60 އަހަރުވީ ފިލްމީ ހަޔާތުން ޖެކީ ޗޭންގެ ސިއްރެއް!
28 ޖޫން 2022 | އަންގާރަ 05:06އެ ސީންގައި ފެނިގެންދާ ސްޓަންޓަކީ، މުޅިންވެސް އޭނާގެ އަމިއްލަ މަސައްކަތް
ޖެކީ ޗޭން؛ ފިލްމީ ތަރިއެއް
ޖެކީ ޗޭންއޭ ބުނުމުން އެއީ ކާކުކަން ބަޔާންކޮށްދިނުމަށް އިތުރު ތަފްސީލަކަށް ބޭނުންވާނެ މީހުން މަދުވާނެއެވެ. 1962 ވަނަ އަހަރުގެ ފިލްމް "ބިގް އެންޑް ލިޓްލް ވޮންގް ޓިން ބާ"ގައި އިތުރު ބައިވެރިއެއްގެ ގޮތުގައި ކުޑަކުއްޖެއްގެ ދައުރު އަދާ ކުރި ޖެކީ ޗޭން އަކީ އޭގެ 10 އަހަރު ފަހުން ބްރޫސް ލީއާއެކު "އެންޓާ ދަ ޑްރެގަން"އިން ފެނިގެންދިޔަ ވަރުގަދަ ސްޓަންޓް-މޭންއެވެ. އިސާހިތަކު ދުނިޔޭގެ އެކި ކަންކޮޅުތަކަށް އޭނާގެ ވާހަކަ ފެތުރިގެން ދިޔައެވެ. ދިވެހި ދޫތަކަށްވެސް ޖެކީ ޗޭންގެ ނަމަކީ ފަރިތަ ނަމަކަށްވިއެވެ.
ނިމިދިޔަ ހަފުތާ ބަންދަކީ އޭނާގެ ފިލްމީ ހަޔާތަށް 60 އަހަރު ފުރުން، ޖެކީ ޗޭން، ކުލަ ގަދަކޮށް ފާހަގަ ކުރި ހަފުތާ ބަންދެކެވެ. އޭނާގެ ފިލްމީ ހަޔާތަށް 60 އަހަރު ފުރުން ފާހަގަ ކުރުމަށް ކުރިއަށް ގެންދިޔަ ލައިވެއްގައި ޖެކީ ޗޭން ވަނީ، އޭނާގެ މަޝްހޫރު ސީރީޒް "ޕޮލީސް ސްޓޯރީ"އާ ބެހޭ ގޮތުން މިހާތަނަށް އާންމުންނަށް އެނގިފައި ނުވާ ސިއްރުތަކެއްވެސް ބަންޑުންކޮށްލަފައެވެ.
ގަދަ ހިތްވަރާއި ބުރަ މަސައްކަތުން، މުނިފޫހިފިލުވުމުގެ ދާއިރާ ފަޅުވާދެމުން ދާ ޖެކީ ޗޭން އަކީ އެ މަންޒަރުތައް ބަލާލި ކޮންމެ މީހެއްގެ ތަލިން ކުޅު ހިއްކާލާ، ތަންމިނަށް އަނގަ ހުޅުވަން މަޖުބޫރު ކުރުވާ ފަދަ ސްޓަންޓްތަކެއްވެސް ފެނިގެންދާ މަންޒަރުތަކެއް ހުށަހަޅާދީފައިވާ ކުޅަދާނަ ބަތޮލެކެވެ. އެފަދަ އެއް މަސައްކަތަކީ "ޕޮލީސް ސްޓޯރީ"އެވެ.
"ޕޮލީސް ސްޓޯރީ"އިން ފެނިގެންދާ އެއް މަންޒަރަކީ ސީލިންގުގައި ހަރުކޮށްފައި ހުރި ބޮކިތަކަކަށް ގުޅާފައިވާ ނަރެއްގައި އެލިގެން އެތައް މީޓަރު އުސް މިނަކުން ޖެކީ ޗޭން ފައިބާ މަންޒަރެވެ. އެ ސީންގައި ފެނިގެންދާ ސްޓަންޓަކީ، މުޅިންވެސް އޭނާގެ އަމިއްލަ މަސައްކަތެވެ.
ޖެކީ ޗޭންގެ ސާބިތުކަމަކީ ފިލްމީ ސިނާއަތުގެ ޒުވާން ތަރިންނަށްވެސް ލިބުނު އިތުރު ހިތްވަރެކެވެ. ޖެކީ ޗޭންއާއެކު "ނިއު ޕޮލީސް ސްޓޯރީ"ގައި މަސައްކަތް ކުރި ޗައިނާ ބަތޮލް ނިކޮލަސް ސީ ޓިންގް-ފަންގް ކިޔައިދިން ގޮތުގައި، އޭނާ އަބަދުވެސް ދިޔައީ ގިނަ ބައެއްގެ އިހުތިރާމް ލިބިފައިވާ ޖެކީ ޗޭން އަޅަމުން ދިޔަ ފިޔަވަޅުތަކުގެ ފަހަތުންނެވެ.
ފިލްމީ މައިދާނުގައި އެތައް އަހަރެއް ވަންދެން އޭނާ ކުރަމުން ދިޔަ ނޭވާ ހިފަހައްޓާލަން ޖެހޭ ފަދަ މަސައްކަތްތަކުގެ ނިޝާންތަކާއި ލަކުނު، މިއަދުވެސް ޖެކީ ޗޭންގެ ހަށިގަނޑުގައި އެބަ ހުއްޓެވެ. ނަމަވެސް، ހާލަތު ތަންދޭ މިންވަރަކުން އެ ރޮނގުން ކުރިއަށް ދިއުމަށް ޖެކީ ޗޭން އަދިވެސް ހުރީ ހަމަ ތައްޔާރަށެވެ.
ޖެކީ ޗޭން ހުރީ އޭނާގެ ފިލްމީ ހަޔާތަށް 60 އަހަރުވެއްޖެކަން ގަބޫލު ކުރަންވެސް ދަތިވެފައެވެ. ބައި ގަރުނަށްވުރެ ދިގު އެ މާޒީގެ ކޮންމެ ހަނދާނަކީ މިއަދު އޭނާއަށް އަގުހުރި ރައުސުލްމާލެކެވެ.
