ކަނޑުފަޅުތައް ހިމާޔަތް ކުރުމުގައި ޗައިނާގެ މަސްނޫއީ ފަރުތަކާއި ފާތައް!

ބައިނަލްއަގުވާމީ ފެންވަރުގައި ފާހަގަ ކުރާ، ދުނިޔޭގެ ކަނޑުތަކުގެ ދުވަހަކީ، މީހުންގެ މެދުގައި ކަނޑުފަޅަށް ހޭލުންތެރިކަން އިތުރު ކުރުމުގެ ގޮތުން ޗައިނާގައި ގައުމީ ފެންވަރުގައި ހަރަކާތްތަކެއް ހިންގާ ދުވަހެއްވެސްމެއެވެ. މި އަހަރަކީ ޗައިނާއިން އެ މަސައްކަތް އެ ގޮތަށް ކުރަމުންދާތާ 15 ވަނަ އަހަރެވެ. މަގުސަދަކީ ޗައިނާގެ މުއްސަނދި ކަނޑުފަޅުގެ ދިރުންތަކާއި އައްސޭރިފަށް ހިމާޔަތް ކުރުމެވެ.

ޗައިނާގެ ގުއާންގްޝީ ޝުއާންގް އޮޓޮނޮމަސް ރީޖަންގައި އޮންނަ ވެއިޝޫ އައިލަންޑްގެ ކަނޑުގެ ސަރަހައްދަކީ މިމަސައްކަތުގައި ޗައިނާގެ ރަމްޒެކެވެ. ސައެންސްވެރިން ވަނީ މަސްނޫއީ ފަރުތަކެއް ބޭނުން ކޮށްގެން، 200 އެއްހާ މުރަކަ ބަގީޗާ ހައްދާފައެވެ. އެ ސަރަހައްދުގައި 2 ލައްކައެއްހާ މުރަކަ އާލާކޮށްފައިވާ އިރު، ދުނިޔެ ހޫނުވުމާއި އާދަޔާ ހިލާފު ގަދައަށް މަސްވެރިކަން ކުރުމުގެ ސަބަބުން ހަލާކުވެފައިވާ 8 ހެކްޓަރުގެ ފަރުގެ ހިތްގައިމުކަން އިޔާދަ ކުރެވިދާނެ ކަމުގެ އުއްމީދު ވަނީ ބޮޑުވެފައެވެ.

މިއީ ޗައިނާގެ ކަނޑުގެ ސަރަހައްދުގެ ދިރުންތައް ހެޔޮ ގޮތުގައި ދަމަހައްޓާ، ފަރުތަކުގެ ދިރުންތައް އަލާ ކުރުމަށް އެ ގައުމުން ހިންގާ މަޝްރޫއުގެ ބައެކެވެ.

ޗައިނާއިން ވަނީ ތިމާވެށި ހެޔޮ ފާލަކަށް އެޅުވުމަށްޓަކާ، 58 "ބްލޫ ބޭ" މަޝްރޫއު ލޯންޗް ކޮށްފައެވެ. އައްސޭރިފަށުގެ ސަރަހައްދުތައް ހިމާޔަތް ކުރުމަށް 24 މަޝްރޫއެއް ފަށާފައިވާއިރު، ވެށީގެ ދިރުންތައް ހިމާޔަތް ކުރުމަށް 61 މަޝްރޫއެއް ފަށާފައިވެއެވެ. މީގެ އިތުރުން ނޭޗާ ޕާކުތަކާއި ކަނޑުޕާކުތަކުގެ ގޮތުގައި ކަނޑުގެ ދިރުންތަކާއި ވެށީގެ ނިޒާމް ހިމާޔަތް ކުރުމުގެ ގޮތުން، އިތުރު 50 މަޝްރޫއެއް ހިންގައެވެ.

މިފަދަ މަޝްރޫއުތަކުގެ މައިގަނޑު އަމާޒަކީ ނެތެމުންދާ ގުދުރަތީ، ފާތަކާއި ކުޅިތަކާއި، މުރަކަ ބަގީޗާތަކާއި މޫދު ވިނައިގެ ސާލުތައް އިޔާދަކޮށް ދެމެހެއްޓުމެވެ.

ޗައިނާގެ މިނިސްޓްރީ އޮފް ނެޗުރަލް ރިސޯސަސްގެ މެރިން އާލީ ވޯނިންގް އެންޑް މޮނިޓަރިންގްގެ ޑައިރެކްޓަރ، ވޭންގް ހުއާ ވިދާޅުވީ، ވެށީގެ ދިރުންތަކުގެ ރައްކާތެރިކަން ކަށަވަރު ކުރުމަށްޓަކާ، ޒަމާނީ ޓެކްނޮލޮޖީ ބޭނުން ކޮށްގެން އެއްގަމާއި ކަނޑާއި ވައިގެ މަގުން މޮނިޓަރިންގް މަސައްކަތް ކުރިއަށް ދާކަމަށެވެ.

ޗައިނާއަކީ ކަނޑުގެ އައްސޭރިފަށުގެ ސަރަހައްދުތަކުގައިވާ ކަނޑުފާކުޅީގެ ޖަންގަލިތަކުގެ ސަރަހައްދު އިތުރު ކުރި މަދު ގައުމުތަކުގެ ތެރޭގައި ހިމެނޭ ގައުމެކެވެ. ޗައިނާގެ އައްސޭރިފަށުގެ ސަރަހައްދުން ފެނިފައިވާ ކަނޑުގެ ދިރުންތަކުގެ އަދަދު މިހާރު ވަނީ 28000 އަށް ވުރެ މައްޗަށް އަރާފައެވެ.