އިތުރު ދެ އަހަރު ކްރޫސް ރެއާލްގައި މަޑުކުރަނީ

ސްޕެއިންގެ ރެއާލް މެޑްރިޑަށް ކުޅެމުން އަންނަ ޖަރުމަނުގެ މިޑްފީލްޑަރު ޓޯނީ ކްރޫސް އިތުރު ދެ އަހަރު އެ ޓީމުގައި މަޑު ކުރުމަށް ނިންމައިފިއެވެ.

ކްރޫސް ރެއާލާއެކު ހަދާފައިވާ އެއްބަސްވުމުގެ މުއްދަތު މި ސީޒަނުގެ ނިޔަލަށް ހަމަވާނެއެވެ. ޖަރުމަނުގެ ބަޔާން މިއުނިކުން ސީނިއަރ ކެރިއަރު ފެށި ކްރޫސް ރެއާލަށް ބަދަލުވީ 2014 ވަނަ އަހަރުއެވެ. ބަޔާންގެ އިތުރުން ކްރޫސް ވަނީ ލޯނު އެއްބަސްވުމެއްގެ ދަށުން ބަޔާ ލިވާކުސެން އަށް ވެސް ކުޅެފައެވެ.

ރެއާލާއެކު މި ސީޒަނުގެ ޔުއެފާ ޗެމްޕިއަންސް ލީގު ކާމިޔާބުކުރުމަށްފަހު ކްރޫސް ބުނީ އޭނާ ރެއާލްގައި މަޑުކުރާނެ ކަމަށެވެ. އޭނާ ބުނީ ކުރިމަގުގައި ރެއާލަށް ކުޅެން ޖެހޭ ކަމަށެވެ. އޭނާ ބުނީ މި ސީޒަނަށްފަހު އިތުރު ދެ އަހަރު އޭނާ ރެއާލްގައި މަޑު ކުރާނެ ކަމަށެވެ. ރެއާލުން އަންނަ ސީޒަނަށް ގެންގުޅޭ ޕްލޭންގައި ވެސް ކްރޫސް ހިމެނެއެވެ.

އުމުރުން 32 އަހަރުގެ ކްރޫސް ވަނީ މިހާތަނަށް ރެއާލަށް 243 މެޗު ކުޅެދީފައެވެ. އަދި އޭނާ ވަނީ އެ ޓީމަށް 19 ލަނޑު ޖަހައިދީފައެވެ. ރެއާލާއެކު މިވީ އަށް އަހަރުގެ ތެރޭގައި އޭނާ ވަނީ 16 ތައްޓެއް ހޯދާފައެވެ. އޭގެ ތެރޭގައި ސްޕެނިޝް ލީގު ތިން ފަހަރު، ސްޕެނިޝް ސުޕަ ކަޕް ތިން ފަހަރު، ޔުއެފާ ޗެމްޕިއަންސް ލީގު ހަތަރު ފަހަރު، ޔުއެފާ ސުޕަ ކަޕް ދެ ފަހަރު އަދި ފީފާ ކްލަބް ވޯލްޑް ކަޕް ހަތަރު ފަހަރު ހޯދާފައިވެއެވެ.

މީގެ އިތުރުން ކްރޫސް އަންނަނީ ޖަރުމަނުގެ ގައުމީ ޓީމަށް ވެސް ކުޅެމުންނެވެ. 2010 ވަނަ އަހަރު ޖަރުމަނުގެ ސީނިއަރ ޓީމަށް ކުޅެން ފެށި ކްރޫސް ވަނީ މިހާތަނަށް ގައުމީ ޓީމަށް 106 މެޗު ކުޅެދީ 17 ލަނޑު ޖަހައިފައެވެ. އޭނާ ވަނީ ޖަރުމަނާއެކު 2014 ވަނަ އަހަރުގެ ފީފާ ވޯލްޑް ކަޕް ކާމިޔާބުކޮށްފައެވެ.