ރެއާލް މެޑްރިޑަށް ކުޅެމުން އަންނަ ކްރޮއޭޝިއާގެ ކެޕްޓަން ލުކާ މޮޑްރިޗްގެ ކޮންޓްރެކްޓް އައުކޮށްފިއެވެ.
މޮޑްރިޗްގެ ކޮންޓްރެކްޓް އައުކުރިކަން އިއުލާނުކޮށްފައިވަނީ ޗެމްޕިއަންސް ލީގުގެ ތަށި 14 ވަނަ ފަހަރަށް ރެއާލްއިން ކާމިޔާބު ކުރުމަށްފަހު އުފާ ފާޅުކުރުމުގެ ތެރެއިންނެވެ. ރެއާލްއާއެކު މޮޑްރިޗް ހަދާފައިވާ އެއްބަސްވުމުގެ މުއްދަތު މިއަންނަ ޖޫން މަހުގެ ނިޔަލަށް ހަމަވާއިރު، އޭނާ ވަނީ އިތުރު އެއް އަހަރަށް ކޮންޓްރެކްޓް އައުކޮށްފައެވެ.
މޮޑްރިޗްގެ ކޮންޓްރެކްޓް ހަމަވާން ގާތްވުމާއެކު އޭނާއަށް އެކި ކްލަބުތަކުން ހުށަހެޅުންތައް ލިބުނެވެ. ނަމަވެސް އޭނާ ބޭނުންވީ އިތުރަށް ރެއާލްގައި މަޑުކުރާށެވެ. މޮޑްރިޗްގެ ކޮންޓްރެކްޓް އައުކުރިކަން ވަރަށް އަވަހަށް ރަސްމީކޮށް އިއުލާނު ކުރާނެއެވެ. ނަމަވެސް މީގެ ދެމަސްކުރިން އަނގަބަހުންވީ އެއްބަސްވުން މިހާރު ވަނީ ލިޔުމުން ނިންމާ ސޮއިކޮށްފައެވެ. މި ސީޒަންގައި ރެއާލްއަށް ޗެމްޕިއަންސް ލީގު އަދި ސްޕެނިޝް ލީގު ހޯދައިދިނުމުގައި މޮޑްރިޗް މުހިންމު ދައުރެއް އަދާކުރިއެވެ.
މޮޑްރިޗްގެ ކޮންޓްރެކްޓް އައުކުރިކަން ހާމަކޮށްފައިވާއިރު، ޗެމްޕިއަންސް ލީގުގެ ފައިނަލަކީ ރެއާލްއަށް ގިނަ ދުވަހު ކުޅުނު މާސެލޯގެ ފަހު މެޗެވެ. މާސެލޯ ވަނީ މިއީ އޭނާގެ ފަހު މެޗުކަން ރަސްމީކޮށް އިއުލާނު ކޮށްފައެވެ. މާސެލޯއާއެކު ރެއާލް ހަދާފައިވާ އެއްބަސްވުމުގެ މުއްދަތު މިއަންނަ ޖޫން މަހުގެ ނިޔަލަށް ހަމަވާނެއެވެ.
