ރަސޫލާއަށް ފުރައްސާރަކުރުން ކުށްވެރިކުރަން، ބީޖޭޕީން އެޅި ފިޔަވަޅަށް މަރުހަބާ ކިޔަން – އެމެރިކާ

ބީޖޭޕީގެ ދެ އޮފިޝަލަކު ކީރިތި ރަސޫލާ އަށް ފުރައްސާރަކޮށް އިސްލާމްދީނަށް ކުޑައިމީސްކޮށް ވާހަކަ ދެއްކި މައްސަލަ ކުށްވެރިކުރާ ކަމަށާއި، އަދި އެކަމާއި ގުޅިގެން ބީޖޭޕީންއެޅި ފިޔަޅަށް މަރުހަބާ ކިޔާކަމަށް އެމެރިކާއިން ބުނެފިއެވެ.

ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމެއްގައި ސްޓޭޓް ޑިޕާޓްމަންޓުގެ ތަރުޖަމާނު ނެޑް ޕްރައިސް ވިދާޅުވީ ރަސޫލާއަށް ފުރައްސާރަކޮށް ދެއްކި ވާހަކަތާއި، އަދި އެކަމާއި ގުޅިގެން ކުރާ މުޒާހަރާތަކާއި މެދު ކަންބޮޑުވެ އެކަން ކުށްވެރިކުރާ ކަމަށެވެ. އަދި ބީޖޭޕީގެ ދެ އޮފިޝަލުންގެ ވާހަކަތައް ކުށްވެރި ކުރާ ކަމަށާއި، އެކަމާއި ގުޅިގެން އެ ޕާޓީން އެ ދެމީހުންގެ ވާހަކަ ކުށްވެރިކޮށްފައިވާތީ އެކަން ވެސް ބަލައިގަންނަ ކަމަށެވެ.

އިންޑިއާގެ ސަރުކާރުގެ އިސްވެރިންނާއި އަބަދުވެސް މަޝްވަރާތައް ބާއްވާ ކަމަށާއި، ހާއްސަކޮށް އިންސާނީ ހައްގުތަކުގެ ކްނަބޮޑުވުންތަކާއި، އެމީހަކު ބޭނުން ދީނަކަށް މިނިވަންކަމާއެކު އުޅުމުގެ މިނިވަންކަން އަދި އިންސާނީ ހައްގުތަކަށް އިހުތިރާމް ކުރުން ފަދަ ކަންކަމުގެ ވާހަކަ އަބަދުވެސް ދެކެވޭ ކަމަށް ޕްރައިސް ވިދާޅުވިއެވެ.

އެމެރިކާގެ ސެކްރެޓަރީ އޮފް ސްޓޭޓް އެންތަނީ ބްލިންކަން އިންޑިއާއަށް މިދިޔަ އަހަރު ކުރެއްވި ދަތުރާއި ގުޅިގެން ޕްރައިސް ވިދާޅުވީ، އިންޑިއާ އަދި އެމެރިކާ މީހުންގެ ގަބޫލުކުރަނީ އެއް ހަމަތަކެއް ކަމަށެވެ. އެއީ އަދަބު އިހްތިރާމް ކުރުމާއި، ހަމަހަމަކަމާއިއެކު އެމީކު ބޭނުން ދީނަކަށް އުޅުމުގެ މިނިވްނަކަމަށެވެ. އަދި މިއީ ޑިމޮކްރަސީއެއްގައި ހިމެނޭ އަސާސީ ކަންކަން ކަމަށާއި، އެމެރިކާއިން ވާހަކަދައްކާނީ އަބަދުވެސް މުޅިދުނިޔެއަށް ކަމަށެވެ.

ރަސޫލާއަށް ފުރައްސާރަ ކުރި މައްސަލަ އެމެރިކާގެ ސްޓޭޓް ޑިޕާޓްމަންޓުގެ ސަމާލުކަމަށް އައިސް އެކަމާއި ގުޅިގެން އެއްޗެކޭ ބުނެފައިވަނީ އެ މައްސަލައަށް ހަފްތާއެއްވެސްވީ ފަހުންނެވެ. އަދި މިކަމާއި ގުޅިގެން އިންޑިއާގެ އެކި ހިސާބުތަކުގައި މުޒާހަރާތައް ކޮށް، ހަމަނުޖެހުންތައް ވެސް ހިނގަންފެށި ފަހުންނެވެ.

ރަސޫލާއަށް ފުރައްސާރަ ކުރި މައްސަލައިގައި ބީޖޭޕީން ވަނީ އެ ޕާޓީގެ ތަރުޖަމާނު ނުޕުރު ޝަރުމާ އަދި ދިއްލީގެ ޔުނިޓް އޮފީހުން ނަވީން ކުމާރު ޖިންދަލް ވަކިކޮށްފައެވެ.