މިފްކޯއިން ތެޔޮ މަދު މަސްދަޅެއް ރާއްޖެއަށް ތައާރަފުކޮށްފި

ކުޑަ ތެޔޮ ފޮދެއް އެކުލެވޭ މަސްދަޅެއް މިފްކޯއިން ރާއްޖޭގެ ބާޒާރަށް ތައާރަފު ކޮށްފިއެވެ.

ހުޅުމާލެ ސެންޓްރަލް ޕާކުގައި ކުރިއަށްދިޔަ ފުޑް އެންޑް ބެވަރެޖް ޝޯގައި މި މަސްދަޅު ތައާރަފު ކޮށްދެއްވީ ޓޫރިޒަމް މިނިސްޓަރ ޑރ. އަބްދުﷲ މައުސޫމެވެ. މިއީ އުފެއްދުންތެރި ޓެކްނޮލޮޖީއެއްގެ އެހީގައި ތައާރަފު ކޮށްފައިވާ މަސްދަޅެކެވެ.

"ޑްރެއިންޑް ކަނޑުމަސް ޗަންކްސް"ގެ ނަމުގައި ތައާރަފުކުރި މި މަސްދަޅަކީ ރާއްޖޭގެ ބާޒާރަށް ނެރުނު މިފަދަ ފުރަތަމަ މަސް ދަޅެވެ. މިއީ ކުޑަ ތެޔޮފޮދެއްގެ ސަބަބުން ގިނަ ފަސޭހަތަކެއް ލިއްބައިދޭ މަސް ދަޅެއްކަމަށް މިފްކޯއިން ބުނެއެވެ. އެގޮތުން ދަޅުގައި އެކުލެވޭ ތެޔޮ އުކާލަން ނުޖެހޭނެ ކަމަށާއި، އޭގެ ސަބަބުން ކެއްކުމުގައި ފަސޭހަތަކެއް ވާނެކަމަށް އެ ކުންފުނިން ބުންޏެވެ.

މީގެ އިތުރުން މި މަސް ދަޅު ބޭނުން ކުރުމުން ކެއްކުމުގެ ތެރޭގައި ތެލުގެ ސަބަބުން ބަދިގެތެރެ ތަޣައްޔަރުވުން ކުޑަކޮށްދޭނެކަމަށް ވެސް މިފްކޯއިން ބުނެއެވެ. އެ ކުންފުނިން މި މަސްދަޅު ސިފަކޮށްފައިވަނީ "ހައްޓަށް ހެޔޮ، ޓައްޕަށް ފަސޭހަ، ކައްކަން ފަސޭހަ އަދި ޖީބަށް ލުއި" މަސްދަޅެއްގެ ގޮތުގައެވެ.

މިފްކޯއިން ވަނީ ފުޑް އެންޑް ބެވަރެޖް ޝޯގެ ތެރެއިން މި މަސްދަޅުގެ ރަހަ އާއްމުންނަށް ދައްކާލާފައެވެ. މި މަސްދަޅު މި މަހުގެ ތެރޭގައި ބާޒާރަށް ނެރޭނެކަމަށްވެސް އެ ކުންފުނިން ބުނެއެވެ.

"ޑްރެއިންޑް ކަނޑުމަސް ޗަންކްސް" މަސް ދަޅު ސަންފްލާވަރ ތެލާއި ސޯޔާ ބީން ތެލާއި އޮލިވް އޮއިލްގައި ވެސް އުފައްދާނެއެވެ. މިއީ މިހާރު އުފައްދާ މަސްދަޅުތަކާ އަޅާ ބަލާއިރު ނިސްބަތުގެ ގޮތުން އަގުހެޔޮ މަސްދަޅަކަށް ވާނެކަމަށް ވެސް މިފްކޯއިން ބުނެއެވެ.

މިފްކޯއިން އަންނަނީ ދިވެހިންނަށް ކަމުދާނެ ރަހަތައް ބަލައި މަސްދަޅުތައް ބާޒާރަށް ނެރެމުންނެވެ. މިގޮތުން ގިތެޔޮމިރުހާއި ލުނބޯ ފަދަ ތަކެތި ހިމެނޭހެން ވެސް މަދަޅުތައް އުފައްދައި މިހާރު ވަނީ ބާޒާރަށް ނެރެފައެވެ.