ރާއްޖެ އިޝްތިހާރުކުރުމަށް "ރިޔާޟް ޓްރެވަލް ފެއަރ"ގައި ބައިވެރިވެއްޖެ
ރިޔާޟް ޓްރެވަލް ފެއަރ ކުރިއަށް ދަނީ މޭ 22ން 24ށް
ރިޔާޟް ޓްރެވަލް ފެއަރ
މެދުއިރުމަތީގެ މާކެޓުގައި ރާއްޖެ އިޝްތިހާރުކުރުމަށް ސައޫދީގައި ކުރިއަށްދާ ފަތުރުވެރިކަމުގެ އެންމެ ބޮޑު އެއް ހަރަކާތް "ރިޔާޟް ޓްރެވަލް ފެއަރ"ގައި މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ/ވިޒިޓް މޯލްޑިވްސް) ބައިވެރިވެއްޖެއެވެ.
ރިޔާޟް ޓްރެވަލް ފެއަރ ކުރިއަށްދަނީ މޭ 22-24އަށެވެ. މި ފެއަރއަކީ ސައޫދީގެ ވެރިރަށް ރިޔާޟުގައި ކޮންމެ އަހަރަކު ކުރިއަށް ގެންދާ ފަތުރުވެރިކަމުގެ އެންމެ ބޮޑު އެއް ހަރަކާތެވެ. މި ހަރަކާތުގައި ސައޫދީ އަދި ޖީސީސީގެ ގައުމުތަކާއި، މި ގައުމުތަކުގެ ފަތުރުވެރިކަމާބެހޭ އެންމެ ބޮޑެތި ކުންފުނިތައް ބައިވެރިވެއެވެ. އަދި ބައިނަލްއަގުވާމީ ފެންވަރުގައި ފަތުރުވެރިކަމުގެ ޚިދުމަތްދޭ، އަދި ލިބިގަންނަ ފަރާތްތަކުން މިފެއަރއަށް އެގްޒިބިޓްކޮށް ޒިޔާރަތްކުރެއެވެ. މިއީ ފަތުރުވެރިކަމުގެ ޕްރޮޑަކްޓްތަކާއި ޚިދުމަތްތައް ޝޯކޭސްކޮށް، އިންވެސްޓަރުން އެއްތަނަކުން ބައްދަލުކުރާ އެންމެ ބޮޑު އެއް ހަރަކާތެވެ. އަދި، އައު ޚިދުމަތްތަކާއި ޕްރޮޑަކްޓްތައް ތައާރަފްކުރާ ފެއަރއެކެވެ.
އެމްއެމްޕީއާރުސީއާއެކު މި ފެއަރގައި ރާއްޖޭގެ އިންޑަސްޓްރީގެ 11 ފަރާތްތަކުން ބައިވެރިވިއެވެ. މީގެތެރޭގައި ބްލިސް މޯލްޑިވްސް، އެކްސައިޓިންގް ޓްރެވެލް ހޮލިޑޭސް، ގެޓް މީ ޓު މޯލްޑިވްސް، އިންޓުއަރ މޯލްޑިވްސް، އަައިލެންޑް ލައިފް ޓްރެވެލް، ލިލީ ހޮޓެލްސް ހައިޑަވޭ ބީޗް ރިސޯޓު އެންޑް ސްޕާ، މަލަހިނި ކުޑަ ބަނޑޮސް، ޓްރެވެލް ކަނެކްޝަން މޯލްޑިވްސް، ޓްރެވެލް އެސްކޭޕްސް މޯލްޑިވްސް، ހޮލިޑޭ ސްޕޮޓް މޯލްޑިވްސް އަދި ވިލާ ހޮޓެލްސް އެންޑް ރިސޯޓްސް ހިމެނެއެވެ. މި ފެއަރގައި ރާއްޖެއަކީ ފަތުރުވެރިން ދަތުރުކުރުމަށް އެންމެ ރައްކާތެރި މަންޒިލްގެ ގޮތުގައި ޕްރޮމޯޓުކޮށް، ރާއްޖޭގެ ރަށްތައް ގުދުރަތީގޮތުން އުފެދިފައިވަނީ ވަކިވަކިން ކަމަށްވުމާއެކު، ފަތުރުވެރިންނަށް ލިބިދޭ ރައްކާތެރިކަމާއި އެކަހެރިކަން