އިންޑިއާގެ އިދިކޮޅު ލީޑަރު ސޯނިއާ ގާންދީ އެޑްމިޓްކޮށްފި
13 ޖޫން 2022 | ހޯމަ 02:04ކޮންގްރެސް ޕާޓީން ބުނި ގޮތުގައި ސޯނިއާ ގާންދީ އެޑްމިޓް ކުރީ ކޮވިޑާ ގުޅިގެން ދިމާވި ސިއްހީ މައްސަލަތަކަކަށް ފަރުވާ ދިނުމަށް
ސޯނިއާ ގާންދީ
އިންޑިއާގެ ކޮންގްރެސް ޕާޓީގެ ލީޑަރު ސޯނިއާ ގާންދީ ނިއު ދިއްލީގެ ސަރ ގަންގާ ރާމް ހޮސްޕިޓަލުގައި އެޑްމިޓްކޮށްފިއެވެ.
އާދީއްތަ ދުވަހު ކޮންގްރެސް ޕާޓީން ނެރުނު ބަޔާނެއްގައި ބުނީ ސޯނިއާ ގާންދީ އެޑްމިޓް ކޮށްފައިވަނީ ކޮވިޑާ ގުޅިގެން ދިމާވި ސިއްހީ މައްސަލަތަކަކަށް ފަރުވާ ހޯދަން ކަމަށެވެ. އެކަމާ ގުޅޭ އިތުރު ތަފްސީލެއް އެ ބަޔާނުގައި ބުނެފައެއް ނުވެއެވެ.
ރޮއިޓާސް އިން ރިޕޯޓްކޮށްފައިވާ ގޮތުގައި ފާއިތުވި އަހަރުތަކުގައި ސޯނިއާ ގާންދީގެ ސިއްހީ ހާލަތާ ގުޅިގެން އޭނާ ވަނީ އެކި ފަހަރު އެމެރިކާގައި ވެސް ފަރުވާ ހޯދައިފައެވެ.
ސޯނިއާ ގާންދީ އެޑްމިޓް ކޮށްފައިވާއިރު މި މަހުގެ ތެރޭގައި އޭނާ އާއި އޭނާގެ ދަރިފުޅު ރާހުލް ގާންދީގެ މައްޗަށް ވަނީ މަނީ ލޯންޑަރިންގެ ތުހުމަތު ކޮށްފައެވެ.
ސޯނިއާ ގާންދީއަކީ އިންޑިއާގެ ކުރީގެ ބޮޑުވަޒީރު ރާޖީވް ގާންދީގެ ހުވަފަތް އަނބިކަނބަލުންނެވެ.
