ސީރިއާގައި ތިބި ދިވެހިން ގެނައުމަށް ސަރުކާރުން ނިންމުމުން އދ.ން މަރުހަބާ ކިޔައިފި
25 މެއި 2022 | ބުދަ 13:36ރާއްޖޭގައި ރީއިންޓަގްރޭޝަން ކަންކަން ބައިނަލްއަގުވާމީ މިންގަނޑުތަކާ އެއްގޮތަށް ކުރިއަށް ގެންދިއުމަށް އދ.ގެ ޚާއްސަ ރެޕޮޓަރ އިރުޝާދުދެއްވި
އދ.ގެ ސްޕެޝަލް ރެޕޮޓަރ، ފިނޫލާ ނީ އައޮލެއިން
ސީރިއާގައި ހާލުގައި ޖެހިފައި ތިބި ދިވެހި އަންހެނުންނާއި ކުޑަކުދިން އަނބުރާ ރާއްޖެ ގެނައުމަށް ސަރުކާރުން ނިންމާފައިވާތީ އެ ނިންމުމަށް އދ.ން މަރުހަބާ ކިޔައިފިއެވެ.
އދ.ން ޓެރަރިޒަމާ ދެކޮޅަށް ކުރާ މަސައްކަތުގައި އިންސާނީ ހައްގުތަކާއި އަސާސީ ހައްގުތައް ހިމާޔަތްކޮށް ކުރިއެރުވުމަށް ކަނޑައަޅާފައިވާ ސްޕެޝަލް ރެޕޮޓަރ، ފިނޫލާ ނީ އައޮލެއިން ރާއްޖެއަށް ކުރެއްވި ޒިޔާރަތުގައި ނޫސްވެރިންނާ ބައްދަލުކުރައްވައި ވިދާޅުވީ، އިރު އުތުރު ސީރިއާގެ އަލް ހޮލް އަދި ރޮޖް ކޭމްޕްތަކުގައި ތިބި ދިވެހި އަންހެނުންނާއި ކުޑަކުދިން އަނބުރާ ގެނައުމަށް އަވަސް ފިޔަވަޅުތަކެއް އަޅަން ޖެހޭ ކަމަށެވެ. އެގޮތުން އެ ކެޕޭމްޕްތަކުގައި 50 އަށްވުރެ ގިނަ ދިވެހިން ހާލުގައި ޖެހިފައިގާކަމަށް ލަފާކުރެވޭ ކަމަށް އޭނާ ވިދާޅުވިއެވެ.
ނީ އައޮލެއިން ވިދާޅުވި ގޮތުގައި، ސީރިއާގައި ތިބި ކުޑަކުދިން ދިރިއުޅެމުން ދަނީ ދިރިއުޅެން އެކަށީގެން ނުވާ ފަދަ ބިރުވެރި މާހައުލެއްގައި، ބަންދުވެގެން ކަމަށެވެ. އަދި އެއީ ޓެރަރިޒަމްގެ އަނިޔާ ލިބިފައިވާ ކުދިން ކަމަށާއި، އެ ކުދިންނާ ދޭތެރޭ ފުރިހަމަ އިހުތިރާމާއި އިންސާނީ ކަރާމަތާއެކު އަމަލުކުރަން ޖެހޭނެ ކަމަށްވެސް އޭނާ ވިދާޅުވިއެވެ.
ސީރިއާގައި ތިބި ދިވެހިން ރާއްޖެއަށް ގެނައުމަށްޓަކައި އދ.ން ދިވެހި ސަރުކާރަށް ފުރިހަމަ އެއްބާރުލުން ދޭނެކަމަށްވެސް ނީ އައޮލެއިން ވިދާޅުވިއެވެ.
ރާއްޖެއިން ޓެރަރިޒަމާ ދެކޮޅަށް ކުރަމުން އަންނަ މަސައްކަތްތަކުގެ ދަށުން ގާނޫނު އިސްލާހު ކުރުމަށް ސަރުކާރުން ފަށާފައިވާ މަސައްކަތްތައް ފާހަގަކުރައްވައި ނީ އައޮލެއިން ވަނީ، އެ ގާނޫނަކީވެސް ބައިނަލްއަގުވާމީ އިންސާނީ ހައްގުތަކުގެ މިންގަނޑުތަކަށް ފެތޭ ގާނޫނަކަށް ހަދަން ބާރުއަޅުއްވާފައެވެ. އަދި ޖަލުތަކުގެ ހާލަތު ރަނގަޅުކޮށް ޝަރުއީ ދާއިރާގެ މިނިވަންކަން ޔަގީންކުރުމާއި، ތަހުގީގު މަރުހަލާގައި ގާނޫނާ ޚިލާފަށް ކުރާ ހުރިހާ ކަމަކަށް ފުލުހުން ޒިންމާދާރުކުރުވަން ޖެހޭކަމަށް އޭނާ ވިދާޅުވިއެވެ.
ނީ އައޮލެއިން ރާއްޖެއަށް ކުރެއްވި ޒިޔާރަތުގައި އޭނާ ވަނީ ސަރުކާރުގެ އޮފިޝަލުންނާއި ފުލުހުންނާއި ސިފައިންނާއި ކަރެކްޝަނަލް ސަރވިސަސްގެ ބޭފުޅުންނާ ބައްދަލު ކުރައްވާފައެވެ. އަދި ދީޏ ލީޑަރުން ހިމެނޭ ހެން މަދަނީ ޖަމިއްޔާތަކާ ވެސް އޭނާ ބައްދަލު ކުރެއްވިއެވެ.
މީގެ އިތުރުން ރާއްޖޭހައި މީހުން ބަންދުކޮށްފައި ބައިތިއްބާ 3 ތަނަކަށް ނީ އައޮލެއިން ޒިޔާރަތް ކުރެއްވިއެވެ.
