އާރުޓީއެލްގެ ޚިދުމަތް އާދީއްތަ ދުވަހު ހއ. އަތޮޅުގައި ރަސްމީކޮށް ފަށަނީ
ޖުލައި 2އާ ހަމައަށް ހިލޭ ދަތުރު ކުރެވޭނެ
ހއ އަތޮޅުގައި ހިދުމަތްދޭ 5 ފެރީ މާލެއިން ފުރަން ތައްޔާރުވެފައި
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)ގެ ރާއްޖެ ޓްރާންސްޕޯޓް ލިންކް (އާރުޓީއެލް) ގެ ޚިދުމަތް ހއ. އަތޮޅުގައި ރަސްމީކޮށް ފަށަން ތައްޔާރު ވެއްޖެއެވެ.
އެ އަތޮޅުގައި މި ހަފްތާއިން ފެށިގެން އެމްޓީސީސީން ވަނީ ސްޕީޑް ލޯންޗް ފެރީގެ ޚިދުމަތް ފަށާފައެވެ. ނަމަވެސް މިހާރު އެ ދަތުރުތައް ކުރަނީ އެއްވެސް ފީއަކާ ނުލައި ހިލެއެވެ. މި ޚިދުމަތް ރަސްމީކޮށް ފަށަން ތާވަލު ކޮށްފައިވަނީ ޖުލައި 3 ވަނަ ދުވަހުން ފެށިގެންނެވެ.
އެމްޓީސީސީން ބުނީ ކަނޑައަޅާފައިވާ އަގުތަކުގައި ހއ. އަތޮޅުގައި ފެރީގެ ޚިދުމަތް ފެށުމާއެކު "އިންޓަގްރޭޓެޑް ނޭޝަނަލް ޕަބްލިކް ފެރީ ނެޓްވޯކް" ގެ ފުރަތަމަ ފިޔަވަހީގެ ދެ އަތޮޅުގައި ދަތުރުތައް ފެށުނީ ކަމަށެވެ. އެ ފިޔަވަހީގެ ދަށުން ދެން ދަތުރުތައް ފަށާނީ ށ. އަތޮޅުގައެވެ.
ކަނޑައަޅާފައިވާ އަގު ނަގައިގެން ދަތުރު ކުރަން ފެށުމުގެ ކުރިން ހިލޭ ދަތުރުތައް ބާއްވަނީ ކަސްޓަމަރުން ޝެޑިއުލަށް އަހުލުވެރިކޮށް ޚިދުމަތް ރަނގަޅަށް ތަޖުރިބާ ކުރުމުގެ ފުރުސަތު ދިނުމަށް ކަމަށް އެމްޓީސީސީން މައުލޫމާތު ދެއެވެ. ހދ. އަތޮޅުގެ ފެރީގެ ޚިދުމަތް ރަސްމީކޮށް ފެށުމުގެ ކުރިން ވެސް ހިލޭ ދަތުރުތައް ބޭއްވިއެވެ.
ހއ. އަތޮޅުން 5 ސްޕީޑް ފެރީ މެދުވެރިކޮށް 8 ރޫޓެއްގައި ހަފުތާއަކު 7 ދުވަހު ދަތުރު ކުރާނެއެވެ. އެއީ ތުރާކުނުން ދިއްދުއަށް ދާ ރޫޓާއި، މުޅަދޫ އިން ދިއްދުއަށް، މާރަންދޫއިން ދިއްދުއަށް، ފިއްލަދޫއިން ދިއްދުއަށް، ކެލައިން ދިއްދުއަށް، ދިއްދޫއިން ހަނިމާދޫގެ ރޫޓުގެ އިތުރުން އިހަވަންދޫ އިންނާއި ދިއްދޫއިން ހދ. ކުޅުދުއްފުއްޓަށް ވެސް ދަތުރުތައް އޮންނާނެއެވެ.
އާރުޓީއެލްގެ ޚިދުމަތުގެ ދަށުން ފެރީ އޮންނަ ގަޑިތައް އެމްޓީސީސީގެ ވެބްސައިޓުން ބަލާލެވޭއިރު 1 ޖުލައި އިން ފެށިގެން ވެބްސައިޓުންނާއި މޯބައިލް އެޕްލިކޭޝަނުން ޓިކެޓް ވެސް ނެގޭނެއެވެ. އަދި 2 ޖުލައި އިން ފެށިގެން ކައުންސިލް މެދުވެރިކޮށް ޖާގަ ދޫކުރުން ހުއްޓާލާނެއެވެ.
