ރާއްޖޭގައި ފަހުން ހިނގި މުހިންމު ކަންކަން ރައީސް ކެބިނެޓާއި ހިއްސާކުރައްވައިފި
29 ޖޫން 2022 | ބުދަ 02:12ރައީސް ވަނީ ކޮމަންވެލްތުގެ އިސްވެރިންގެ ބައްދަލުވުމުގެ މުހިންމު ކާމިޔާބީތައް ވަޒީރުންނާ ހިއްސާ ކުރައްވާފައި
ރައީސް ވަޒީރުންނާ ބައްދަލު ކުރައްވަނީ
ކޮމަންވެލްތު އިސްވެރިންގެ 26 ވަނަ ބައްދަލުވުމުގެ މުހިންމު ކާމިޔާބީތަކާއި ރާއްޖޭގައި ފަހުން ހިނގައި ދިޔަ ކަންކަމުގެ އެންމެ ފަހުގެ މައުލޫމާތު ރައީސުލްޖުމްހޫރިއްޔާ އިބްރާހިމް މުޙައްމަދު ސާލިހު ވަޒީރުންގެ މަޖިލީހާއި ހިއްސާ ކުރައްވައިފިއެވެ.
ރައީސް މައުލޫމާތުތައް ހިއްސާ ކުރެއްވީ އަންގާރަ ދުވަހު ބޭއްވި ކެބިނެޓް ޖަލްސާގައެވެ.
އަންގާރަ ދުވަހުގެ ވަޒީރުންގެ މަޖިލީހުގެ ބައްދަލުވުމުގައި ރައީސް ވަނީ މިމަހުގެ 21 ވަނަ ދުވަހު ހެނދުނު ރަސްމީ ދަނޑުގައި ކުރިޔަށްގެންދިޔަ ހަރަކާތަށް ހުރަސްއަޅައި އެ ހަރަކާތުގައި ބައިވެރިވި ބޭފުޅުންނާ ދެކޮޅަށް، އެތަނަށްބަޔަކު ވަދެ ހިންގި ކަންކަމާ ގުޅޭ ފަހުގެ މަޢުލޫމާތު ވެސް ހިއްސާކުރައްވާފައެވެ. އެގޮތުން މި ކަންތައްތައް ހިނގާދިޔަ ގޮތް ބެއްލެވުމަށް ރައީސް އެކުލަވާލެއްވި ވަޒީރުންގެ މަޖިލީހުގެ ކުޑަ ކޮމެޓީގެ މަސައްކަތް މިހާރު ގޮސްފައިވާ ހިސާބާ ބެހޭގޮތުން ވަޒީރުންގެ މަޖިލީހަށް މައުލޫމާތު ދެއްވިއެވެ.
މީގެ އިތުރުން މިހާރު ރާއްޖޭގައި ކޮވިޑް ބަލިމަޑުކަމުގެ ހާލަތާބެހޭ އެންމެ ފަހުގެ މައުލޫމާތާއި މާލޭގެ ރައްޔިތުންނަށް ބޯހިޔާވަހިކަން ފޯރުކޮށްދިނުމުގެ ގޮތުން ސަރުކާރުން ހުޅުވާލި ގެދޮރުވެރިޔާ ސްކީމާއި ބިންވެރިޔާ ސްކީމާބެހޭ އެންމެ ފަހުގެ މަޢުލޫމާތު ވެސް ވަޒީރުންގެ މަޖިލީހުގެ ބައްދަލުވުމުގައި ހިއްސާކުރެއްވިއެވެ.
