ހުޅުމާލެ ދެވަނަ ފިޔަވަހީގައި ތަރައްގީ ކޮށްފައިވާ ވިނަރެސް ފެލްޓުތައް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އާއި ހަވާލުކޮށްފިއެވެ.
ހޯމަ ދުވަހު ހުޅުމާލޭގެ ދެވަނަ ފިޔަވަހީގައި ބޭއްވި ރަސްމިއްޔާތެއްގައި ފްލެޓުތައް އެޗްޑީސީއާއި ހަވާލު ކުރުމުގެ އެއްބަސްވުމުގައި އެ މަސައްކަތް ކުރިއަށްގެންދާ ޗައިނާގެ ސީއެމްއީސީ ގްރޫޕުގެ ފަރާތުން ސޮއި ކުރެއްވީ އެކުންފުނީގެ ޗީފް ރެޕްރެޒެންޓޭޓިވް ލުއީއެވެ. އަދި އެޗްޑީސީގެ ފަރާތުން ސޮއި ކުރެއްވީ އެ ކުންފުނީގެ މެނޭޖިން ޑިރެކްޓަރ ސުހައިލް އަހުމަދު އެވެ. މި ރަސްމިއްޔާތުގައި ރައީސުލްޖުމްހުރިއްޔާގެ ނައިބު ފައިސަލް ނަސީމް އާއި ޕްލޭނިން މިނިސްޓަރ މުހައްމަދު އަސްލަމް އާއި ސަރުކާރުގެ އިސް ބޭފުޅުން ބައިވެރިވެވަޑައިގެންނެވިއެވެ.
މި ރަސްމިއްޔާތުގައި އެޗްޑީސީއާއި ފުރަތަމަ ހަވާލު ކޮށްފައިވަނީ މިހާރު މަސައްކަތް ނިމިފައިވާ ވިނަރެސްގެ ދެ ޓަވަރެވެ. މި ދެ ޓަވަރަކީ ހިޔާ ފްލެޓުތަކާ އެންމެ ކައިރީގައި ހަދާފައިވާ ދެ ޓަވަރެވެ.
ވިނަރެސް މަޝްރޫއުގެ ދަށުން ޗައިނާގެ ސީއެމްއީސީއާ ހަވާލުކޮށްގެން 10 ޓަވަރުގެ މަސައްކަތް ކުރިއަށްގެންދެއެވެ. މި 10 ޓަވަރުގައި ޖުމްލަ 1344 ފްލެޓް ހަދާއިރު މިއީ މިހާތަނަށް ރާއްޖޭގައި ކުރިއަށްގެންދިޔަ ހައުސިން މަޝްރޫއުތަކުުގެ ތެރެއިން ދެވަނައަށް އެންމެ ބޮޑު މަޝްރޫއެވެ. މިހާތަނަށް ހިންގި އެންމެ ބޮޑު މަޝްރޫއަކީ ހިޔާ މަޝްރޫއެވެ.
މި މަޝްރޫއާއި ގުޅޭގޮތުން ވާހަކަދައްކަވަމުން ޕްލޭނިން މިނިސްޓަރ މުހައްމަދު އަސްލަމް ވިދާޅުވީ މިއީ މިހާތަނަށް ސަރުކާރުން ހިންގި ހައުސިން ޕްރޮޖެކްޓުތަކުގެ ތެރެއިން އެންމެ ފެންވަރު ރަނގަޅު ޕްރޮޖެކްޓް ކަމަށެވެ. އަދި މި ސަރުކާރު ހަވާލުވީ ވިނަރެސް ފްލެޓުތަކުުގެ މަސައްކަތް ފެށިތަނާހެންކަން ފާހަގަކުރައްވާ އަސްލަމް ވަނީ އެތަނުގެ މަސައްކަތް ނިމިގެންދިއުމަކީ މި ސަރުކާރުން ކުރި ބުރަ މަސައްކަތުގެ ނަތީޖާކަމަށް ވިދާޅުވެފައެވެ.
