ޔޯގާ ޙަރަކާތުގައި ހަމަނުޖެހުން ހިންގި މައްސަލަ ސީރިއަސް މައްސަލައެއް ގޮތުގައި ތަހުގީގު ކުރާނަން: ފުލުހުން
ދިވެހި 6 ފިރިހެނުން ފުލުހުންގެ ބެލުމުގެ ދަށަށް ގެންގޮސްފައިވޭ
އިންޓަރނޭޝަނަލް ޔޯގާ ޑޭ ރާއްޖޭގައި ފާހަގަކުރުމަށް ބޭއްވި ޙަރަކާތުގެ ތެރެއިން ހިންގި ހަމަނުޖެހުން
އިންޓަރނޭޝަނަލް ޔޯގާ ޑޭ ރާއްޖޭގައި ފާހަގަކުރުމަށް ބޭއްވި ޙަރަކާތުގެ ތެރެއިން ހިނގި ހަމަނުޖެހުމުގައި 6 މީހަކު ފުލުހުންގެ ބެލުމުގެ ދަށަށް ގެންގޮސްފިއެވެ.
އިންޓަރނޭޝަނަލް ޔޯގާ ޑޭ ފާހަގަކުރުމުގެ ގޮތުން ބޭއްވި ޙަރަކާތާއި ދެކޮޅު ފަރާތްތަކުން ވަނީ އެއީ ދީނާއި ޚިލާފު ކަމެއްކަން ފާހަގަކޮށް އެ ޙަރަކާތަށް ހުރަސް އަޅާފައެވެ. އެކަމުގެ ތެރެއިން ބައެއް ހަމަނުޖެހުންތައްވެސް ހިނގާފައިވެއެވެ.
އެކަމާ ގުޅޭގޮތުން ފުލުހުންގެ މީޑިއާ އޮފިޝަލު ވިދާޅުވީ، ނޭޝަނަލް ސްޓޭޑިއަމްގައި ކުރިއަށް ގެންދިޔަ މިމުޒާހަރާގެ ތެރެއިން ދިވެހި 6 ފިރިހެނުން ފުލުހުންގެ ބެލުމުގެ ދަށަށް ގެންގޮސްފައިވާ ކަމަށެވެ. އަދި އެ މައްސަލަ ސީރިއަސް މައްސަލައެއްގެ ގޮތުގައި ތަހުގީގު ކުރަމުންދާކަމަށް ފުލުހުންގެ މީޑިއާ އޮފިޝަލު ވިދާޅުވިއެވެ.
އަންގާރަ ދުވަހު ފާހަގަކުރާ މި އަހަރުގެ ބައިނަލްއަގްވާމީ ޔޯގާ ދުވަހާ ގުޅިގެން ގަލޮޅު ދަނޑުގައި ކުރިއަށް ގެންދިޔަ ޔޯގާ ހަރަކާތުގެ ތެރެއަށް ބަޔަކު ވަދެ އެތަނުގައި ތިބި މީހުންނަށް ޙަމަލާ ދީފައިވާކަމަށް ޔޫތު މިނިސްޓަރު އަހުމަދު މަހުލޫފު ވިދާޅުވެފައިވެއެވެ.
އަންގާރަ ދުވަހުގެ ހެނދުނު ގަލޮޅު ދަނޑުގައި ކުރިއަށް ގެންދިޔަ މި ހަރަކާތުގެ ތެރެއަށް ވަތް މީހުން ގޮވަމުން ދިޔައީ "ﷲ އަކުބަރު" އަދި "މިތަނުން ނުކުމޭ" އެވެ. އެ ހަމަނުޖެހުންތައް ހުއްޓުވުމަށް ފުލުހުން ކަރުނަގޭސްވެސް ބޭނުންކޮށްފައިވެއެވެ.
ފުރަތަމަ ހަމަނުޖެހުން ހިނގުމުން ޔޯގާ ޙަރަކާތް މެދުކަނޑާލުމަށްފަހު، އަނެއްކާވެސް ސެކިއުރިޓީ ވަރުގަދަ ކޮށްގެން މި ޙަރަކާތް ވަނީ ކުރިއަށް ގެންގޮސްފައެވެ.
