ޒުވާނުންނަކީ ކަންކަމުގައި އިސް ނަގާ ބަޔަކަށް ވާންޖެހޭ: މިނިސްޓަރ އިމްރާން
މީހަކު ގޯސްކަމެއް ކޮށްފިނަމަ އެމީހަކު އެކަމަކުން ދުރުކުރަންޖެހޭ
ހޯމް މިނިސްޓަރ އިމްރާން އަބްދުﷲ
ޒުވާނުންނަކީ އަމިއްލައަށް އިސްނަގައިގެން ކަންކުރާ ބަޔަކަށް ވާންޖެހޭކަމަށްވިދާޅުވެ ހޯމް މިނިސްޓަރ އިމްރާން އަބްދުالله އެކަމަށް އިލްތިމާސްކުރައްވައިފިއެވެ.
އެމަނިކުފާން މިކަމަށް އިލްތިމާސްކުރެއްވީ ހޯމް މިނިސްޓްރީގެ ޔޫތް ލީޑާރސް ނެޓްވޯކުން ށ.އަތޮޅުގައި ބޭއްވި ޔޫތް ލީޑާރސް ފޯރަމް ނިންމުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.
ށ.އަތޮޅުގެ 13 ރަށަކުން ބައިވެރިވި ސަތޭކައަށްވުރެ ގިނަ ޒުވާނުންނާ މުހާތަބުކުރައްވާ މިނިސްޓަރ ވިދާޅުވީ ކުރިއަށް ދިއުމުގައި އެންމެ މުހިއްމުކަމަކީ އެހެން މީހަކު ކުރޭތޯ ބަލަން ނުހުރެ, އަމިއްލައަށް އިސްނަގައިގެން ކަންކަން ކުރުންކަމަށެވެ. ކަންކަން ކުރި މީހުންނަށް ޝުކުރު އަދާކޮށް, އެމީހުންނަށް ހެޔޮ ދުއާކުރުމަށްފަހު ނުކޮށް ދޫކޮށްލެވިފައި ހުރި ކަންކަން ކުރުމަށް އިސްނެގުމަކީ ލީޑަރުންގެ ސިފައެއްކަން މިނިސްޓަރ ފާހަގަކުރެއްވިއެވެ. ހަމައެއާއެކު މިނިސްޓަރ ވިދާޅުވީ އެހެން މީހަކު ކަނޑައެޅިގެން ނުބައިކޮށް, ގޯސްކޮށް ކަމެއް ކުރާނަމަ ވެވުނު ގޮތަކުން އޭނަ ދުރުކޮށް, އެކަން ތިމާ އަމިއްލައަށް ކުރަންވާނެކަމަށެވެ. އެއީވެސް ލީޑަރުންގެ ސިފައެއްކަމަށް މިނިސްޓަރ ވިދާޅުވިއެވެ.
މިނިސްޓަރ އިމްރާން ވިދާޅުވީ އެންމެ ބުއްދިވެރި މީހަކީ ލިބޭ ގިނަ މައުލޫމާތުތަކުގެ ތެރެއިން އެންމެ މުހިއްމު ވާހަކަތަކަށް ވިސްނާ, ސަމާލުކަން ދީގެން އަމަލުކުރާ މީހާކަމަށެވެ. މިދިޔަ ތިން ދުވަހު ފޯރަމްގެ ބައިވެރިންނަށް ގިނަ މައުލޫމާތުތަކެއް ލިބުނުކަން ފާހަގަކުރައްވާ މިނިސްޓަރ ވިދާޅުވީ ރަނގަޅު ފެސިލިޓޭޓަރުންނާއެކު ފޯރުކޮށް ދެވުނު މައުލޫމާތުގެ ފައިދާ ކުރާނެކަމަށް އުއްމީދުކުރައްވާކަމަށެވެ.
ފޯރަމް ނިންމުމުގެ ރަސްމިއްޔާތުގައި ވާހަކަދެއްކެވި ދެ ބައިވެރިންވެސް ފާހަގަކުރެއްވީ މިއީ ކާމިޔާބު ފޯރަމެއްކަމެވެ. އަދި ލިބުނު މައުލޫމާތުގެ އަލީގައި އެނބުރި ރަށަށްގޮސް އަމަލީ ގޮތުން މަސައްކަތްކުރާނެކަމުގެ ޔަގީންކަން ދިނެވެ. ފޯރަމްގެ ބައިވެރިން މަސައްކަތްކުރާނީ ލީޑަރުންގެ ގޮތުގައި އިސްނަގައިގެން މަސައްކަތްކޮށް ރަށުގެ ހާލަތު ރަނގަޅުކޮށް ކުރިއެރުވުމަށްކަން ބައިވެރިން ފާހަގަކުރިއެވެ.
ށ.އަތޮޅަށް އަމާޒުކުރި ފޯރަމް މިމަހުގެ 19-21 އަށް ކުރިއަށްގެންދިޔައީ މިލަންދޫގައެވެ. ފޯރަމް ކުރިއަށްގެންދިއުމުގައި މިލަންދޫ ކައުންސިލާއި, މިލަންދޫ ރައްޔިތުންގެ ފަރާތުން ބޮޑު އެއްބާރުލުމެއް ލިބުނެވެ. އަތޮޅުގެ 13 ރަށަކުން ފޯރަމްގައި ޒުވާނުން ބައިވެރިވިއެވެ.
