އިމާރާތް ކުރުމުގައި އުފެދޭ ކުނި އުކާލާ ވަގުތަށް ވެމްކޯއިން ބަދަލު ގެނެސްފިއެވެ.

ވެމްކޯ އިން ބުނީ އިމާރާތް ކުރުމާއި ތަޅާލުމުގައި އުފެދޭ ވެލި، ގައު ކުނޑި، ގައު، ލަކުޑި، ބަރު އަދި ބޮޑެތި ކުނި އުކާލާ ވަގުތަށް ބަދަލު ގެނެސްފައިވާތީ 11 ޖޫން އިން ފެށިގެން އެފަދަ ކުނިތައް މާލެ ވޭސްޓް ޓްރާންސްފަރ ސްޓޭޝަނުން ބަލައިގަންނާނީ ކޮންމެ ދުވަހެއްގެ ހެނދުނު 09:00ން ރޭގަނޑު 09:00ށް ކަމަށެވެ.

ވެމްކޯ އިން މިހެން ބުނެފައިވާއިރު މާލެ ސަރަހައްދުގެ ގޭބިސީތަކުން އުފައްދާ ކުނި އުކާލަން ނެރޭއިރު ކުނި ވަކިކޮށްފައި ނެރޭގޮތަށް ޖޫން 1ން ފެށިގެން އަމަލުކުރަން ފަށާފައިވާއިރު އެކަމަށް އާންމުންގެ ފަރާތުން ލިބުނު ތަރުހީބު ވެމްކޯއިން ވަނީ ދާދި ފަހުން ފާހަގަކޮށްފައެވެ.

ރައްކާތެރި ގޮތުގައި ކުނި މެނޭޖުކުރުމަށް މިނިސްޓްރީ އޮފް އެންވަޔަރަމަންޓް، ކްލައިމެޓް ޗޭންޖް އެންޑް ޓެކްނޮލޮޖީން އާއްމުކޮށްފައިވާ ގަވާއިދުގެ ފަސް ވަނަ އިސްލާހުގައި އުކާލަން ނެރޭ ކުނި ކަނޑައެޅިފައިވާ ބައިބަޔަށް ވަކި ކުރަން ވަނީ އަންގާފައެވެ. ވެމްކޯއިން އަންގާފައިވާގޮތުގައި މާލެ އާއި ވިލިމާލެ އާއި ހުޅުމާލޭގައި ކުނި އުކާލަން ނެރޭއިރު ވަކި ކޮށްފައި ހުންނަން ޖެހޭނީ ތިން ކެޓަގަރީއަކަށް ބަހާލައިގެންނެވެ. އެއީ ކުނިވާ ޒާތުގެ ކުންޏާއި އަމިއްލައަށް ފަނާވާ ޒާތުގެ ކުނި، ޕްލާސްޓިކް ފުޅި އަދި އެހެނިހެން ބާވަތުގެ ކުންޏެވެ.

ވެމްކޯގެ ތަފާސްހިސާބުތައް ދައްކާގޮތުން ޑަސްބިނަށް ކުނި އެޅުމަށްޓަކައި ރަޖިސްޓްރީކޮށްފައިވަނީ 823 ގޭބިސީންނެވެ. ވެމްކޯއިން ބުނީ މި ގަވާއިދަށް އަމަލު ކުރަން ފެށުމުން އެފަދަ ގޭބިސީތަކުގައި ވެސް ދެ ޑަސްބިން ބަހައްޓަން ޖެހޭނެ ކަމަށެވެ. އެއީ ކުނިވާޒާތުގެ ކުންޏަށް އެއްް ޑަސްބިން، އަދި ކުނިނުވާ ޒާތުގެ ކުންޏަށް އެއް ޑަސްބިނެވެ.

ޑަސްބިނުން ކުނި ނަގަން ރަޖިސްޓްރީ ނުކުރާހާ ހިނދަކު ކުނި ނަގަމުންދާނީ ގޭގެ ދޮރުމަތިން ކަމަށް ވެމްކޯއިން ބުނެއެވެ. މާލޭގައި ގާތްގަޑަކަށް 46000 ގޭބިސީ ހުރިއިރު، ޚިދުމަތަށް ރަޖިސްޓްރީ ކޮށްފައިވަނީ 25000-26000 ދެމެދުގެ އަދަދެއްގެ ގޭބިސީތަކުންނެވެ.