އެންދަމަން ފީނާ މަސްވެރިންނަށް ޑައިވިންގ ޕްރޮގްރާމެއް ހިންގަނީ
16 ޖޫން 2022 | ބުރާސްފަތި 10:54ފުރަތަމަ ފިޔަވަހީގައި ކޯސްތައް އޮންނާނީ ގއ އަދި ގދ ގެ ރަށްތަކުގައި
މަސްވެރި ޑައިވަރުން ތަމްރީނުކުރުމުގެ ފަހުމުނާމާގައި ސޮއިކުރުން
މަސްވެރިންނަށް އަމާޒުކޮށްގެން، މިފްކޯއާއި މަސްވެރިންގެ ޖަމްއިއްޔާ ގުޅިގެން ޚާއްސަ ޑައިވިންގ ޕްރޮގްރާމެއް ފަށަން ނިންމައިފިއެވެ.
މިފްކޯއިން ނެރުނު ނޫސްބަޔާނުގައި ބުނީ "މިފްކޯ މަސްވެރި ޑައިވަރުން ޕްރޮގްރާމް"ގެ ނަމުގައި ކުރިއަށް ގެންދާ މި ޕްރޮގްްރާމްގެ މައިގަނޑު އަމާޒަކީ، މަސްވެރިންގެ ތެރެއިން އެންދަމަން ފީނާ ފަޅުވެރިންނަށް ބޭނުންވާ ތަމްރީނުތައް ދިނުންކަމަށެވެ.
ޑައިވްކުރާއިރު ދިމާވާ ހިތާމަވެރި ހާދިސާތައް މަދުކުރުމަށް ކުރެވިދާނެ ކަންކަމާ ގުޅޭގޮތުން، މަސްވެރިންނާއި ކެޔޮޅުން އަދި އޮޑިވެރިން ވެސް ހިމަނައިގެން، ހޭލުންތެރިކުރުމުގެ ޕްރޮގްރާމެއްވެސް ބާއްވާނެ ކަމަށާއި، ފީނައިގެން އެންދަމާ މަސްވެރިންނަށް ހިންގާ ގައުމީ މި ޕްރޮގްރާމްގެ ފުރަތަމަ ފިޔަވަހީގައި ކޯސްތައް އޮންނާނީ ގއ އަދި ގދ ގެ ރަށްތަކުގައި ކަމަށް މިފްކޯއިން ބުނެއެވެ.
އޯޕަން ވޯޓަރ ޑައިވިންގ، އެޑްވާންސް އޯޕަން ވޯޓަރ ޑައިވިންގ، ރެސްކިއު އަދި އިމަޖެންސީ ފަރސްޓް ރެސްޕޮންޑަރ ކޯސް، މި ޕްރޮގްރާމްގެ ދަށުން ފެށުމަށް ވަނީ ހަމަޖެހިފައެވެ.
މިފްކޯއިން އިތުރަށް ބުނީ، ޕްރޮގްރާމްގެ ނަތީޖާއަކީ ޑައިވިންގއާގުޅޭ ގިނަ މައުލޫމާތުތަކެއް މަސްވެރިންނަށް ދަސްވުން ކަމަށާއި، ކުޑަ ޚަރަދަކާއެކު، އަމިއްލަ ރަށުގައި ހުރެގެން މި ކޯސްތަކުގައި ބައިވެރިވުމަކީ މި ޕްރޮގްރާމުގައި ބައިވެރިވާންޖެހޭ މުހިންމު ސަބަބެއް ކަމަށެވެ.
މިފްކޯއިން ބުނީ، އެންދަމަން ފީނާ ފަޅުވެރިންނަށް ބޭނުންވާ ތަމްރީނުތައް ދިނުމުން، ޑައިވިންގގައި ދިމާވާ ހާދިސާތަކުން ރައްކާތެރިވާން ދަސްވެ، އަވަސް ފަރުވާ ދޭނެގޮތް މަސްވެރިންނަށް އެނގިގެންދާނެ ކަމަށެވެ.
