ޤައުމުގެ ތަރައްގީގައި ސަރުކާރުގެ ކުންފުނިތަކުގެ ދައުރު ވަރަށް ބޮޑު: ނައިބު ރައީސް
20 ޖޫން 2022 | ހޯމަ 01:27ސަރުކާރު ހިއްސާވާ ކުންފުނިތަކުން ސަރުކާރުގެ ސިޔާސަތު ތަންފީޒު ކުރުމަށް ކުރާ މަސައްކަތަށް ނައިބު ރައީސް ޝުކުރު އަދާ ކުރެއްވި
ރައީސުލްޖުމްހޫރިއްޔާގެ ނައިބު، ފައިސަލް ނަސީމް
ދިވެހިރާއްޖޭގެ ޤައުމީ ތަރައްގީގައި ސަރުކާރުގެ ކުންފުނިތަކުގެ ދައުރު ވަރަށް ބޮޑު ކަމަށް ރައީސުލްޖުމްހޫރިއްޔާގެ ނައިބު ފައިޞަލް ނަސީމް ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، ސްޓެލްކޯގެ 25 ވަނަ އަހަރީ ދުވަހާއި ގުޅުވައިގެން އާދީއްތަ ދުވަހުގެ ރޭ ބޭއްވި ޖަލްސާ ޝަރަފްވެރިކޮށްދެއްވައި ދެއްކެވި ވާހަކަފުޅުގައެވެ. އެ ޖަލްސާގައި ސަރުކާރު ހިއްސާވާ ކުންފުންޏެއްގެ ހައިސިއްޔަތުން ސްޓެލްކޯއިން ކުރަމުން އަންނަ މަސައްކަތްތަކަށް ވެސް ނައިބު ރައީސް ތައުރީފް ކުރެއްވިއެވެ.
ރައީސުލްޖުމްހޫރިއްޔާގެ ނައިބު ވިދާޅުވީ ސަރުކާރުގެ ކުންފުނިތަކުން ކުރަމުންދާ މަސައްކަތްތައް ރާއްޖޭގެ އެކިކަންކޮޅުތަކުން ފެންނަމުންދާކަމަށެވެ. އެގޮތުން ރައްޔިތުންނަށް ބޭނުންވާ އެންމެ އަސާސީ ކަންކަމުން ފެށިގެން ހުރިހާ ޚިދުމަތްތަކެއް ފޯރުކޮށްދިނުމަށްޓަކައި ރެޔާއި ދުވާލު ސަރުކާރު ކުންފުނިތަކުގެ މުވައްޒަފުން ބުރަކޮށް މަސައްކަތްކުރަމުންދާކަން އެމަނިކުފާނު ފާހަގަ ކުރެއްވިއެވެ.
މީގެ އިތުރުން ސަރުކާރުގެ ސިޔާސަތުތައް ތަންފީޒުކޮށް ރައީސުލްޖުމްހޫރިއްޔާގެ ވައުދުތައް ފުއްދުމުގައި ސަރުކާރު ހިއްސާވާ ކުންފުނިތަކުން އަދާ ކުރާ ދައުުރު ފާހަގަ ކުރައްވައި ނައިބު ރައީސް ވަނީ ހުރިހާ ކުންފުންޏަކަށް ޝުކުރު އަދާ ކުރައްވާފައެވެ.
ސްޓެލްކޯގެ ޚިދުމަތްތަކާ ގުޅޭ ގޮތުން ވާހަކަދައްކަވަމުން އެމަނިކުފާނު ވިދާޅުވީ ކަރަންޓުގެ ޚިދުމަތަކީ، ސާފުވައި ބޭނުންވާ ފަދައިން ބޭނުންވާ އަސާސީ ޚިދުމަތެއް ކަމަށާއި 24 ގަޑިއިރު ކަރަންޓުގެ ޚިދުމަތް ނުލިބި އުޅުމަކީ މިއަދު ދަތިކަމެއް ކަމަށެވެ. އަދި ސްޓެލްކޯއިން މި ބޮޑު ޒިންމާ އަދާކުރަމުންދަނީ ވަރަށް ހީވާގި މަސައްކަތްތެރި ޓީމެއް އެކުންފުނީގައި އޮވެގެން ކަމަށާއި ހީވާގި ޓީމެއް އުފެއްދޭނީ ވަރަށް ރަނގަޅު މެނޭޖްމަންޓެއް އޮވެގެން ކަމަށް ވިދާޅުވިއެވެ.
މަސައްކަތާއި ޚިދުމަތުގެ އަގު ވަޒަންކުރުމަކީ މުހިންމު ކަމެއް ކަން ފާހަގަ ކުރައްވައި ނައިބު ރައީސް ވިދާޅުވީ އެކަން ސްޓެލްކޯއިން ފެނިގެންދާކަމަށެވެ. އެ ކުންފުންޏަކީ އިޖުތިމާޢީ ގިނަކަންކަންވެސް ކޮށްދެމުން އަންނަ ކުންފުންޏެއްކަމަށާއި އެމަސައްކަތުގެތެރޭން ނުކުޅެދުންތެރިކަން ހުންނަ އިތުރު ފަރާތްތަކަށް އެހީތެރިކަމާއި އެއްބާރުލުން ދެއްވުމަށްވެސް ރައީސުލްޖުމުހޫރިއްޔާގެ ނައިބު އެދިވަޑައިގެންނެވިއެވެ.
ސްޓެލްކޯގައި މިހާރުވެސް ނުކުޅެދުންތެރިކަން ހުންނަ 35 މުވައްޒަފުން މަސައްކަތް ކުރެއެވެ.
