ބީޖޭޕީ އޮފިޝަލުންގެ ފުރައްސާރައިގެ ބަސްތަކާއެކު އިސްލާމީ ދުނިޔޭގެ ނުރުހުން އިންޑިއާއަށް

ކީރިތި ރަސޫލާ (ސައްލަﷲ އަލައިހި ވަސައްލަމް) އަށް ފުރައްސާރަކޮށް އިންޑިއާގެ ވެރިކަންކުރާ ޕާޓީ, ބާރަތަޔާ ޖަނަތާ ޕާޓީ (ބީޖޭޕީ)ގެ ދެ އޮފިޝަލުން ކަމަށްވާ، ނުޕުރް ޝަރްމާ އާއި ނަވީން ކުމާރު ޖިންދާލް ދެއްކި ވާހަކަތަކަކާ އެކު އިސްލާމީ ގައުމުތަކުގެ ނުރުހުން ވަނީ އިންޑިއާއަށް އަމާޒުވެފައެވެ.

އެ ދެމީހުންގެ ވާހަކަތައް ކުށްވެރިކޮށް އިސްލާމީ ގިނަ ގައުމުތަކަކުން ދަނީ އިހުތިޖާޖުކުރަމުންނެވެ. އިންޑިއާގައިވެސް އެގައުމުގެ އިސްލާމުން ވަނީ މިކަމާ ދެކޮޅަށް ގައުމުގައި އިހުތިޖާޖުކޮށްފައެވެ. މިގޮތުން ހޯމަ ދުވަހު މިކަމާ ގުޅިގެން އިންޑިއާގައި ކުރިއަށް ދިޔަ އިހުތިޖާޖުގައި 38 މީހުން ހައްޔަރުކޮށްފައިވާކަމަށް ރިޕޯޓުތައް ބުނެއެވެ.

އިސްލާމީ ގައުމުތައް ކަަމަށްވާ ގަތަރު، ސައުދި އަރަބިއާ، އޮމާން، ޔޫއޭއީ، އަފްޣާނިސްތާން، ޕާކިސްތާން އަދި އިރާނުން ވަނީ އެކަން ކުއްވެރިކޮށް، އެގޮތަށް އެކަން ކުރުމަށް މަގިފަހިކޮށްފައިވާތީ އިންޑިއާގެ ސަރުކާރުން މައާފަށް އެދުމަށް އަންގާފައިކަމަށް އިންޑިއާގެ ފޮރިން މިނިސްޓްރީގެ އޮފިޝަލަކާ ހަވާލާދީ ރޮއިޓަރސްއިން ރިޕޯޓުކޮށްފައިވެއެވެ.

މީގެ އިތުރުން ގަލްފުގެ ގައުމުތަކާއި އިސްލާމީ އެހެން ގައުމުތަކުގައި ހަރަކާތްތެރިވާ އިންޑިއާ ސަރުކާރުގެ ސަފީރުންނާ މަންދޫބުން ގައުމުތަކުން ވަނީ އެގައުމުތަކުގެ ފޮރިން މިނިސްޓްރީއަށް ހާޒިރުކޮށް އެދެމީހުންގެ އަމަލު ކުށްވެރިކުރާކަން އަންގާ އެކަމުގެ ލިއުން ދީފައެވެ.

ވަކިވަކި ގައުމުތަކުގެ އިތުރުން އދ އަށް ފަހު ދުނިޔޭގެ އެންމެ ބޮޑު ޖަމިއްޔާ ކަމަށްވާ، އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ) އިންވެސް ވަނީ ބީޖޭޕީގެ މި ދެ މެމްބަރުން ދެއްކި ވާހަކަތައް ކުށްވެރިކޮށްފައެވެ. އޯއައިސީ އިން ވަނީ ބީޖޭޕީގެ ދެ އޮފިޝަލުންގެ ވާހަކަތައް ފެންމަތިވެފައި މިވަނީ އިންޑިއާގައި އިސްލާމްދީނާ މުސްލިމުންނާ މެދު ނަފުރަތު އުފެދުން އިތުރުވެ، މުސްލިމުންނަށް ކުރާ ފުރައްސާރަތައް "ސިސްޓަމެޓިކް" ގޮތެއްގައި ނުވަތަ ވަކި އުސޫލެއްގެ ދަށުން އިތުރުކުރަމުންދާ ދަނޑިވަޅެއްގައި ކަން ފާހަގަކޮށްފައެވެ.

އެޖަމިއްޔާއިން ވަނީ އިންޑިއާގެ ގިނަ ސްޓޭޓްތަކެއްގެ ތައުލީމީ މަރުކަޒުތަކުގައި ބުރުގާ އެޅުން މަނާ ކުރުމާއި މުސްލިމުންގެ މުދަލަށް ގެއްލުންދޭން ފެށުން އެއީ އިންޑިއާގެ ސަރުކާރުން މިކަމުގައި އެއްކޮޅަށް ބުރަވާކަމުގެ ނިޝާންތައް ފެންނަން ފެށި ހިސާބުކަމަށް ފާހަގަކޮށްފައެވެ.

