ކ. ގުރައިދޫ ގެސްޓްހައުސްއެއްގެ ތެރެއިން މަރުވެފައި އޮތް ފަތުރުވެރިއަކު ފެނިއްޖެ
މަރުވެފައި އޮއްވާ ފެނުނީ 56 އަހަރުގެ އަންހެނެއް
ކ. ގުރައިދޫ
ކ. ގުރައިދޫ ގެސްޓްހައުސްއެއްގެ ތެރޭގައި މަރުވެފައި އޮތް ފަތުރުވެރިއަކު ފެނިއްޖެއެވެ.
އެ ރަށު ކައުންސިލް ރައީސް ހުސައިން ޔާމީން މުހައްމަދު "ރާއްޖެ އެމްވީ"އަށް ވިދާޅުވީ، އެ ރަށުގެ އޯޝަން ރިޓްރީޓް އެންޑް ސްޕާގައި މަރުވެފައި އޮތް ފަތުރުވެރިއަކު ފެނުނީ ހުކުރު ދުވަހު ހަވީރު 6:30ހާއިރު ކަމަށެވެ. އެ މީހާ ފެނުނުއިރު އޮތީ ކުނިވާން ފަށާފައި ކަމަށްވެސް އޭނާ ވިދާޅުވިއެވެ.
ޔާމީން ވިދާޅުވިގޮތުގައި މަރުވެފައި އޮއްވާ ފެނުނީ އިނގިރޭސިވިލާތަށް ނިސްބަތްވާ އުމުރުން 56 އަހަރުގެ އަންހެނެކެވެ. އޭނާ މަރުވެފައިވަނީ ބުރާސްފަތި ދުވަހު ކަމަށް ލަފާ ކުރެވޭ ކަމަށް ވެސް އޭނާ ވިދާޅުވިއެވެ.
ޗުއްޓީ ހޭދަ ކުރުމަށް ގުރައިދޫއަށް ދިޔަ އެ ފަތުރުވެރިޔާ ބަލިވެ އުޅޭތީ ބުރާސްފަތު ދުވަހު ޑޮކްޓަރަށް ދައްކަން ދިޔަކަން ފާހަގަ ކުރައްވައި ޔާމީން ވިދާޅުވީ، އޭނާ ކޮޓަރިއަށް ދިއުމުގެ ކުރިން ރިސެޕްޝަނުގައި އެކަން ފާހަގަކޮށް އެއްވެސް ގޮތަކަށް "ޑިސްޓަރބް" ނުކުރުމަށް އެދިފައިވާ ކަމަށެވެ. އަދި ދޮރުގައި "ޑޫ ނޮޓް ޑިސްޓަރބް" ޓެގް އަޅުވައިފައި ހުރިކަންވެސް ޔާމީން ފާހަގަ ކުރެއްވިއެވެ.
އޭނާ ވިދާޅުވި ގޮތުގައި މިހާރު އެ މީހާގެ ހަށިގަނޑު ވަނީ މާލެ ގެނެސްފައެވެ.
