ވިޔަފާރި ބަނދަރު ބަދަލުކުރަން ގުޅީފަޅު ހިއްކުމަށް، 101 މިލިއަން ޔޫރޯގެ ފައިނޭންސިންގ ފެސިލިޓީގެ އެއްބަސްވުމެއްގައި ސޮއިކޮށްފި

ގުޅީފަޅަށް މާލޭގެ ވިޔަފާރި ބަނދަރު ބަދަލުކުރުމަށްޓަކައި ބޭނުންވާ ބިން ހިއްކުމުގެ މަޝްރޫއު – ފޭސް 2ށް 101 މިލިއަން ޔޫރޯގެ ފައިނޭންސިންގ ފެސިލިޓީ އެއްބަސްވުމެއްގައި ދިވެހި ސަރުކާރުން ސޮއިކޮށްފިއެވެ.

ފިނޭންސް މިނިސްޓްރީން ބުނީ، ގުޅީފަޅު ބިންހިއްކުމުގެ މަޝްރޫއު – ފޭސް2ށް ބޭނުންވާ ފައިނޭންސިންގ ފޯރުކޮށްދިނުމަށްޓަކައި 101،787،500 (ސަތޭކަ އެއްމިލިއަން ހަތްލައްކަ އަށްޑިހަ ހަތްހާސް ފަސްސަތޭކަ) ޔޫރޯ ލޯނުގެ ފެސިލިޓީ އެއްބަސްވުމެއްގައި، ދިވެހި ސަރުކާރާއި އޭބީއެން އަމްރޯ ބޭންކާއި، އޭކޭއޭ ބޭންކް އަދި އައިއެންޖީ ބޭންކުގެމެދުގައި ބުރާސްފަތި ދުވަހު ސޮއިކޮށްފައިވާ ކަމަށެވެ. ދިވެހި ރުފިޔާއިންނަމަ މިއީ 1,629,285,314.88 (އެއް ބިލިއަން ހަސަތޭކަ ނަވާވީސް މިލިއަން ދެލައްކަ އަށްޑިހަ ފަސްހާސް ތިންސަތޭކަ ސާދަ ރުފިޔާ، އަށްޑިހަ އަށް ލާރި)އެވެ.

މި އެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވީ މިނިސްޓަރ އޮފް ފިނޭންސް އިބްރާހިމް އަމީރެވެ. އަދި އައިއެންޖީއާއި އޭކޭއޭ އެކްސްޕޯޓް ކްރެޑިޓް ބޭންކުގެ ފަރާތުން ސޮއިކުރެއްވީ އައިއެންޖީ ބޭންކުގެ ޑިރެކްޓަރ ވިލެމް ވެން ނުއަސްއެވެ. އައި އޭބީއެން އަމްރޯ ބޭންކުގެ ފަރާތުން ސޮއިކުރެއްވީ އެ ބޭންކުގެ އެގްޒެކްޓިކް ޑިރެކްޓަރ، ހެޑް އޮފް އެކްސްޕޯޓް ފައިނޭންސް، ޔޫސްޓް ކިސާރސްއެވެ.

މި މަޝްރޫއުގެ މައިގަނޑު ބޭނުމަކީ، ގުޅީފަޅު ހިއްކައި ގުޅީފަޅުގައި އައު ޕޯޓެއް ތަރައްގީކޮށް، މިހާރު މާލޭގައި ބޭނުންކުރަމުންދާ މާލޭ އިންޓަރނޭޝަނަލް ޕޯޓް، ގުޅީ ފަޅަށް ރިލޮކޭޓް ކުރުމެވެ. މި މަޝްރޫއުގެ ސަބަބުން ކުރިމަގުގައި ރާއްޖޭގެ އިގުތިސާދަށް އެކަށީގެންވާވަރުގެ ޕޯޓެއް ގާއިމްކުރެވިގެންދާނެއެވެ.

އަދި މީގެ އިތުރުން މިހާރު މާލޭގެ ބަނދަރަށް ދިމާވެފައިވާ ތޮއްޖެހުމުގެ މައްސަލަ ހައްލުކުރެވި، މާލޭގެ އެތެރޭގެ ޓްރެފިކް ފްލޯއަށް ލުއިލިބޭނެއެވެ. އަދި މާލޭގެ ބިމުގެ ޖާގަ އިތުރުކުރެވިގެންދާނެ ކަމަށްވެސް ފިނޭންސް މިނިސްޓްރީން ބުނެއެވެ. މި މަޝްރޫއުގެ ސަބަބުން، ރާއްޖޭގެ އިގުތިސާދު ކުރިއެރުވުމަށާއި، ރާއްޖޭގެ އިގުތިސާދީ ހަރަކާތްތައް އިތުރުކުރުމަށް ފުރުސަތު ފަހިވެގެންދާނެކަމަށް ފިނޭންސް މިނިސްޓްރީން ބުނެއެވެ.

އެ މިނިސްޓްރީން ބުނީ، މި މަޝްރޫއަކީ 2019-2023ށް ހެދިފައިވާ ސްޓްރެޓެޖިކް އެކްޝަން ޕްލޭންގައިވާ ގޮތުގެ މަތިން ގްރޭޓަރ މާލެ ތަރައްގީ ކުރުމުގެ ޕްލޭންގެ މުހިންމު މަޝްރޫއެއްކަމަށެވެ. މި އެއްވަސްވުމުގައި ސޮއިކުރުމުގެ ރަސްމިއްޔާތުގައި މިނިސްޓަރ އޮފް ނެޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރ މުހައްމަދު އަސްލަމާއި ފިނޭންސް މިނިސްޓްރީންގެ އިސްވެރިން ބައިވެރިވެވަޑައިގަތެވެ.