މި ދައުރު ހަވާލުވި ޕްރޮޖެކްޓުގެ މަސައްކަތް ކިރިޔާހަމަ ފެށުނީ. އަޅުގަނޑަށް ހައްގު ދައުވާކުރަން މިއީ ވެސް ހަމަ އަޅުގަނޑުމެން މި ސަރުކާުގެ މި ދައުުރުގެ ތެރޭގައި ކުރި މަސައްކަތުގެ ސަބަބުން ހޯދުނު ކާމިޔާބީއެއްކަން. މިހާތަނަށް ރާއްޖޭގައި ސަރުކާރުން ހިންގި މި ބާވަތުގެ ހައުސިންގެ ތެރެއިން އެންމެ ފެންވަރު ރަނގަޅުކޮށް އެންމެ ކޮލިޓީ މަސައްކަތެއް ފެންނަ ޕްރޮޖެކްޓަކީ މި ޕްރޮޖެކްޓްކަން. އަޅުގަނޑު ތަކުރާރުކޮށް ދަންނަވަން މިއަށްވުރެ ރަނަގޅަށް ހިންގިފައި އޮތް ޕްރޮޖެކްޓެއް ސަރުކާރުން ފަށާފައި ނިންމާފައި ނޯންނާނެ،ޕްލޭނިން މިނިސްޓަރ އަހުމަދު އަސްލަމް
މި މަޝްރޫއުގެ މަސައްކަތް ނިންމުމުގައި ޗައިނާގެ ސީއެމްއީސީ ގްރޫޕުން ކުރި ބުރަ މަސައްކަތް ފާހަގަ ކުރައްވައި އަސްލަމް ވަނީ އެ ފަރާތްތަކަށް ޝުކުރު އަދާކުރައްވާފައެވެ. އަދި މި ޕްރޮޖެކްޓުގެ ސަބަބުން ޗައިނާ އާއި ރާއްޖެއާ ދެމެދު އޮތް ގާތް ގުޅުން އިތުރަށް ބަދަހިވެގެންދާނެ ކަމަށް ވެސް އޭނާ ފާހަގަ ކުރެއްވިއެވެ.
ވިނަރެސް ފްލެޓުތައް އެޗްޑިސީއާ ރަސްމީކޮށް ހަވާލުކޮށްފައިވާއިރު އެ ފްލެޓުތަކަށް އެދުމުގެ ފުރުސަތު އަންނަ ޖުލައި މަހު އެ ކުންފުނިން ހުޅުވާލާނެ ކަމަށް ވެސް އަސްލަމް ވިދާޅުވިއެވެ. އަދި އިތުރު ހައުސިން ޕްރޮޖެކްޓުތަކަށް އެދި ކުރިމަތިލާން ވެސް ވަރަށް އަވަހަށް ހުޅުވާލާނެ ކަމަށާއި ސަރުކާރުގެ ހައުސިން މަސައްކަތް ހަލުވިކަމާއެކު ކުރިއަށްދާ ކަމަށް އޭނާ ވިދާޅުވިއެވެ.
އެޗްޑީސީން އަންނަނީ މިހާރުވެސް ވިނަރެސް ފްލެޓުގެ އެޕާޓްމަންޓުތަކެއް އާއްމުންނަށް ދައްކާލަމުންނެވެ. މި ޕްރޮޖެކްޓުގެ ދަށުން ހަދާ ޓަވަރުތަކުގައި މެރީނާ ވިއު އަދި ސްޓޭންޑަޑް ވިއު އެޕާޓްމަންޓުތައް ހުންނައިރު ފްލެޓުތަކުގެ އަގު އުޅެނީ 2.5 މިލިއަން ރުފިޔާ އާއި 3 މިލިއަން ރުފިޔާއާއި ދެމެދުގައެވެ. މި ފައިސާ މަހުން މަހަށް ބަހައިގެން، ނުވަތަ ލޯނު ނަގައިގެން ނުވަތަ އެއްފަހަރާ ވެސް ދެއްކޭނެއެވެ.
ވިނަރެސް ފްލެޓުތައް އާއްމުންނަށް ދޫކުރާއިރު މާލޭގައި އުޅޭތާ 15 އަހަރަށްވުރެ ގިނަ ދުވަސް ވެފައިވާ މީހުންނަށް 100 ފްލެޓް ވަނީ ހާއްސަ ކޮށްފައެވެ.
ވިނަރެސް ފްލެޓްތައް ރަސްމީކޮށް އެޗްޑީސީއާ ހަވާލުކުރުމަށް ބޭއްވި ރަސްމިއްޔާތުގައި ސީއެމްއީސީގެ އިސް ބޭފުޅުން އޮންލައިންކޮށް ބައިވެރިވެލެއްވިއެވެ. މި ހަފްލާ ނިންމަވާލެެއްވުމަށްފަހު ނައިބު ރައީސް ފައިސަލް ނަސީމް ވަނީ ވިނަރެސް ފްލެޓްތައް ބައްލަވާލައްވާފައެވެ.
