މާލެ ސަރަހައްދުގައި ދިރިއުޅޭ ރައްޔިތުން ޕިކްނިކް ދިއުމަށް ކަނޑައަޅާފައިވާ ކުޑަގިރީގައި ކަރަންޓް ކޭބަލް އެޅުމުގެ މަސައްކަތް ނިންމާލައިފިއެވެ.

ބުދަ ދުވަހު ސްޓެލްކޯއިން ބުނީ ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހުގެ ވައުދުފުޅާ އެއްގޮތަށް ކުޑަގިރީގައި ކަރަންޓް ޑިސްޓްރިބިއުޝަން ނެޓްވޯރކް ގާއިމްކުރުމަށް ބޭނުންވާ 3000 މީޓަރުގެ ކޭބަލް ވަޅުލައި ނިމިފައިވާ ކަމަށެވެ. މި މަސައްކަތް އެ ކުންފުނިން ފެށީ 26 މެއި 2022ގައެވެ.

ސްޓެލްކޯއާ ސަރުކާރުން ހަވާލު ކޮށްފައިވަނީ ކުޑަގިރީގެ މަގުބައްތި ޖެހުމާއި ކަރަންޓް ޑިސްޓްރިބިއުޝަން ނެޓްވޯރކް އެޅުމުގެ މަސައްކަތެވެ. އެ މަސައްކަތްތައް 15 ދުވަހުގެ ތެރޭގައި ނިންމާލެވޭނެކަމަށް އެ ކުންފުނިން ލަފާކުރެއެވެ.

ކުޑަގިރިއަކީ މާލެ ސަރަހައްދުގައި ދިރިއުޅޭ ރައްޔިތުން ޕިކްނިކް ދިއުމަށް ރަށެއް ތަރައްގީކުރައްވާނެކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ވެވަޑައިގެންނެވި ވައުދުގެ ދަށުން ތަރައްގީކުރަމުން އަންނަ ރަށެކެވެ. އެ ރަށުގެ މަސައްކަތް ސަރުކާރުން ހަވާލުކުރީ އެމްޓީސީސީއާއެވެ. ނަމަވެސް އެ ރަށުގެ ކަރަންޓް ޑިސްޓްިބިއުޝަންގެ މަސައްކަތް ސްޓެލްކޯއާ ހަވާލުކޮށްފައިވާއިރު ފެނަކައިން ވަނީ އެ ރަށުގައި މިސްކިތެއް އަޅަން ބިންގާވެސް އަޅައިފައެވެ.

ޕިކްނިކް އައިލެންޑް ހެދުމަށް އެމްޓީސީސީއާއި ޕްލޭނިންގ މިނިސްޓްރީއާއެކު ސޮއިކޮށްފައިވަނީ 2 ސެޕްޓެމްބަރު 2021ގައެވެ. މި މަޝްރޫއު ސަރުކާރުން އެމްޓީސީސީއާ ހަވާލުކުރީ 41.49 މިލިއަން ރުފިޔާއަށެވެ.

ކުޑަގިރިއަކީ ތިލަފުށީ ކައިރީގައި އޮންނަ ފަޅެކެވެ. މި ފަޅު އޮންނަނީ ފެރީގައި ތިރީހަކަށް މިނެޓުން އަދި ލޯންޗުގައި ދިހަވަރަކަށް މިނެޓުން ދެވޭ ހިސާބުގައެވެ. ކުޑަގިރި ތަރައްގީކުރަން ފެށުމުގެ ކުރިން ސަރުކާރުން ފުރަތަމަ ނިންމީ ކ. އެނބޫދޫފަޅުގައި ހިއްކާފައިވާ ރަށެއް ޕިކްނިކް އައިލެންޑަކަށް ހެދުމަށެވެ. އެހެންނަމަވެސް ފަހުން ސަރުކާރުގެ ނިންމުން ބަދަލުކޮށް، ކުޑަގިރީގައި ޕިކްނިކް އައިލެންޑް ހަދާގޮތަށް ނިންމިއެވެ.