މިއަހަރު ހައްޖަށް މީހުން ގެންދަން ކޯޓާ ދެނީ ހައްޖު ކޯޕަރޭޝަނަށް އެކަނި
ރާއްޖެއަށް މިއަހަރު ދިނީ 453 ހައްޖު ކޯޓާ
އުމްރާ
މިއަހަރު ހައްޖުގެ އަޅުކަން އަދާކުރަން ރާއްޖެއަށް ދީފައިވަނީ 453 ކޯޓާ ކަމަށާޢި އެ ކޯޓާގައި މީހުން ގެންދިއުމުގެ ފުރުސަތު ދޭން ނިންމާފައިވަނީ ހަމައެކަނި ހައްޖު ކޯޕަރޭޝަނަށް ކަމަށް އިސްލާމިކް މިނިސްޓްރީން ބުނެފިއެވެ.
އެ މިނިސްޓްރީން ހޯމަ ދުވަހު ނެރުނު ބަޔާނެއްގައި ބުނީ 453 ކޯޓާ ވެސް ހައްޖު ކޯޕަރޭޝަނަށް ދޭން ނިންމީ އަމިއްލަ ޖަމާއަތްތަކަށް ހުޅުވާލައިގެން، ޕްރޮޕޯސަލް ހުށަހަޅައި އިވެލުއޭޓް ކުރަން އެކަށީގެންވާ މުއްދަތެއް ނެތުމުން ކަމަށެވެ. އަދި މިހާރުގެ ހާލަތަށް ރިއާޔަތްކޮށް ސަރުކާރުން ކަނޑައަޅާފައިވަނީ ހައްޖު ކޯޕަރޭޝަނަށް އެ ފުރުސަތު ދޭން ކަމަށް ވެސް ވަނީ ބުނެފައެވެ.
ހައްޖު ކޯޕަރޭޝަނަށް ދޭ ކޯޓާގެ ތެރެއިން 353 ކޯޓާ ދޫކުރަން ނިންމާފައިވަނީ މިހާރު ރަޖިސްޓްރީ ކޮށް ކިޔޫގައި ތިބި މީހުންނަށެވެ. އަދި 100 ކޯޓާ އާއްމުންނަށް ދޫކުރަން ވަނީ ނިންމާފައެވެ. މި 100 ކޯޓާއަށް ހައްޖު ކޯޯޕަރޭޝަނުގައި ކިޔޫގައި ތިބި ފަރާތްތަކަށް ވެސް ކުރިމަތިލެވޭނެއެވެ.
އާއްމުންނަށް 100 ކޯޓާ ދޫކުރަން ނިންމީ އާއްމުންގެ ތެރެއިން އެއްވެސް ތަނަކަށް ފައިސާ ނުދައްކައި ތިބި ފަރާތްތަކަށް މިއަހަރު ހައްޖަށް ދިއުމުގެ ފުރުސަތު ދޭން ކަމަށް އިސްލާމިކް މިނިސްޓްރީން ބުންޏެވެ. އެ 100 ކޯޓާ ދޫކުރާ އުސޫޅު ހައްޖު ކޯޕަރޭޝަނުން އާއްމު ކުރާނެ ކަމަށް ވެސް މިނިސްޓްރީން ބުނެފައިވެއެވެ.
މީގެ ކުރިން އާއްމުކޮށް ކޮންމެ އަހަރަކު ރާއްޖެއަށް 1000 ހައްޖު ކޯޓާ ސައުދީން ދޫކުރެއެވެ. ނަމަވެސް ކޮވިޑާ ގުޅިގެން ގިނަ ޤައުމުތަކަށް ދޭ ކޯޓާތައް ވަނީ މަދުކޮށްފައެވެ.
ރާއްޖެއަށް މިއަހަރު އަދި އިތުރު ކޯޓާ ހޯދުމުގެ މަސައްކަތް ސަރުކާރުން ކުރަމުން އަންނަ ކަމަށް އިސްލާމިކް މިނިސްޓްރީން މައުލޫމާތު ދީފައިވެއެވެ.
