މިނިސްޓަރު މަޚްލޫފަށް މަރުގެ އިންޒާރުދިން މައްސަލަ ފުލުހުންނަށް ހުށަހަޅައިފި
މައްސަލަ ވަނީ ފުލުހުންނަށް ހުށަހަޅާފައި
މިނިސްޓަރު މަޚްލޫފް
ޔޫތު މިނިސްޓަރު އަޙުމަދު މަޚްލޫފަށް މަރުގެ އިންޒާރުދިން މައްސަލަ ފުލުހުންނަށް ހުށަހަޅައިފިއެވެ.
މިނިސްޓަރު މަޚްލޫފަށް މަރުގެ އިންޒާރު ދީފައިވަނީ އިންޓަރނޭޝަނަލް ޔޯގާ ޑޭ ފާހަގަކުރުމުގެ ގޮތުން ގަލޮޅު ދަނޑުގައި ޔޯގާ ހަރަކާތް ބާއްވާފައި ވަނިކޮށެވެ.
މިނިސްޓަރު މަޚްލޫފަށް މީހަކު ކުރި މެސެޖެއްގައި ވަނީ މިއީ އެމަނިކުފާނަށް ދޭ ގަދަ ފަދަ އިންޒާރެއް ކަމަށެވެ. އިންޑިއާގެ ޕަޕެޓަކަށްވެގެން ޔޯގާ ހަލާލު ކުރާއިރު އެއީ ބާތިލް ފިކުރު ކަމަށް އެ މެސެޖުގައި ބުނެފައިވެއެވެ. މީގެ އިތުރުން އެ މެސެޖުގައި ބުނެފައިވަނީ މަޚްލޫފް އަތު ޖެހުނު ނަމަ، "ނޮޅާލީމުސް" ކަމަށެވެ. އަދި އޭގެން މީހެއްގެ އަޚަކަށް ނުވަތަ ޖަމިއްޔާއަކަށް ފިޔަވަޅު އަޅައިފިނަމަ، މަޚްލޫފާއި މުޅި އާއިލާ ދުއްވާލާނެ ކަމަށް ބުނެ އިންޒާރުދީފައިވެއެވެ. މީގެ އިތުރުން އެ މެސެޖުގައި ބުނެފައިވަނީ އަބަދު މިނިސްޓަރުކަމުގައި ނުހުރެވޭނެ ކަމަށެވެ.
މި މެސެޖުތައް އާންމުކުރައްވާ މިނިސްޓަރު މަޚްލޫފް ވިދާޅުވީ މެސެޖުކޮށްފައިވަނީ އެމަނިކުފާނުގެ ކުރީގެ ނަންބަރަށް ކަމަށެވެ. މީގެ އިތުރުން މިނިސްޓަރު ވިދާޅުވީ ބިރު ދައްކައިގެން އެއްވެސް ކަމެއްގެ ނަތީޖާއެއް ހާސިލްނުކުރެވޭނެކަމަށާއި، މިނިސްޓަރު ކަމަކީ މާ ގަދަކަމެއް ކަމަށް އެ މީހަކަށް ގަބޫލުކުރެވުނަސް، އެމަނިކުފާނަށް އެއީ މާ މުހިންމު ކަމެއް ނޫން ކަމަށެވެ. މިނިސްޓަރު ވިދާޅުވީ އެފަދަ މީހެއްގެ އަތުން މަރުވެއްޖެނަމަ ޔަޤީނުންވެސް ޝަހީދަކަށްވާނެ ކަމަށެވެ.
މިކަމާ ގުޅިގެން ރާއްޖެ އެމްވީއާ ވާހަކަ ދައްކަވަމުން މިނިސްޓަރު މަޚްލޫފް ވިދާޅުވީ މަރުގެ އިންޒާރުދިން މައްސަލަ މިހާރު ފުލުހުންނަށް ހުށަހަޅާފައިވާނެ ކަމަށެވެ.
މި މައްސަލައާ ގުޅިގެން ފުލުހުންނާއި ސުވާލުކުރުމުން އެ އިދާރާއިން ވަކި އެއްޗެއް އަދި ބުނެފައެއް ނުވެއެވެ.
