ވެމްކޯއިން ދޭ ޚިދުމަތްތަކަށް ލިބެންޖެހޭ 42 މިލިއަނަށްވުރެ ގިނަ ރުފިޔާ މިހާތަނަށް ނުލިބި ހުރިކަމަށް އެ ކުންފުނިން ބުނެފިއެވެ.

ބުރާސްފަތި ދުވަހު އެންވަޔަރަމަންޓް މިނިސްޓްރީން ބޭއްވި ނޫސްވެރިންގެ ބައްދަލުވުމުގައި ވެމްކޯގެ ޑެޕިއުޓީ މެނޭޖިންގ ޑިރެކްޓަރ ޔޫސުފް ސިރާޖް ވިދާޅުވީ، ކުނި އުކާލުމުގެ ޚިދުމަތް ހޯދުމަށްފަހު ބައެއް ގޭބިސީތަކުން ދައްކަންޖެހޭ ފައިސާ އަދިވެސް ނުދައްކާކަމަށެވެ. އެގޮތުން މިހާތަނަށް އެ ކުންފުންޏަށް ލިބެން ޖެހޭ 42 މިލިއަން ރުފިޔާ ނުލިބި އެބަހުރިކަމަށް އޭނާ ވިދާޅުވިއެވެ.

ވެމްކޯގައި ރަޖިސްޓްރީ ނުވުމުގެ މައްސަލަތަކާއި ފައިސާ ނުދައްކާ މައްސަލަތަކަށް އިޝާރާތް ކުރައްވައި ސިރާޖް ވިދާޅުވީ، އެ މައްސަލަތައް ހައްލުކުރުމަށް މަސައްކަތްކުރަމުން އަންނަކަމަށެވެ. އަދި އެކަން ކުރެވޭނީ ގާނޫނަށް ބަދަލުތައް ގެނެސްގެން ކަމަށްވެސް އޭނާ ވިދާޅުވިއެވެ.

ސިރާޖް ވިދާޅުވީ، ގިނަ އަދަދެއްގެ ފައިސާ ވެމްކޯއަށް ލިބެންޖެހޭކަމަށް ރެކޯޑުތަކުން ދެއްކިނަމަވެސް، ކުރިއާ އަޅައިބަލާއިރު ބިލު ދެއްކުން ކުރިއަށްވުރެ ރަނގަޅުކަމަށެވެ. އެގޮތުން، 80-90 އިންސައްތައާ ދެމެދުގެ މީހުން ބިލު ދެއްކުމަށް ސަމާލުކަންދޭކަމަށް ވެސް އޭނާ ވިދާޅުވިއެވެ.

ސަރުކާރުން މިއަހަރު މަޖިލީހަށް ހުށަހަޅާފައިވާ ވޭސްޓް މެނޭޖްމަންޓް ބިލުގައި، ޔުޓިލިޓީ ބިލުތަކާއެކު ކުނީގެ ބިލު ދައްކަން ޖެހޭ ގޮތަށް ބަދަލު ގެންނަން ވަނީ ހުށަހަޅައިފައެވެ. މިއީ ބިލު ނުދެއްކުމުގެ މައްސަލަ ހައްލު ކުރުމުގެ ގޮތުން ސަރުކާރުން އަޅާ ފިޔަވަޅެއް ކަމަށް އެންވަޔަރަމަންޓް މިނިސްޓްރީން ބުނެއެވެ.

މާލެއާއި ވިލިމާލެއާއި ހުޅުމާލެ ހިމެނޭހެން ވެމްކޯގައި މިހާތަނަށް 12،000އެއްހާ ގޭބިސީ ރަޖިސްޓްރީކޮށްފައިވާކަމަށް ވެމްކޯއިން ބުނެއެވެ.