ކައުންސިލްތަކާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކާއެކު ބާއްވާ “ވިޔަވަތި ރާއްޖެ” ކޮންފަރެންސް ފަށައިފިއެވެ.

ހޮނިހިރު ދުވަހު ފެށި މި ކޮންފަރެންސަކީ ރައީސުލް ޖުމްހޫރިއްޔާ އިބްރާހިމް މުހައްމަދު ސޯލިހު އާއި ދައުލަތުގެ ވަޒީރުންނާއި ލޯކަލް ގަވަމަންޓް އޮތޯރިޓީ (އެލްޖީއޭ) އިން ކައުންސިލްތަކާ ބައްދަލުކުރައްވައި މަޝްވަރާ ކުރުމަށް ބާއްވާ ކޮންފަރެންސެކެވެ. މިއަހަރުގެ ކޮންފަރެންސް ބާއްވަނީ އއ. އުކުޅަހުގައެވެ.

މި ކޮންފަރެންސް ކުރިޔަށްގެންދިއުމަށް ހަމަޖެހިފައި ވަނީ 3 ސަރަހައްދަކަށް ބަހާލައިގެން ކޮންމެ ސިޓީ ކައުންސިލަކާއި އަތޮޅު ކައުންސިލަކާއި ރަށު ކައުންސިލަކާއި އަންހެނުންގެ ތަރައްގީއަށް މަސައްކަތް ކުރާ ކޮމެޓީއެއްގެ ބައިވެރިވާގޮތަށެވެ. މި އަހަރު ބާއްވާ ފުރަތަމަ ކޮންފަރެންސް މެއި 27-28 ގައި ކުރިޔަށްގެންދާއިރު ކޮންފަރެންސްގައި ބައިވެރިވަނީ މެދުރާއްޖެތެރޭގެ އަތޮޅު ތަކުގެ ކައުންސިލްތަކުގެ ރައީސުންނާއި އަންހެނުންގެ ކޮމިޓީގެ ރައީސުންނެވެ.

ކައުންސިލަތްކާއި އަންހެނުންގެ ކޮމިޓީގެ އިތުރުން ވަޒީރުންނާއި ސަރުކާރުގެ ބައެއް އިސް ފަރާތްތައް ހިމޭނޭހެން މި ކޮންފަރެންސްގައި 174 ފަރާތަކުން ބައިވެރިވެއެވެ.

"ވިއަވަތި ރާއްޖެ" ކޮންފަރެންސަކީ ރާއްޖޭގެ ލާމަރުކަޒީ ނިޒާމު ފުރިހަމަކުރައްވައި ކައުންސިލުތައް ބާރުވެރިކުރުމަށް ރައީސް ފަށްޓަވާފައިވާ މަސައްކަތް އިތުރަށް ހަރުދަނާކުރެއްވުމަށް ބާއްވާ ކޮންފަރެންސެކެވެ. އަދި ރާއްޖޭގެ ލާމަރުކަޒީ ނިޒާމުގެ ހަޤީޤީ މަންފާ ކައުންސިލުތަކާއި އެސިޓީއެއް، އަތޮޅެއް ނުވަތަ ރަށެއްގެ ރައްޔިތުންނަށް ލިބިގެންދާގޮތަށް އެ ނިޒާމު ބަދަލުކުރެއްވުމަށް އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނަށް ސަރުކާރުން ގެނައި އިސްލާޙްތަކާއެކު އިދާރީ ގޮތުންނާއި މާލީ ގޮތުން ކައުންސިލްތަކަށް ލިބިފައިވާ ބާރުތައް، ތަންފީޒުކުރުމުގެ ކަންކަން ކުރިޔަށްދާގޮތް ގާތުން ބެއްލެވުމާއި އެކަމުގައި ކުރިމަތިވާ ގޮންޖެހުންތައް ޙައްލުކޮށްދިނުމަކީ ވެސް މި ކޮންފަރެންސުގެ ބޭނުމެކެވެ.

މީގެ އިތުރުން މީގެ ކުރިން މަރުކަޒީގޮތުން އިދާރާތަކުން ކުރަމުންއައި މަސައްކަތްތަކާއި މަސްއޫލިއްތުތައް ކައުންސިލްތަކަށް ބަދަލުކުރުމުގެ ގޮތުން މިހާތަނަށް ކުރެވިފައިވާ މަސައްކަތްތަކާ ގުޅޭގޮތުން، އަލަށް ކައުންސިލްތަކަށް އިންތިޚާބުވި ކައުންސިލް އަންހެނުންގެ ކޮމެޓީތަކުގެ ރައީސުން، ރައީސުލްޖުމްހޫރިއްޔާއާ ބައްދަލުކުރައްވައި މަޝްވަރާ ކުރެއްވުމަށް ފުރުޞަތު ފަހިކޮށްދިނުމަކީ ވެސް މި ކޮންފަރެންސްގެ މުހިންމު އެއް ބޭނުން ކަމަށް ރައީސް އޮފީހުން ބުންޏެވެ.

ރަށްރަށުގެ ކަންކަމުގައި ގޮތް ނިންމުމުގައި އެ ރަށެއްގެ ރައްޔިތުންގެ އެއްބާރުލުން ހޯއްދެވުމަށް ރައީސް އިސްކަން ދެއްވައެވެ. އަދި ރަށުގެ ތަރައްގީގައި އަންހެނުންގެ ދައުރު އިތުރު ކުރުމަށްވެސް ރައީސް ހާއްސަ އިސްކަމެއް ދެއްވައެވެ.

މި ކޮންފަރެންސްގައި ޖުމްލަ 4 ސެޝަނެއް ބާއްވާނެއެވެ. މި ސެޝަންތަކުގައި މިހާރު ޤައުމުގައި ހުރި އެންމެ މުހިންމު މައްސަލަތަކާމެދު މަޝްވަރާކޮށް ހިޔާލުބަދަލުކުރުމާއި ޕްރެޒެންޓޭޝަން ހުށަހެޅުމާއި ކައުންސިލަރުން ހުށަހަޅުއްވަން ބޭނުންވާކަންކަން ރައީސުލްޖުމްހޫރިއްޔާއާ ވަޒީރުންނަށް ހުށަހެޅުމުގެ ފުރުޞަތު ލިބިގެންދާނެއެވެ.

ކޮންފަރެންސްގެ ކުރިން ބައިވެރިންގެ މެދުގައި ގުޅުން ބަދަހި ކުރުމަށް ހުކުރު ދުވަހު ކުޅިވަރު ހަވީރެއްވެސް ވަނީ ބާއްވާފައެވެ. މި ހަވީރުގައި ރައީސް އާއި ދައުލަތުގެ ވަޒީރުންނާއި ސަރުކާރުގެ ބައެއް ކުންފުނިތަކުގެ އިސް ބޭފުޅުން ބައިވެރިވެވަޑައިގެންނެވިއެވެ.