މިކަމާގުޅިގެން އިންޑިއާގެ ފޮރިން މިނިސްޓްރީ އިން ވަނީ އެ ދެ މެމްބަރުންގެ ވާހަކަތަކަކީ އެއްގޮތަކަށްވެސް ސަރުކާރުން އެކަމުގައި ގެންގުޅޭ ވިސްނުން ނޫންކަމަށާއި އެ ދެމެމްބަރުންނާ ދެކޮޅަށް، ކަމާގުޅުންހުރި އިދާރާތަކުން މިހާރު ވަނީ ވަރުގަދަ ފިޔަވަޅުތަކެއް އަޅާފައިކަމަށް ބުނެފައެވެ. އެގައުމުގެ ސަރުކާރުން ވަނީ ހުރިހާ ދީނަކަށްވެސް ސަރުކާރުން އިހުތިރާމުކުރާ ކަމަށް ބުނެފައެވެ.

ބީޖޭޕީން ޝަރްމާ ޕާޓީން ވަކިކޮށްފައިވާއިރު، ޖިންދަލް ވަނީ ޕާޓީގެ ހަރަކާތްތަކުން ސަސްޕެންޑް ކޮށްފައެވެ. ބީޖޭޕީގެ މިނިންމުމަށް ސައުދީ މަރުހަބާ ކިޔާފައިވާއިރު، ނިއު ދިއްލީގައި ހުންނަ ގަތަރުގެ އެމްބަސީގެ އިސް އޮފިޝަލަކު ވަނީ އެ ދެ މެމްބަރުންގެ ވާހަކަތަކުން ސަރުކާރު އެއްކިބާވާ ކަމަށް އިންޑިއާގެ ސަރުކާރުން އާންމުކޮށް އިއުލާނުކުރަން ޖެހޭނެ ކަމަށްވެސް ބުނެފައެވެ. އެގޮތުން އެ އޮފިޝަލް ވަނީ ދީނަށް ފުރައްސާރަ ކުރުމަކީ އިގުތިސާދީ ގޮތުން އިންޑިއާއަށް އެކަމުގެ ތަކުލީފު އުފުލަން ޖެހިދާނެ ކަމެއް ކަމަށް ފާހަގަކޮށް، ގަތަރުގެ ބައެއް ސުޕަރމާކެޓް ތަކުން މިހާރުވެސް އިންޑިއާގެ މުދާ ބޮއިކޮޓްކުރުމަށް ރިޕޯޓުތައް ހުށަހަޅަމުންދާކަމަށް ބުނެފައެވެ.

މިދިޔަ ދެ އަހަރަށް ބަލާއިރު، އިންޑިއާއިން ގަލްފް ކޯޕަރޭޝަން ކައުންސިލްގެ ގައުމުތައް ކަމަށްވާ، ކުވައިތު، ގަތަރު، ސައުދި އަރަބިއާ، ބަހްރެއިން، އޮމާން އަދި ޔޫއޭއީ އާއެކު ކުރި ވިޔާފާރީގެ މުއާމަލާތްތައް ގާތްގަޑަކަށް 90 ބިލިއަން ޑޮލަރަށް އަރާކަމަށް ތަފާސްހިސާބުތައް ދައްކައެވެ. މީގެ އިތުރުން އިންޑިއާގެ އެތައް މިލިއަން ރައްޔިތުންނެއް ގަލްފު ގައުމުތަކުގައި ދިރިއުޅެ މަސައްކަތްކުރަމުންދެއެވެ.

އިންޑިއާގެ 1.35 ބިލިއަން މީހުންގެ އާބާދީގެ 13 އިންސައްތަ އަކީ މުސްލިމުން ކަމަށްވާއިރު، އެމެރިކާގެ ސްޓޭޓް ޑިޕަރޓްމަންޓް އިން، ކޮންގްރެސް އޮން އިންޓަނޭޝަނަލް ރިލިޖަސް ފްރީޑަމް އަށް ޖޫން މަހު ހުށަހެޅި އަހަރީ ރިޕޯޓްގައި ފާހަގަކޮށްފައިވާ ގޮތުން އިންޑިއާގައި މައިނޯރިޓީ ގްރޫޕްތަކާއި ދެކޮޅަށް އެންމެ ގިނަ ހަރަކާތްތައް ހިންގާފައި ވަނީ 2021 ވަނަ އަހަރުއެވެ. މީގެ ތެރޭގައި މީހުންގެ ފުރާނަ ގެއްލުވާލި ހާދިސާތަކާއި މީހުންނާ މުދަލަށް އަމާޒުކޮށް ދީފައިވާ ހަމަލާތަކާއި ބިރުދެއްކުމުގެ ހާދިސާތައް ހިމެނެއެވެ.