ޕްރޮމޯޓުކުރިއެވެ. މީގެއިތުރުން ރާއްޖޭގެ ޓޫރިޒަމް ޕްރޮޑަކްޓްތައް ކަމަށްވާ ރިޒޯޓް، ހޮޓެލް، ގެސްޓްހައުސް އަދި ލިވަބޯޑުތަކުގެ މައުލޫމާތާއި، ރާއްޖެއިން ފަތުރުވެރިންނަށް ލިބެންހުރި ތަފާތު ތަޖުރިބާތައްވެސް މާކެޓް ކުރެވުނެވެ. އަދި ފަތުރުވެރިކަމުގެ އެކި ސެގްމަންޓުތައް ކަމަށްވާ ލަގްޒަރީ، ރޮމާންޓިކް، ފެމިލީ، އަދި މައިސް ސެގްމެންޓަށް ދެވޭ ޚިދުމަތްތައްވެސް ޕްރޮމޯޓުކޮށް، ރާއްޖޭގެ ޓްރެވަލް ގައިޑްލައިންތަކާއި މައުލޫމާތު ފެއަރއަށް ޒިޔާރަތްކުރި ފަރާތްތަކާ ހިއްސާކުރިއެވެ.
ރިޔާޟް ޓްރެވަލް ފެއަރގައި ބައިވެރިވަމުން މިދަނީ އެމްއެމްޕީއާރުސީން މި މާކެޓަށް ގެންގުޅޭ މާކެޓިން ސްޓްރެޓަޖީގެ ދަށުން، މެދުއިރުމަތީގެ ގައުމުތަކުން ރާއްޖެ އައުމަށް ފަތުރުވެރިން ބުކިންގ ހަދާ މިންވަރު އިތުރުކޮށް، އެރައިވަލްސް އިތުރުކުރުމުގެ މަގުސަދުގައެެވެ. އަދި މި ހަރަކާތަކީ ރަޝިއާ ޔޫކްރެއިން ހަނގުރާމައިގެ ސަބަބުން ހަލުވިކަމާއެކު ބަދަލުވަމުންދާ ދުނިޔޭގެ ޖިއޯޕޮލިޓިކަލް ހާލަތަށް ބިނާކޮށް، ރާއްޖެ އަންނަ ފަތުރުވެރިންގެ އަދަދަށް ކޮށްފާނެ ނޭދެވޭ އަސަރު ކުޑަކުރުމުގެ ގޮތުން އެމްއެމްޕީއާރުސީން އެކުލަވާލައިފައިވާ ޝޯޓް-ޓާރމް ސްޓްރެޓަޖީގެ ދަށުން މުހިންމު މާކެޓްތަކުގައި ހިންގާ ހަރަކާތްތަކުގެތެރޭގައި ހިމެނޭ ހަަރަކާތެކެވެ.
ވޭތުވެދިޔަ އަހަރު 91,413 ފަތުރުވެރިން ވަނީ މެދުއިރުމަތީ މާކެޓްއިން ދިވެހިރާއްޖެއަށް ޒިޔާރަތްކޮށްފައެވެ. އަދި، ސައޫދީ އަރަބިއްޔާއަކީ އެ އަހަރު ދިވެހިރާއްޖެއަށް 7 ވަނައަށް އެންމެ ގިނައިން ފަތުރުވެރިން ދަތުރުކުރި މާކެޓެވެ. މި އަހަރު ޖަނަވަރީ މަހާ ހަމައަށް 5،103 ފަތުރުވެރިންވަނީ މެދުއިރުމަތީ މާކެޓުން ރާއްޖެއަށް ޒިޔާރަތްކޮށްފައެވެ. މި މާކެޓްގައި ދިވެހިރާއްޖޭގެ ރީތި ނަން ދަމަހައްޓައި، ރާއްޖެ އިޝްތިހާރުކުރުމަށްވަނީ ގިނަ ހަރަކާތްތަކެއް ރާވާފައެވެ. މީގެ ތެރޭގަ ޖޮއިންޓް މާކެޓިންގ ކެމްޕެއިންތަކާއި, ވެބިނާތަކާއި, ފެމިލިއަރައިޒޭޝަން ޓްރިޕްތަކާއި, ރޯޑްޝޯވތަކުގެ އިތުރުން ބޮޑެތި ފެއަރތަކުގައި ބައިވެރިވުން ހިމެނެއެވެ.