އާރުޓީއެލްގެ ދަށުން ބޭނުން ކުރާ ލޯންޗުތަކަކީ ހާއްސަ އެހީއަށް ބޭނުންވާ ފަރާތްތަކަށް ފަސޭހަކަމާއެކު އަރައިފޭބޭ ގޮތަށް ފަރުމާކޮށްފައިވާ ދަތުރު ކުރަން ފަސޭހަ ލޯންޗުތަކެކެވެ. މި ލޯންޗުތަކުން ދަތުރު ކުރާ ހާއްސަ އެޙިއަށް ބޭނުންވާ ފަރާތްތަކާއި އުމުރުން 3 އަހަރުން ދަށުގެ ކުޑަކުދިންނަށް ހިލޭ ދަތުރު ކުރެވޭނެއެވެ.
އެމްޓީސީސީން މި ޚިދުމަތަށުް ކަނޑައަޅާފައިވާ އަގުތަކަކީ އާއްމުކޮށް ލޯންޗު ފެރީތަކުން ނަގާ އަގުތަކަށްވުރެ ކުޑަ އަގުތަކެކެވެ. އެގޮތުން، ދެ ކޮޅަށް އެންމެ ބޮޑު އަގަކަށް ވެސް އެ ކުންފުނިން ކަނޑައަޅާފައިވަނީ 200 ރުފިޔާއެވެ.
އިންޓަގްރޭޓެޑް ނޭޝަނަލް ޕަބްލިކް ފެރީ ނެޓްވޯރކްއަކީ މުޅި ރާއްޖެއަށް އަމާޒުކޮށް ފަސިންޖަރުންނާއި މުދާ އުފުލާ ފެރީ ހިމެނޭ ގޮތުން، ނޭޝަނަލް ސްޕެޝަލް ޕްލޭން (2020-2040)ގައި ހިމެނޭ ތިން ޒޯނާއި ހަ ރީޖަން ގުޅުވައިދިނުމަށް ފަރުމާކޮށްފައިވާ ވިއުގައެކެވެ. މި ގޮތުން ފެރީ ނެޓްވޯރކުން ހަ ރީޖަންގައި އެކުލެވޭ ހުރިހާ ރަށްތަކެއް ގުޅާލެވޭއިރު، އެއް ރީޖަން އަނެއް ރީޖަނާވެސް ގުޅިގެންދާނެއެވެ. މި ގޮތަށް ފަސިންޖަރުން އުފުލާ ފެރީ ގުޅުވާލެވޭނީ ތަފާތު ތިން ގޮތަކަށެވެ. އެއީ "ކޮމިއުޓް ލިންކް"، "ނަން-ކޮމިއުޓް ލިންކް"، އަދި "ހައިވޭ ލިންކް" މެދުވެރިކޮށެވެ.
ކޮމިއުޓް ލިންކްއަކީ އެ ރީޖަނެއްގައި ހިމެނޭ ރަށްތައް ގުޅުވައިދޭ، އާންމުކޮށް ކުރަންޖެހޭ މަސައްކަތް ނުވަތަ ޒަރޫރީ ބޭނުންތަކަށް ކުރާ ކުރު ދަތުރުތަކަށް ޚާއްސަކުރެވިފައިވާ ލިންކެވެ. ނަން-ކޮމިއުޓް ލިންކްއަކީ ދެ ރަށެއްގެ ދެމެދުގައި ކުރާ، ދިގު ދަތުރުތަކަށް ޚާއްސަކޮށްފައިވާ ލިންކެވެ. އަދި ހައިވޭ ލިންކަކީ އެއް ރީޖަން އަނެއް ރީޖަނާ ގުޅުވައިދޭ މައި ދަތުރުފަތުރުގެ ހަބެވެ. އިންޓެގްރޭޓެޑް ނޭޝަނަލް ޕަބްލިކް ފެރީ ނެޓްވޯރކްގައި ހިމެނޭ ދެވަނަ ޚިދުމަތަކީ ކާގޯ ނުވަތަ މުދާ އުފުލާ ފެރީގެ ޚިދުމަތެވެ. މި ޚިދުމަތަކީ، އެ ރީޖަންއެއްގައި ހިމެނޭ ހުރިހާ ރަށްތަކާއި އެންމެ ކައިރީގައި އޮންނަ ކޮމަރޝަލް ހަބް ގުޅުވައިދޭނެ ޚިދުމަތެކެވެ.
