އިންޑިއާގެ ހިލޭ އެހީގެ ދަށުން 3 ސްކޫލެއްގައި އައިއީއެސް ޔުނިޓުތަކެއް ގާއިމްކުރަނީ
ބޭނުންވާ އިންފްރާސްޓްރަކްޗަރާއި، އިންސާނީ ވަސީލަތް ގާއިމްކުރާނެ
އިންކްލޫސިވް އެޑިއުކޭޝަން ސަޕޯޓް ޔުނިޓުތަކުގެ މަސައްކަތް އިފްތިތާހުކުރުމުގެ ރަސްމިއްޔާތުގެ ތެރެއިން
ރާއްޖޭގެ ތިން ސްކޫލެއްގައި އިންކްލޫސިވް އެޑިއުކޭޝަން ސަޕޯޓް (އައިއީއެސް) ޔުނިޓުތަކެއް ގާއިމްކުރުމުގެ މަސައްކަތް އިފްތިތާހުކޮށްފިއެވެ.
އިންކްލޫސިވް އެޑިއުކޭޝަން ސަޕޯޓް ޔުނިޓުތައް ގާއިމްކުރަން ނިންމާފައިވަނީ ހއ. އަތޮޅު ތައުލީމީ މަރުކަޒު، ގދ. ތިނަދޫ އަބޫބަކުރު ސްކޫލް އަދި ލ.ގަން އިހައްދޫ ސްކޫލްގައެވެ.
މި ތިން ސްކޫލްގައި އައިއީއެސް ޔުނިޓްތަކުގެ ހިންގުން ހަރުދަނާ ކުރުމަށްޓަކައި، މި މަޝްރޫއުގެ ސްކޯޕްގައި، ވަށާޖެހޭ ވިސްނުމެއް ގެންގުޅެއެވެ. މިގޮތުން އިންސާނީ ވަސީލަތްތައް ގާއިމްކުރުމާއި، ބޭނުންވާ އިންފްރާސްޓްރަކްޗަރ އާރާސްތުކޮށް ތަރައްގީކުރުމާއި، މަސައްކަތަށް ބޭނުންވާ ތަކެތި ހޯދުމާއި، އުނގަންނައިދިނުމާއި ކިޔަވައި ދިނުމަށް ބޭނުންވާ ތަކެތި ފޯރުކޮށްދިނުން ހިމެނެއެވެ.
ތައުލީމީ ތަރައްގީއަށް އެހީތެރިވެދޭ އަދި ކުޑަކުދިންގެ ދިރިއުޅުމަށް ކޮލިޓޭޓިވް ބަދަލެއް ގެނައުމަށް އެހީތެރިވެދޭ މަޝްރޫއުތަކަކީ، އިންޑިޔާއިން ރާއްޖެއަށް އެހީވެދޭ މައިގަނޑު ދާއިރާއެވެ. މީގެ ތެރޭގައި ފެހެންދޫ-ގޮއިދޫ ސްޓޫޑެންޓް ފެރީ ހަދިޔާކުރުމާއި، ރާއްޖޭގެ 67 ރަށެއްގައި ކުޑަކުދިންގެ ޕާކު ގާއިމްކުރުމަށް ބޭނުންވާ ސާމާނު ހަދިޔާކުރުމާއި، 'ފިޔަވަތި - ހޯމް ފޮރ ވަލްނަރަބަލް ޗިލްޑްރަންސް' މަރާމާތުކުރުމާއި، ފުވައްމުލަކާއި ކުޅުދުއްފުށީގައި އީއެސް ސަޕޯޓް ޔުނިޓްތައް ހަރުދަނާކުރުމާއި، ޅޮހި އަދި ކިނޮޅަހު ސްކޫލްގައި ކްލާސްރޫމްތައް އެޅުމުގެ މަސައްކަތް ހިމެނެއެވެ. މިއިން ކޮންމެ މަޝްރޫއަކީވެސް ކުޑަކުދިންނަށް ވަރަށް ބޮޑަށް ބޭނުންވާ މަޝްރޫއުތަކެކެވެ.
އިންޑިއާގެ 260 މިލިއަން ރުފިޔާގެ ހިލޭ އެހީގެ ދަށުން ރާއްޖޭގައި 45 އަށްވުރެ ގިނަ ހައި އިމްޕެކްޓް ކޮމިއުނިޓީ ޑިވެލޮޕްމަންޓް ޕްރޮޖެކްޓް ދަނީ ހިންގަމުންނެވެ. މީގެ ތެރެއިން ގާތްގަނޑަކަށް 20 ވަރަކަށް މަޝްރޫއު ނިންމާ އިފްތިތާހު ކޮށްފައިވެއެވެ.
ރަށްރަށުގެ މުޖުތަމައުތަކުގެ ބޭނުންތަކަށް ބިނާކޮށް ހިންގޭ މި މަޝްރޫއުތަކަކީ، އިންޑިޔާއާއި ރާއްޖެއާ ދެމެދު އޮންނަ ހަރުދަނާ ތަރައްގީގެ ޕާޓްނަރޝިޕްގެ މުހިންމު ތަސައްވުރެކެވެ.