މާލޭ ވިޔަފާރި ބަނދަރުގެ މާސްޓަރ ޕްލޭން ވަނީ ހަދާފައެވެ. އަދި ޑީޓެއިލް ޑިޒައިންއާ ހަމައަށް އާދެވިފައިވާއިރު، ކޮންޓްރެކްޓަރެއް ފައިނަލްކުރުމުގެ މަސައްކަތް މީގެކުރިން އެމްޕީއެލްއިން ކޮށްފައިވެއެވެ.

މަޖިލީހުގެ އެންވަޔަރްމެންޓް އެންޑް ކްލައިމެޓް ޗޭންޖް ކޮމެޓީގައި ވާހަކަ ދައްކަވަމުން ޕްލޭނިން މިނިސްޓަރު އަސްލަމް މީގެ ކުރިން ވިދާޅުވީ، މާލޭގެ ވިޔަފާރި ބަނދަރު މިހާރު ތޮއްޖެހި ޖާގައިގެ ދަތިކަން ވަރަށް ބޮޑަށް ކުރިމަތިވަމުންދާ ކަމަށާއި، ޖާގަ ބޮޑުކުރެވެންވެސް ނެތްކަމަށެވެ. އެގޮތުން ވިޔަފާރި ބަނދަރު އެހެން ސަރަހައްދަކަށް ބަދަލުކުރަންޖެހޭ ކަމަށާއި، އެންމެ އެކަށީގެންވާ ސަރަހައްދަކަށް ފެނުނީ ގުޅީފަޅުކަމަށް އަސްލަމް ވިދާޅުވިއެވެ.

މީގެ އިތުރުން އަސްލަމް ވިދާޅުވީ، ތިލަފުއްޓަށް ވިޔަފާރި ބަނދަރު ބަދަލު ކުރުމަށް މަޝްވަރާތައް ކުރެވި އެސަރަހައްދުން ބަލަންޖެހޭ ކަންކަން ބެލިކަމަށެވެ. ނަމަވެސް ތިލަފުއްޓަކީ ކުނިނައްތާލުމުގެ މަސައްކަތްކުރާ ބިމަކަށްވުމާއެކު މިފަދަ ކަމެއް ކުރުމަކީ އެންމެ އެކަށީގެންވާ ސަރަހައްދެއް ނޫންކަމަށް އަސްލަމް ވިދާޅުވިއެވެ.

ތިލަފުށީގައި އެކަހަލަ ކަންތައްތަކެއް ނުވެސް ކުރެވޭނެ ކަމަށާއި، އެސަބަބަށްޓަކައި، ގްރޭޓަރ މާލެ ރީޖަންގައި އޮތްތަނަކީ ގުޅީފަޅުކަމަށް ފެނިވަޑައިގަންނަވާ ކަމަށް މިނިސްޓަރ އަސްލަމް ވަނީ ވިދާޅުވެފައެވެ. އަދި މިހާރުވެސް ކޮންމެވެސް ވަރަކަށް ބިމެއް ހިއްކާފަ އޮތްނަމަވެސް، އެއީ އެންމެ އެކަށީގެންވާ ބިމެއް ނޫންކަމަށާއި، އިތުރަށް ބިން ހިއްކަން ޖެހޭކަމަށް ވިދާޅުވިއެވެ.

މިނިސްޓަރު އަސްލަމް ވިދާޅުވީ، މިޕްރޮޖެކްޓްގެ ތެރެއިން، މާލޭ ނޯޓު ހާބަރުގައި މިހާރު ދެމުން އަންނަ ޚިދުމަތްތައް ގުޅީފަޅަށް ބަދަލު ކުރެވޭނެ ކަމަށެވެ. އޭގެ ތެރޭގައި ގުދަންތަކާއި ހޯލްސޭލް ފިހާރަތަކަށް ބޭނުންވާ ބިން ހިމެނޭކަން މިނިސްޓަރު ފާހަގަކުރެއްވިއެވެ.

މީގެ އިތުރުން މިނިސްޓަރު އަސްލަމް ވިދާޅުވީ، މި މަސައްކަތްތައް ކުރުމަށް ހަދަންޖެހޭ މާސްޓަރ ޕްލޭން ހެދުމުގެ މަސައްކަތް ބަޔަކާ ހަވާލުކޮށްގެން ކުރިއަށް ގެންދާކަމަށެވެ. އަދި ގުޅީފަޅު ހިއްކުމުގެ ޕްރޮޖެކްޓަށް އެންމެ އަގު ބޮޑު ރޭޓުން ބަލާނަމަ 120 މިލިއަން ޑޮލަރު އަރާނެ ކަމަށާއި، ނަމަވެސް ނަމަވެސް ތަންކޮޅެއް ކައިރިން ވެލި ނެގޭނަމަ 100 މިލިއަން ޑޮލަރަށް އަގުހެޔޮވާނެކަމަށް މިނިސްޓަރު އަސްލަމް މަޖިލީހުގެ ކޮމިޓީގައި މީގެ ކުރިން ވިދާޅުވެފައިވެއެވެ.