ދުނިޔޭގެ ފެންވަރުގައި ރާއްޖެ އިޝްތިހާރުކުރުމުގެ ޒިންމާ އުފުލާ ކުންފުނީގެ ހައިސިއްޔަތުން އެމްއެމްޕީއާރްސީން ވޭތުވެދިޔަ އަހަރު ކޮށްފައިވާ މަސައްކަތްތަކަށް ބަލާއިރު، އިންޑަސްޓްރީގެ ޕާޓްނަރުންނާއެކު 22 މާކެޓެއްގައި 260 ހަރަކާތް ވަނީ ހިންގާފައެވެ. މީގެތެރޭގައި ފެއަރތަކާއި އެގްޒިބިޝަންތަކުގައި ބައިވެރިވުމުގެ އިތުރުން، އެކި ގައުމުތަކުގައި ރޯޑްޝޯވތައް ވެސް ވަނީ ބާއްވާފައެވެ. އަދި ވެބިނާތަކާއި، ފެމިލަރައިޒޭޝަން ދަތުރުތަކުގެ އިތުރުން މާކެޓިން ގކެމްޕެއިންތައް ވަނީ ހިންގާފައެވެ. ދުނިޔޭގެ ހުރިހާ ކަންކޮޅެއްގައިވެސް ރާއްޖެއަކީ ފަތުރުވެރިންގެ އިތުބާރު ލިބިފައިވާ މަންޒިލެއްކަމަށް ހެކިވާ އެންމެ އަލިގަދަ ނިޝާނަކަށް ވެގެންދިޔައީ، 'ވޯރލްޑް ޓްރެވަލް އެވޯރޑްސް' (ޑަބްލިއުޓީއޭ) 2021ގައި 'ވޯލްޑްސް ލީޑިންގް ޑެސްޓިނޭޝަން'ގެ ލަގަބު ޖެހިޖެހިގެން ދެވަނަ އަހަރަށް ރާއްޖެއަށް ކާމިޔާބު ކުރެވުނުކަމެވެ. މީގެ އިތުރުންވެސް ދިވެހިރާއްޖެއިން ވަނީ ޑަބްލިއުޓީއޭ 2021ގައި އެތައް ޚާއްސަ އެވޯޑްތަކެއް ހާސިލްކޮށްފައެވެ.
ކުރިޔަށް މިދާ އަހަރަކީ ދިވެހިރާއްޖޭގެ ފަތުރުވެރިކަމުގެ ތާރީޚުގައި ވަރަށް ޚާއްސަ އަހަރެކެވެ. ރާއްޖޭގެ ފަތުރުވެރިކަމަށް 50 އަހަރު ފުރުން ފާހަގަކުރުމުގެ ޚާއްސަ ހަރަކާތްތައް މިދިޔަ އަހަރު ފަށައިގަތީ ކުލަގަދަ ހަރަކާތްތަކަކާ އެކުގައެވެ. އެމްއެމްޕީއާރްސީގެ ފަރާތުން ރާއްޖޭގެ ޓޫރިޒަމްގެ ރަން ޔޫބީލް ފާހަގަކުރުމަށް އެތައް ހަރަކާތްތަކެއް ތާވަލްކޮށްފައިވެއެވެ.
