ތަރިކަ މުދާ ނުހައްގު ގޮތުގައި ބޭނުންކޮށް، އެއަށް އަރައިގަންނަ މީހާއަކީ އީމާންކަން ބަލިކަށި މީހެއްކަމަށް ހުކުރު ޚުތުބާގައި ބުނެފިއެވެ.
މި ހަފްތާގެ ހުކުރު ޚުތުބާ ހާއްސަ ކޮށްފައިވަނީ ވާރުތަ މުދަލަށް ރައްކާތެރިވުމާ ގުޅޭގޮތުންނެވެ. މީހަކު މަރުވުން އޭނާ ދޫކޮށްފައިދާ ތަރިކައަކީ އެ ބަހާނެ އުސޫލުތަކާއި ގަވާއިދުތަކެއް މާތް ﷲ ކަނޑައަޅުއްވާފައިވާ އެއްޗަކަށްވާއިރު އެ އެންގެވި ގޮތަށް ވާރުތަމުދާ ބެހުމަށް ޚުތުބާގައި ވަނީ ބުނެފައެވެ.
ޚުތުބާއި ބުނީ ފަރުޟު ފަސް ނަމާދުގެ ރަކުއަތްތަކާއި އެހެނިހެން ތަފްސީލާއި ޒަކާތް ދައްކަން ޖެހޭ މުދަލުގެ ބާވަތްތަކާއި މިންވަރާއި ރޯދަ އާއި ޙައްޖުގެ ތަފްސީލީ މައުލޫމާތު ޤުރުއާނުގައި ބަޔާންކޮށްފައި ނުވާއިރު ތަރިކަ މުދާ ބަހަން ޖެހޭ ގޮތް ތަފްސީލުކޮށް ބަޔާންކޮށްފައި އޮތުމަކީ ވިސްނަން ޖެހޭނެ ކަމެއް ކަމަށެވެ. މިއީ ހެޔޮ ކަމެއްގެ ގޮތުގައި ކުރަން ޖެހޭ ކަމެއް ނޫން ކަމަށާއި އެ މުދަލަކީ މާތް ﷲ ގެ ޙައްގުތަކުގެ ތެރޭގައި ހިމެނޭ އެއްޗެއް ކަމުން އެ ކަލާނގެ ހައްގަކަށް އަރައިނުގަނެ އެ އެންގެވި ގޮތަށް މުދާ ބަހަން ޖެހޭނެ ކަމަށް ވެސް ވަނީ ބުނެފައެވެ.
އިސްލާމް ދީނުގައި ތަރިކަ މުދާ ބަހަންޖެހޭ ގޮތާ މެދު ދީނުގެ ދުޝްމަނުން އަސާސެއް ނެތް ވާހަކަތައް ދައްކާކަން ފާހަގަކޮށް ޚުތުބާގައި ބުނެފައިވަނީ އެ ކަންކަން މުސްލިމުންގެ ފަރާތުންވެސް މިހާރު ފެންނަމުންދާ ކަމަށެވެ. އެގޮތުން ދީނުގައި މުދާ ބަހާއިރު އަންހެނުންނަށް އަނިޔާވެރިވެފައިވާ ކަމަށް ބުނާ ކަމަށާއި ނަމަވެސް މިއީ ހަގީގަތެއް ނެތް ވާހަކަތަކެއް ކަމަށް ޚުތުބާގައި ވަނީ ބުނެފައެވެ.
ދީނުގައި ވާރިސުންނަށް ތަރިކަ މުދަލުން ލިބޭ މިންވަރު ތަފާތު ވަނީ ޖިންސަކަށް ބަލާފައި ނޫންކަމަށް ޚުތުބާގައި ބުނެއެވެ. އޭގައި ޙިކުމަތެއްވާ ކަން ފާހަގަކޮށް ބުނެފައިވަނީ ފިރިހެނަކަށް ދެބައި ކުޅަ އެއްބައި ލިބެނީ 4 ހާލަތެއް ކަމަށާއި އެއަށްވުރެ ގިނަ ހާލަތްތަކުގައި އަންހެނުންނަށް ލިބޭ މިންވަރު އެއްވަރުވެފައި އަދި އެއަށްވުރެ އިތުރުވެފައި ހުންނަކަމަށެވެ.
އިސްލާމް ދީނުގައި ތަރިކަ މުދާ ބެހުމުގައި އަންހެނުންނާއި ފިރިހެނުން ތަފާތު ކުރާ ކަމަށް ބުނެ ފާޑު ކިޔުމުން ބޭޒާރުވަނީ ތިމާ މީހާކަމަށާއި އެއިން އެނގެނީ އެ މީހެއްގެ ޖާހިލު ކަމާއި އިލްމުގައި ފުންނާބު ތިރިކަން ކަމަށް ވެސް ވަނީ ބުނެފައެވެ.
ތަރިކަ މުދާ ބެހުމުގައި މައްސަލަ އުފެދޭ ކަންތައްތަކެއް ވެސް ހުންނަކަން ޚުތުބާގައި ވަނީ ފާހަގަކޮށްފައެވެ. އޭގެ ތެރޭގައި ޝަރުއު ކުރައްވާފައިވާ މިންވަރަށްވުރެ އިތުރަށް ވަކި ވާރުތަވެރިއަކަށް ނުވަތަ ދަރިއަކަށް ދިނުމާއި ވާރުތަވެރިންނާއި ދަރިންނަށް އެކަން އެނގިފައި ނުވުމާއި މުދަލުގެ މިންވަރާއި ހުރި ތަން ދަރިންނަށް ނޭނގުމާއި މުދާ ބެހުން ފަސް ކުރުން ވެސް ހިމެނެއެވެ.
ބާލިޣުނުވާ ކުޑަކުދިން ތިބުމުން މުދާ ބެހުން ފަސް ކުރުމުގެ ސަބަބުން ކުދިން ހާލުގައި ޖެހި މަގުމަތިވަމުންދާތަން ފެންނަ ކަމަށާއި މުދާ ބެހުން ލަސް ކުރުމުގެ ސަބަބުން ބައެއް ވާރުތަވެރިން މަރުވެ، ވާރިސުންނަކީ ކޮބައިކަން ނޭނގި މުދާ ބަހަން ދަތިވާ ކަމަށް ވެސް ޚުތުބާގައި ބުނެފައިވެއެވެ. މިފަދަ ކަންކަމާހެދި އާއިލާގެ ތެރޭގައި ދެބަސްވުން އުފެދޭ ކަމަށާއި ވާރުތަ މުދާ ބެހުމަށް އަވަސްވެގަތުމަކީ ގާތްތިމާގެ ކަމުގެ ގުޅުން އިތުރަށް ބަދަހިވެ، ގުޅުން ދެމިއޮތުމަށް އެހިވެދޭ ކަމެއް ކަމަށް ވެސް ވަނީ ފާހަގަކޮށްފައެވެ.
ތަރިކަ މުދަލުގައި ޖެހޭ މީހާއަކީ އީމާންކަން ބަލިކަށި މީހެއްކަން ފާހަަގަކޮށް ޚުތުބާގައި ބުނެފައިވަނީ އެ މުދަލުގައި ޖެހެވެނީ އަމިއްލަ އެދުން ބޮޑުވުމާއި ދަހިވެތިކަން އިންތިހާއަށް ދިއުމުން ކަމަށެވެ.
