ރާއްޖޭގެ ފުރަތަމަ ޖައްވީ މިޝަންގައި މޫސުމަށް އަންނަ ބަދަލުތައް ދެނެގަތުމަށް ސެޓެލައިޓެއް
މި މިޝަނުގައި ހަދާ ޕްރޮޓޯޓައިޕް ސެޓެލައިޓް ހަދާނީ ހުޅުމާލޭގައި
އެޗްޑީސީ
ރާއްޖޭގެ ފުރަތަމަ ޖައްވީ މިޝަންގެ ބޭނުމަކީ ދުނިޔެ ހޫނުވުމާއި މޫސުމަށް އަންނަ ބަދަލުތައް ދެނެގަތުމަށް ބޭނުންވާ މައުލޫމާތު އެއްކުރަން ޕްރޮޓޯޓައިޕް ސެޓްލައިޓެއް ހަދައި އެ ޓެސްޓް ކުރުން ކަމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ބުނެފިއެވެ.
މި މިޝަނަކީ އިންސްޓިޓިއުޓް ފޮރ ގްލޯބަލް ސަކްސެސް (އައިޖީއެސް) އިން ކުރިއަށްގެންދާ ހަރަކާތެކެވެ. މި ހަރަކާތުގެ މެއިން ޕާޓްނަރެއްގެ ގޮތުގައި އެޗްޑީސީ ހަމަޖައްސާފައި ވަނީ 27 ފެބްރުއަރީ 2022 ގައެވެ.
މިމިޝަނާއި ގުޅެގޮތުން އެޗްޑީސީން އާއްމުކުރި ވީޑިއޯއެއްގައި އައިޖީއެސްގެ ޗެއާމަން އަދި ސީއީއޯ ރިފްއަތު މުޙައްމަދު ވިދާޅުވީ މިއީ ތާރީޚީ މިޝަނެއް ކަމަށެެވެ. އަދި މިއީ މުސްތަޤުބަލަށް މުހިންމު މަސައްކަތެއް ކަމަށާއި މީގެ ސަބަބުން ބައިނަލްއަޤުވާމީ ގޮތުން ރާއްޖޭގެ ހައިބަތު އިތުރަށް އުފުލޭނެ ކަމަށް ވެސް އޭނާ ވިދާޅުވިއެވެ.
އެޗްޑީސީން މައުލޫމާތު ދޭ ގޮތުގައި މި މިޝަންގައި ތައްޔާރު ކުރާ ޕްރޮޓޯޓައިޕް ސެޓެލައިޓް ބިނާ ކުރާނީ ހުޅުމާލޭގައެވެ. އަދި ސެޓެލައިޓް ލޯންޗު ކުރަން ހަމަޖެހިފައިވަނީ ބޭރުގެ ޖައްވީ އިދާރާތަކާއި ގުޅިގެން ކަމަށް ވެސް އެޗްޑިސީން ބުނެއެވެ.
އެ ކުންފުނިން ބުނީ ރާއްޖޭގައި ވެސް ދުނިޔޭގެ ފެންވަރުގެ އެކި ހުނަރުތައް ދިވެހި ޒުވާނުން ދައްކަމުން އަންނަ ކަމަށާއި ޓެކްނޮލޮޖީގެ ދާއިރާގައި ދުނިޔޭގެ ނަން މަޝްހޫރު ކުންފުނިތަކާއި އެއް ފެންވަރުގެ އެޕްލިކޭޝަންތައް ދިވެހިންވެސް ތަރައްޤީކޮށްފައިވާ ކަމަށެވެ. އަދި ދިވެހި ޒުވާނުންގެ މިފަދަ އިސްނެގުންތަކަށް އެޗްޑީސީން އަބަދުވެސް މަރުހަބާ ކިޔާނެ ކަމަށާއި ދެވެން އޮތް ހުރިހާ އެއްބާރުލުމެއް ދޭނެ ކަމަށް ވެސް އެ ކުންފުނިން ބުނެއެވެ.
