައްޖަށްދާ ޙައްޖުވެރިންގެ ދެވަނަ ގްރޫޕު ބުދަ ދުވަހުގެ ރޭ ފުރައިފިއެވެ.
ޙައްޖުވެރިންގެ ދެވަނަ ގުރޫޕުގައި 175 ޙައްޖާޖީން ފުރާފައިވާއިރު މި ގްރޫޕް ފުރާފައިވަނީ ބުދަ ދުވަހުގެ ރޭ، 11:30 ގައެވެ.
ކަމާބެހޭ މުވައްސަސާތައް ގުޅިގެން ކުރިއަށްގެންދާ މި އޮޕަރޭޝަންގައި ޙައްޖާޖީންނަށް ފަސޭހަކުރުމަށްޓަކާ ޙައްޖާޖީންގެ ގޭ ހިމެނޭ ސަރަޙައްދުން އެއަރޕޯޓަށް ގެންދިޔުމުގެ އިންތިޒާމުތައް އެމްޓީސީސީގެ ބަހުގައިވަނީ ހަމަޖައްސާފައެވެ. އެގޮތުން މާލޭގެ 24 ޕޮއިންޓަކުން ޙައްޖުވެރިން އެއަރޕޯޓަށް ގެންދުމަށްވަނީ ހަމަޖައްސާފައެވެ.
ޙައްޖުވެރިންނާއެކު ބަސްތައް ދަތުރުކުރަމުންދާއިރު މި ބަސްތަކަށް ދަތިނުވާނެގޮތަށް ދިވެހި ފުލުހުންގެ ޚިދުމަތުން ޓްރެފިކް ބަލަހައްޓައެވެ. އަދި ޙައްޖުވެރިންގެ ކަންތައްތަކުގައި މާލެއާއި ހުޅުމާލެ، އަދި އެއަރޕޯޓްތެރެއިންވެސް ކަމާގުޅޭ މުއައްސަސާތަކުން އެހީތެރިކަންވަނީ ފޯރުކޮށްދީފައެވެ. ޙައްޖުވެރިން އެއާޕޯޓަށް ގެންދިއުމަށް މާލެ، ހުޅުމާލެ އަދި ވިލިމާލެ ހިމެނޭހެން ޖުމްލަ 24 ޕޮއިންޓެއް ވަނީ ކަނޑައަޅާފައެވެ. މި ޕޮއިންޓްތަކުގެ ތެރެއިން މާލޭގައި ބަސްތަކުގެ ދަތުރުތައް އޮންނާނީ މަޖީދީމަގު، ފަރީދީމަގު، އަމީނީމަގު އަދި ބޮޑުތަކުރުފާނުމަގުންނެވެ.
މި ޕޮއިންޓްތަކުގެ ތެރެއިން މަޖީދީމަގުގައި 9 ބަސް، ފަރިދީމަގާއި، އަމީނީމަގާއި، ބޮޑުތަކުރުފާނު މަގުގައި 3 ބަސް އޮންނާނެއެވެ.
މިއަހަރު ރާއްޖެއިން ޙައްޖަށް ދިޔުމަށް 453 ކޯޓާ ސަޢުދީ ސަރުކާރުންވަނީ ދީފައެވެ. މީގެތެރެއިން 100 ޖާގައަށް މީހުން ނަގާފައިވަނީ ޢާއްމުކޮށް ހުޅުވާލައިގެން ގުރުއަތު ނަގައިގެންނެވެ. ބާކީ ހުރި ޖާގަތަކަށް މީހުން ނަގާފައިވަނީ ޙައްޖު ކޯޕަރޭޝަނުގައި ރަޖިސްޓްރީވެފައިވާ ކިޔު ތަރުތީބުންނެވެ.
މިއަހަރު ރާއްޖެއިން ޙައްޖަށްދާ ފުރަތަމަ ގްރޫޕްވަނީ މިދިޔަ އާދިއްތަ ދުވަހު ފުރާފައެވެ. ތިންވަނަ ގްރޫޕް އަދި އެންމެ ފަހުގެ ގްރޫޕް ފުރުމަށް ހަމަޖެހިފައިވަނީ ޖުލައިމަހުގެ 2 ވަނަ ދުވަހުގައެވެ.
