އިންޑިއާއިން ޔޫއޭއީއަށް ގަންނަ ގޮދަނާއި ގޮދަން ފުށް އެހެން ޤައުމުތަކަށް އެކްސްޕޯޓް ކުރުމާއި ރީއެކްސްޕޯޓް ކުރުން 4 މަސް ދުވަހަށް މަޑުޖައްސާލަން އެ ޤައުމުން ނިންމައިފިއެވެ.

ޔޫއޭއީގެ އިކޮނޮމިކް މިނިސްޓްރީން ބުދަ ދުވަހު މިގޮތަށް ނިންމީ އިންޑިއާއިން ގޮދަނުގެ ބާވަތްތައް އެކްސްޕޯޓް ކުރުން މަޑުޖައްސާލަން ނިންމި ނިންމުމާ ގުޅިގެންނެވެ. އެހެންވެ، ޔޫއޭއީގެ މި ނިންމުމާއެކު އެ ޤައުމު މެދުވެރިކޮށް އިންޑިއާގެ ގޮދަން އެހެން ޤައުމުތަކަށް ވިއްކުން މަނާވާނެއެވެ.

އިންޑިއާއިން ގޮދަން އެކްސްޕޯޓް ކުރުން މެދުކަނޑާލީ މިދިޔަ މެއި މަހުގެ 14 ވަނަ ދުވަހުން ފެށިގެންނެވެ. އެކްސްޕޯޓް މެދުކަނޑާލި ނަމަވެސް ފުޑް ސެކިއުރިޓީ ބޭނުންވާ ޤައުމުތަކަށާއި އެ ޤައުމުން ލެޓަރ އޮފް ކްރެޑިޓް ދީފައިވާ ޤައުމުތަކަށް އެކްސްޕޯޓް ކުރާނެއެވެ. އެގޮތުން މިހާތަނަށް 469،202 ޓަނުގެ ގޮދަން އެ ޤައުމުން ވަނީ އެކްސްޕޯޓް ކޮށްފައެވެ.

ޔޫއޭއީން ބުނި ގޮތުގައި އެ ޤައުމުން އެކްސްޕޯޓް ކުރުން މަނާ ކުރަނީ ގޮދަނުގެ ހުރިހާ ބާވަތެކެވެ. އަދި މި ފިޔަވަޅު އަޅާފައިވަނި މެއި 13 އިން ފެށިގެން އެ ޤައުމަށް އެތެރެކޮށްފައިވާ ބާވަތްތަކަށް ކަމަށްވެސް ވަނީ ބުނެފައެވެ.

މެއި 13 ގެ ކުރިން ޔޫއޭއީއަށް އިންޑިއާއިން އެތެރެކޮށްފައިވާ ގޮދަނުގެ ބާވަތްތައް އަދިވެސް އެކްސްޕޯޓް ކުރެވޭނެއެވެ. ނަމަވެސް އެކްސްޕޯޓް ކުރުމުގެ ކުރިން އިކޮނޮމިކް މިނިސްޓްރީގެ ހުއްދައަށް އެދެން ޖެހޭނެ ކަމަށް އެ މިނިސްޓްރީން ވަނީ ބުނެފައެވެ. ހުއްދައަށް އެދޭއިރު އެ ޝިޕްމަންޓަކާ ބެހޭ ހުރިހާ ތަފްސީލެއް އެނގޭ ލިޔެކިޔުންތައް ހުށަހަޅަންވެސް ވަނީ އަންގާފައެވެ.

ދުނިޔޭގައި ދެވަނައަށް އެންމެ ގިނަ އަދަދަކަށް ގޮދަންފުށް އެކްސްޕޯޓްކުރާ ގައުމު، އިންޑިއާއިން ގޮދަން ފުށް އެކްސްޕޯޓްކުރުން މަނާކުރީ އެގައުމަށް އައި ހީޓް ވޭވް އަކާއެކު ސަޕްލައިއަށް ކުރި އަސަރާއެކު ގައުމުގެ އެތެރޭގައި ގޮދަން ފުށުގެ އަގު ވަރަށް ބޮޑަށް އުފުލުމާ ގުޅިގެންނެވެ. އިންޑިއާގެ މި ނިންމުމާއެކު ދުނިޔޭގެ ބާޒާރުގައި ގޮދަން ފުށުގެ އަގު ވަރަށް ބޮޑަށް އުފުލިގެންދިޔައެވެ.