މަނީ ލޯންޑްރިންގގެ މައްސަލައަކާ ގުޅިގެން އިންޑިއާގެ ކޮންގްރެސްގެ އިންޓެރިމް ރައީސް ސޯނިއާ ގާންދީއާއި މަޖިލިސް މެމްބަރު ރާހުލް ގާންދީ ހާޒިރުކުރަން ނިންމައިފިއެވެ.

އިންޑިއާގެ ނޫހެއްގައި ރިޕޯޓުކޮށްފައިވާގޮތުން އެންފޯރސްމެންޓް ޑައިރެކްޓޮރޭޓްއިން މެ ދެބޭފުޅުން ހާޒިރުކުރަން ނިންމާފައިވާކަމުގެ މައުލޫމާތު ދީފައިވަނީ ބުދަ ދުވަހު ކުރިއަށްދިޔަ ނޫސްވެރިންގެ ބައްދަލުވުމުގެއްގައި އައިއެންސީގެ ލީޑަރު އަބީޝޭކް މާނޫ ސިންގްވީއެވެ.

އެގޮތުން ރާހުލް ގާންދީ ހާޒިރުވެވަޑައިގަތުމަށް އަންގާފައިވަނީ ޖޫން 2 ވަނަ ދުވަހުއެވެ. އަދި ސޯނިއާ ގާންދީ ހާޒިރުވެވަޑައިގަތުމަށް އަންގާފައިވަނީ ޖޫން 8 ވަނަ ދުވަހެވެ.

މިއީ މިދެބޭފުޅުންވެސް ހާޒިރުކުރެވޭ ފުރަތަމަ ފަހަރު ކަމަށްވާއިރު، 2 ބޭފުޅުންވެސް ހާޒިރު ކުރެވެނީ ނަހަމަގޮތުގައި ޕްރޮޕަޓީތަކެއް ހޯދިކަމުގެ ތުހުމަތުގައެވެ.

އަބީޝޭކް މާނޫ ސިންގްވީ ވިދާޅުވީ، ރާހުލް ގާންދީ ސުވާލުކުރުމަށް ހާޒިރުވުމަށް އަދި ދުވަސް ދިނުމަށް އެދިވަޑައިގެންފައިކަން ހާމަކޮށްފައެވެ. ރާހުލް މިވަގުތު ހުންނެވީ ގައުމުން ބޭރުގައިކަމަށް އޭނާ ވިދާޅުވިއެވެ. އެހެން ނަމަވެސް ސޯނިއާ ގާންދީ ޖޫން 8 ވަނަ ދުވަހު އެންފޯރސްމެންޓް ޑައިރެކްޓޮރޭޓްއަށް ހާޒިރުވެވަޑައިގަންނަވާނެ ކަމަށް އޭނާ ވިދާޅުވިއެވެ.

އަބީޝޭކް މާނޫ ސިންގްވީ ވަނީ އެ ދެބޭފުޅުންނާ ގުޅިގެން ކުރެވޭ ތުހުމަތުތަކުގެ އެއްވެސް ހެތްކެއް ނެތްކަމަށްވެސް ވިދާޅުވެފައެވެ.