ސުއީ ދާގާ މޭޑްއިން އިންޑިއާ ޕްރޮމޯޓު ކުރުމުގައި ވަރުން އާއި އަނުޝްކާ

އަންނަ ސެޕްޓެމްބަރު މަހުގެ 28 ގައި ސިނަމާތަކަށް އަންނަ ސުއީ ދާގާ މޭޑް އިން އިންޑިއާގައި ޕްރޮމޯޓު ކުރުމަށް އެ ފިލްމުގެ ލީޑު ދެ ތަރިން ކަމުގައިވާ ވަރުން ދާވަންއާއި އަނުޝްކާ ޝަރުމާ ފަށައިފިއެވެ.

މިފިލްމަކީ ވަރުން އާއި އަނުޝްކާ އެކުގައި ކުޅޭ ފުރަތަމަ ފިލްމެވެ. އިންޑިއާގެ ކޮޓެޖް އިންޑަސްޓްރީގެ މައްޗަށް ބިނާކޮށް ހަދާފައިވާ މި ފިލްމަކީ އިންޑިއާގެ ބައްޕަ ކަމުގައި ބުނާ މަހާތުމާ ގާންދީ އަށް ހާއްސަކޮށްގެން އުފައްދާ ފިލްމެކެވެ. މި ފިލްމުގައި ވަރުން ވެސް އަދި އަނުޝްކާ ވެސް ފެންނާނީ ހެދުން ފަހާ މީހެއްގެ ގޮތުގައެވެ. ފިލްމުގެ ޝޫޓިން ފެށުމުގެ ކުރިން އެ ދެ ތަރިން ވެސް ވަނީ ފަހަން ދަސްކޮށްފައެވެ.

ސުއި ދާގާ މޭޑް އިން އިންޑިއާ ޕްރޮމޯޓު ކުރުމަށް ވަރުންއާއި އަނުޝްކާ އިންޑިއާގެ 10 ސިޓީއަކަށް ޒިޔާރަތްކޮށް ފިލްމު ޕްރޮމޯޓު ކުރުމުގެ މަސައްކަތް ކުރާނެއެވެ. އޭގެ ތެރޭގައި ހިމެނެނީ އިންޑިއާގެ އަހުމަދު އާބާދާއި، ދިއްލީ އާއި ކޮލްކަތާ އާއި، ލަކްނޫ އާއި ޖައިޕޫރާއި، އިންޑޯ އާޢި، ޕޫން އާއި، ޗަންދިގަޅް އެވެ.

ފިލްމުގެ ޝޫޓިން މިހާރު އެއްކޮށް ނިންމާލެވިފައިވާ އިރު ޓްރެއިލާ ވަރަށް އަވަހަށް އާންމު ކުރާނެ ކަމަށް ޚަބަރުތައް ބުނެއެވެ.

މި ފިލްމުގެ ޕްރޮޑިއުސަރ މަނީޝް ޝަރުމާ ބުނީ ފިލްމު ޕްރޮމޯޓު ކުރުމަށް ވަރުން އާއި އަނުޝްކާ އެކި ސިޓީތަކަށް ގޮސް އެމީހުން އެފިލްމު ގައި ކޮށްފައިވާ ބައެއް އެކްޓްތައް އާންމުންނަށް ދައްކާލާނެ ކަމަށެވެ.