ކޮވިޑް-19ގެ ހާލަތުގައި ރެނޮވޭޝަނަށް ކަމަށްބުނެ ޝަންގްރިއްލާ ބަންދުކުރުމުން އޭގެ އަސްލު ގެއްލުންވީ އައްޑޫ ސިޓީ ރައްޔިތުންނަށް ކަމަށް ޓޫރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވެއްޖެއެވެ.

ޝަންގްރިއްލާއަކީ 30 އިންސައްތަ ސަރުކާރުގެ ހިއްސާ އޮންނަ ރިސޯޓެކެވެ. އަދި ޝަންގްރިއްލާ ހުޅުވުން ވެގެންދިޔައީ އައްޑޫ ސިޓީގެ ފަތުރުވެރިކަމަށް އައި ވަރަށް ބޮޑު އިންގިލާބީ ބަދަލަކަށެވެ. އެހެންނަމަވެސް ކޮވިޑް-19ގެ ހާލަތުގައި ރާއްޖޭގެ ފަތުރުވެރިކަމަށް މާ ބޮޑު އަސަރެއް ނުކުރަނީސް ރެނޮވޭޝަންއަށް ކަމަށްބުނެ އެ ރިސޯޓު ވަނީ ބަންދުކޮށްފައެވެ. އަދިވެސް އެތަން ހުޅުވާފައެއް ނުވެއެވެ.

ޝަންގްރިއްލާ ހުޅުވުން ލަސްވެފައިވާތީ މިކަމާއި ގުޅިގެން ރާއްޖެޓީވީގެ ފަލަސުރުޚީ ޕްރޮގްރާމުގައި ބައިވެރިވެވަޑައިގެން ވާހަކަފުޅުދައްކަވަމުން ޓޫރިޒަމް މިނިސްޓަރު ވިދާޅުވީ އައްޑޫ ސިޓީއަކީ ރިސޯޓު ވަރަށް މަދު ސަރަހައްދަކަށް ވުމާއެކު އެ ސަރަހައްދުގެ ފަތުރުވެރިކަން ބައްޓަންވެފައި ވަނީ ޝަންގްރިއްލާއާއި، ކެނެރީފްއާ ސައުތު ޕާމްގެ މައްޗަށް ކަމަށެވެ. އެގޮތަށް އޮއްވައި ޝަންގްރިއްލާ ބަންދުކުރުމުން އެރީ ބޮޑު ލޮޅުމެއް ކަމަށް މިނިސްޓަރު ވިދާޅުވިއެވެ. މިކަމުގެ ގެެއްލުމާއި މިއަދު ކުރިމަތިލާންޖެހޭއިރު، މިކަން ފޫބެއްދޭނެހާ ބެޑް ކެޕޭސިޓީ އެ ސަރަހައްދުގައި ނެތްކަން މިނިސްޓަރު ވަނީ ފާހަގަކުރައްވާފައެވެ. ޝަންގްރިއްލާއަކީ ކުޅޭ ކުޅޭ ތަނެއް ނޫން ކަމަށާއި، އެއީ އައްޑޫ ސިޓީގެ ފަތުރުވެރިކަން ފައްކާކޮށްދިން ރިސޯޓު ކަމަށް މިނިސްޓަރު ވިދާޅުވިއެވެ.

މިނިސްޓަރު ވިދާޅުވީ ކޮވިޑް-19ގެ ހާލަތުގައި ކުރިމަތިވެދާނެ ގެއްލުމަކަށް ބަލައި ޝަންގްރިއްލާ ބަންދުކުރީ މާ އަވަހަށް ކަމަށެވެ. ޝަންގްރިއްލާ ބަންދުނުކޮށް އޮތްނަމަ ރަނގަޅަށް ކަންކަން ދިޔައީސް ކަމަށް މިނިސްޓަރު ވިދާޅުވިއެވެ. 2020 އަދި 2021 ވަނަ އަހަރަކީ ރިސޯޓުތަކަށް ކާމިޔާބު އަހަރުތަކެއް ކަމަށާއި، މިހާރު ރާއްޖެއަށް ފަތުރުވެރިން އަންނަމުންދާ ނިސްބަތަށް ބަލާއިރު ރަނގަޅަށް ހިންގާ ރިސޯޓަކަށް ގެއްލުމެއް ނުވާނެ ކަމަށް މިނިސްޓަރު ވިދާޅުވިއެވެ.

އައްޑޫ ސިޓީއަކީ ފަތުރުވެރިކަން ފުޅާކުރަން ޖެހިފައިވާ ސަރަހައްދެއް ކަމަށާއި، އެހެންކަމުން ސަރުކާރުގެ 30 އިންސައްތަ ހިއްސާއާއެކު ޝަންގްރިއްލާ ހުޅުވީ ކަމަށް މިނިސްޓަރު ވިދާޅުވިއެވެ. އެހެންނަމަވެސް ސަރުކާރުގެ ހިއްސާ އޮވެމެ އެތަނެއް ގެއްލުމުގައި ހިންގާކަށް ސަރުކާރުން ބޭނުން ނުވާ ކަމަށާއި، އެހެން ކަމުން އެ 30 އިންސައްތަ ދޫކޮށްލަން ނިންމާފައިވާކަމަށް މިނިސްޓަރު ވިދާޅުވިއެވެ.

މިނިސްޓަރު ވިދާޅުވީ އެ 30 އިންސައްތަ ހިއްސާ ދޫކޮށްލައިފިނަމަ ސަރުކާރަށް 80 މިލިއަން ޑޮލަރު ވަރު ލިބިގެންދާނެ ކަމަށެވެ. ރަށުގެ ބޮޑުމިނާއި މިފަދަ ކަންކަމަށް ބަލައި، ހަދާ ހިސާބެއްގެ ތެރެއިން އަންނަނީ އެވަރު ކަމަށް މިނިސްޓަރު ވިދާޅުވިއެވެ.

ޓުއަރިޒަމް މިނިސްޓަރު ވިދާޅުވީ މިވަގުތު ފިނޭންސް މިނިސްޓްރީ އާއި އައްޑޫ އިންވެސްޓްމަންޓާއި ވާހަކަދެކެވެމުން ދަނީ ވީހާވެސް އަވަހަށް ޝަންގްރިއްލާ ހުޅުވުމަށް ކަމަށެވެ. އަދި ޝަންގްރިއްލާއިން މައުލޫމާތުދޭ ގޮތުގައި ވީހާވެސް އަވަހަކަށް ހުޅުވުމަށް ބޭނުންވާ ބައެއް މަރާމާތުތައް ހަދަންޖެހޭ ކަމަށާއި، ސީދާ ތާރީހަށް ދެންނެވެން ނެތް ކަމުގައިވީ ނަމަވެސް މިއީ ފަތުރުވެރިކަމުގެ ރަން އަހަރުކަމުގައިވާތީ އައްޑޫ ސިޓީއަށް ވެސް ފަތުރުވެރިކަމުގެ ރަން އަހަރު ރަނގަޅު ގޮތުގައި އަންނަންޖެހޭ ކަމުގައި މިނިސްޓަރު ވިދާޅުވިއެވެ. އެގޮތުން އުއްމީދަކީ އައްޑޫ އިންވެސްޓްމަންޓުން މިއަހަރު ނިމުމުގެ ކުރިން ޝަންގްރިއްލާ އަލުން ހުޅުވުން ކަމަށް މިނިސްޓަރު ވިދާޅުވިއެވެ.