ވޯލްޑް ޝެފް ކޮންގްރެސްގައި ބައިވެރިވާން ދިވެހި ޝެފުން އަބުދާބީއަށް

ޔޫއޭއީގެ ވެރިރަށް އަބޫދާބީގައި ކުރިއަށްދާ ވޯލްޑް ޝެފްސް ކޮންގްރެސްގައި ބައިވެރިވުމަށް ޝެފްސް ގިލްޑް އޮފް މޯލްޑިވްސް (ސީޖީއެމް)ގެ ގްރޫޕްއެއް އަބޫދާބީއަށް ފުރައިފިއެވެ.

މި ހަފްތާގެ ހޯމަ ދުވަހުން ފެށިގެން ބުރާސްފަތި ދުވަހުގެ ނިޔަލަށް ކުރިއަށްދާ މި އެކްސްޕޯއަކީ ކޮވިޑް-19ގެ ފަހުން ދުނިޔޭގެ ހޮސްޕިޓަލިޓީ އަދި ކަލިނަރީ ދާއިރާގައި ބާއްވާ ފުރަތަމަ އަދި އެންމެ ބޮޑު ބައިނަލްއަގުވާމީ ހަރަކާތެވެ. މިއީ އެކި ޤައުމުތަކުގެ ޝެފުން އެއްތަނަކުން ބައްދަލުވެ ގުޅުން ބަދަހި ކުރުމާއި ޚިޔާލު ބަދަލުކުރުމުގެ ފުރުސަތު ފަހިކޮށްދިނުމުގެ ގޮތުން ބާއްވާ ހަރަކާތެކެވެ.

Advertisement

މިއަހަރުގެ ކޮންގްރެސްގައި ރާއްޖެ ތަމްސީލް ކުރާނީ ސީޖީއެމްގެ ރައީސް މަރިޔަމް ނޫރައްދީން އާއި އެ ޖަމިއްޔާގެ ހުރިހާ އެކްސްކޯގެ މެމްބަރުންގެ އިތުރުން 24 ޝެފުންނެވެ. މި ވަފުދުގައި 8 ޒުވާން ޝެފުން ވެސް ހިމެނެއެވެ.

ވޯލްޑް ޝެފްސް ކޮންގްރެސްގައި ކުރިއަށްދާ ހަރަކާތްތަކުގެ ތެރޭގައި ކެއްކުމުގެ މުބާރާތްތަކާއި ފަނޑިޔާރުންގެ ގޮތުގައި ބައިވެރިވާ ޝެފުން ތަމްރީން ކުރުމަށް ބާއްވާ "ކޮމްޕެޓިޝަން ސެމިނަރ" ހިމެނެއެވެ. މި ހުރިހާ ހަރަކާތެއްގައިވެސް ރާއްޖޭގެ ޝެފުން ބައިވެރިވާނެއެވެ.

މީގެ އިތުރުން އެހެން އަހަރުތަކާ އެއްގޮތަށް މި އަހަރުވެސް ދުނިޔޭގެ އެކި ގައުމުތަކަށް ނިސްބަތްވާ، ކަލިނަރީ ދާއިރާގެ މާހިރުންގެ ކީނޯޓް އެޑްރެސްތަކާއި، ދުނިޔޭގެ 50 ގައުމަކުން 80 ކަލިނަރީ ސްކޫލު ތަމްސީލުކޮށް ބާއްވާ އެޑިއުކޭޓަރސް ފޯރަމްއާއި، އެކި ފަންނުތަކުން ޝެފުން "ވޯލްޑްސް ބެސްޓް ޝެފްސް"ގެ ލަގަބަށް ވާދަކުރާ "ގްލޯބަލް ޝެފްސް ޗެލެންޖް" އާއި، ވޯލްޑް ޝެފްސް އެކްސްޕޯގެ އިތުރުން، 25 އަހަރުން ދަށުގެ ޝެފުންނަށް ހާއްސަކޮށްގެން ބާއްވާ "ބިލީ ގެލެގަރ ޔަންގް ޝެފްސް ފޯރަމް" ވެސް އޮންނާނެއެވެ.

ސީޖީއެމް އިން ބުނެފައިވާ ގޮތުގައި ރާއްޖޭން ކޮންގްރެސްގައި ބައިވެރިވާ 8 ޒުވާން ޝެފުންގެ ތެރެއިން 6 ޝެފުންގެ ދަތުރުގެ އިތުރުން ވޯލްޑްޝެފްސް ކޮންގްރެސްގައި ބައިވެރިވުމުގެ ހުރިހާ ޚަރަދެއް ހަމަޖައްސައިދީފައި ވަނީ ބެސްޓްބައި މޯލްޑިވްސް ޕްރައިވެޓް ލިމިޓެޑް (ބީބީއެމް)ގެ ފަރާތުންނެވެ.

ސީޖީއެމްއަކީ ރާއްޖޭގައި މަސައްކަތް ކުރާ ޝެފުން ތަމްސީލް ކުރަމުން އަންނަ ޖަމްއިއްޔާއެކެވެ. އެ ޖަމްއިއްޔާ އުފައްދާފައިވަނީ ދިވެހި ޝެފުންނާއި ރާއްޖޭގައިކަލިނަރީ ފަންނު ކުރިއެރުވުމުގެ މަގުސަދުގައެވެ.