މާފުށީގެ ކުނި މެނޭޖުކުރުމަށް ސްޓެލްކޯއާ ހަވާލުކޮށްފި
23 ޖޫން 2022 | ބުރާސްފަތި 02:04ވޭސްޓް މެނޭޖްމަންޓް ސިސްޓަމެއް މާފުށީގައި ގާއިމު ކުރާނަން
މާފުށީގެ ކުނި މެނޭޖުކުރުމަށް ސްޓެލްކޯއާ ހަވާލުކުރުމުގެ އެއްބަސްވުމުގައި ސޮއިކުރަނީ
މާފުށީގެ ކުނި މެނޭޖުކުރުމުގެ މަސައްކަތް ސްޓެލްކޯއާ ހަވާލުކޮށްފިއެވެ.
މި މަސައްކަތާއި ހަވާލުވުމުގެ އެއްބަސްވުމުގައި ސޮއިކުރުމުގެ ރަސްމިއްޔާތު ބުދަ ދުވަހު ސްޓެލްކޯ އޮފީހުގައި ބާއްވާފައިވާއިރު ސްޓެލްކޯގެ ފަރާތުން ސޮއިކުރެއްވީ ވޯޓާ، ސްވަރޭޖް އެންޑް ވޭސްޓްމެނޭޖްމަންޓް ޑިޕާޓްމަންޓުގެ ޖެނެރަލް މެނޭޖަރު އަހުމަދު ޝަފީއު އެވެ. އަދި މާފުށި ކައުންސިލުގެ ފަރާތުން ސޮއިކުރެއްވީ ކައުންސިލް ރައީސް ހަސަން ސޮލާހެވެ.
މި މަޝްރޫއުގެ ދަށުން މާފުށީގައި އެންމެ ޒަމާނީ ކުނިކޮށްޓެއް ގާއިމުކޮށް، އެތަނުގައި ކުނި ވަކިކޮށް، ރީސައިކަލް ނުކުރެވޭ ކުނި ބޭރު ކުރުމުގެ އިންތިޒާމު ހަމަޖެހޭނެއެވެ.
މި ރަސްމިއްޔާތުގައި ވާހަކަފުޅު ދައްކަވަމުން ސްޓެލްކޯގެ މެނޭޖިން ޑިރެކްޓަރު އަހުމަދު ޝަރީފު ވިދާޅުވީ އެއް ފުރާޅެއްގެ ދަށުން ހުރިހާ ޔުޓިލިޓީގެ ޚިދުމަތްތައް ދިނުމުގެ ފަހުރު ހާސިލް ކުރި އެންމެ ފުރަތަމަ ކުންފުންޏަށް ސްޓެލްކޯ ވެގެން ހިނގައްޖެ ކަމަށެވެ.
މާފުއްޓަށް ދިމާވެފައިވާ ކުނީގެ އުނދަގޫ ކުރު މުއްދަތެއްގެ ތެރޭގައި ހައްލު ކުރާނެ ކަމަށާއި ވޭސްޓް މެނޭޖްމަންޓް ސިސްޓަމެއް މާފުށީގައި ޤާއިމު ކުރާނެ ކަމަށް ވެސް ޝަރީފް ވިދާޅުވިއެވެ. މީގެ އިތުރުން ކ. ގުރައިދޫ އާއި ގުޅީގެ ކުނި މެނޭޖުކުރުމުގެ މަސައްކަތް މި ޕައިލެޓް ޕްރޮޖެކްޓްގެ ދަށުން ހިމެނުމަށް ވިސްނަވާ ކަމަށް ވެސް ޝަރީފް ވިދާޅުވިއެވެ.
ކުނި މެނޭޖުކުރުމަކީ ސްޓެލްކޯއަށް މުޅިން އައު ޚިދުމަތެއް ކަމަށާއި މި ޚިދުމަތް ފަށައިގަތުމަށް ކޮންސަލްޓަންޓަކު ހޯދުުމުގެ މަސައްކަތް ކުރަމުންދާ ކަމަށް ވެސް ޝަރީފް ވިދާޅުވިއެވެ.
ސްޓެލްކޯއިން ކަރަންޓުގެ ޚިދުމަތާއި ފެނާއި ނަރުދަމާގެ ޚިދުމަތް ފޯރުކޮށްދޭ އެހެން ރަށްތަކުގައިވެސް ކުނި މެނޭޖުކުރުމުގެ މަަސައްކަތް ފެށުމުގެ ވިސްނުން ގެންގުޅޭ ކަމަށް އެ ކުންފުނިން ވަނީ ބުނެފައެވެ.
