މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)ގެ ފްލީޓް ބޮޑުކުރުމަށްޓަކައި، އަންނަ ޖުލައި މަހު އިތުރު ދެ ޑްރެޖަރ ގެންނާނެކަމަށް އެ ކުންފުނީގެ ސީއީއޯ އާދަމް އާޒިމް ވިދާޅުވެއްޖެއެވެ.
އާޒިމް މިހެން ވިދާޅުވީ ބުރާސްފަތި ދުވަހުގެ ރޭ ބޭއްވި އެމްޓީސީސީގެ އަހަރީ އާއްމު ޖަލްސާ ނިންމަވާލެއްވުމަށްފަހު ނޫސްވެރިންނަށް މައުލޫމާތު ދެއްވަމުންނެވެ. އެމްޓީސީސީގެ ފްލީޓަކީ މިހާރުވެސް ރާއްޖޭގެ ކުންފުންޏެއްގައި އޮތް އެންމެ ބޮޑު ފްލީޓުކަން ފާހަގަ ކުރައްވައި، އެ ފްލީޓް އިތުރަށް ބޮޑުކުރުމަށް މަސައްކަތް ކުރައްވަމުން ގެންދަވާ ކަމަށް އާޒިމް ވިދާޅުވިއެވެ. އެގޮތުން ޖުލައި އެ ފްލީޓާ ދެ ޑްރެޖަރ ގުޅޭނެކަމަށް ވިދާޅުވިއެވެ.
އާޒިމް ވިދާޅުވީ އެމްޓީސީސީއަކީ ބިން ހިއްކުމުގެ ގިނަ މަޝްރޫއުތަކެއް ހިންގާ ކުންފުންޏަކަށްވުމުން، އިތުރު ދެ ޑްރެޖަރ ގެނައުމުން އެ މަސައްކަތް ކުރުމަށް ލިބޭ އިތުރު ބާރަކަށްވާނެ ކަމަށެވެ.
އެމްޓީސީސީއަކީ ރާއްޖޭގެ އުމްރާނީ ތަރައްގީގެ އެންމެ ބޮޑު ކުންފުންޏަށް ހެދުމުގެ ވިސްނުން އެ ކުންފުނީގެ ބޯޑުން ގެންގުޅުއްވާކަން ފާހަގަ ކުރައްވައި އާޒިމް ވިދާޅުވީ، އެ މަސައްކަތްތައް މިހާރުވެސް ކުރަމުން އަންނަ ކަމަށެވެ. މިހާރުވެސް ކުންފުނީގެ ގިނަ އިކުއިޕްމަންޓުތަކަކީ އާ އިކުއިޕްމަންޓުތަކެއް ކަމަށާއި، ކުރިއާ އަޅާ ބަލާއިރު މުވައްޒަފުންނާއި އިކުއިޕްމަންޓުވެސް ދެ ގުނަ އިތުރު ކުރެވިފައިވާ ކަމަށް އޭނާ ވިދާޅުވިއެވެ.
މުޅި ފްލީޓް ކަހަލަ ގޮތަކަށް އާކުރެވިފަ މިހާރު މިވަނީ. އަދި ކުރިއަށް އޮތްތަނުގަ އާ 2 ޑްރެޖަރ، ޖުލައި މަސްތެރޭގަ އަޅުގަނޑުމެންނާ ޖޮއިންކުރާނެ. މިއާއެކު ހިއްކުމުގެ މަސައްކަތްތައް ހަލުވިވެ ބާރުވެގެންދާނެ. އަޅުގަނޑުމެންނަށް އުންމީދު ކުރެވެނީ، މި ކުންފުންޏަކީ މުސްތަގުބަލުގައި ދިވެހިރާއްޖޭގައި އޮތް އެންމެ ވަރުގަދަ އެންމެ ކާމިޔާބު އެއް ކުންފުންޏަށް ވެގެންދާނެކަމަށް.އެމްޓީސީސީގެ ސީއީއޯ އާދަމް އާޒިމް
އާޒިމް ވިދާޅުވި ގޮތުގައި މި ސަރުކާރު އައުމުގެ ކުރިން އެމްޓީސީސީގައި 1500 މުވައްޒަފުން ތިބިއިރު މިހާރު 3600އަށްވުރެ ގިނަ މުވައްޒަފުން އެބަތިއްބެވެ.
އެމްޓީސީސީ ބޮޑު ކުންފުންޏަކަށް ހަދަން އެ ކުންފުނިން ރިއަލް އެސްޓޭޓްގެ ބޮޑެތި ވިޔަފާރިތަކަށް ވެއްދުމުގެ ވިސްނުން ގެންގުޅުއްވާކަމަށް ވެސް އާޒިމް ވިދާޅުވިއެވެ. އެއީ ކުރިއަށް އޮތް އަހަރުތަކުގައި ރާއްޖޭގެ ގޮނޑުދޮށް ހިމާޔަތް ކުރުމާއި އެއާޕޯޓް އެޅުމާއި ބަނދަރު ހެދުން ފަދަ މަސައްކަތްތައް ނިމި، ކުންފުންޏަށް ލިބޭ އެފަދަ ޕްރޮޖެކްޓުތައް މަދުވާނެކަމަށް ލަފާކުރެވޭތީ، ކުރަން ނިންމާފައިވާ ކަމެއްކަމަށް ވެސް އާޒިމް ވިދާޅުވިއެވެ.
މީގެ އިތުރުން އެ ކުންފުންޏަކީ ބްރިޖް ހެދުން ފަދަ ބޮޑެތި މަޝްރޫއުތައް ހިންގޭވަރުގެ ކުންފުންޏަކަށް ހައްދަވަން މިހާރުވެސް މަސައްކަތް ކުރައްވަމުން އަންނަ ކަމަށާއި، ދުނިޔޭގެ ފެންވަރުގައި ވާދަ ކުރެވޭ ފަދަ ކުންފުންޏަކަށް އެމްޓީސީސީ ހަދަން ސަރުކާރުން ވަރަށް ބޮޑު އެއްބާރުލުމެއް ލިބިގެންދާ ކަން އާޒިމް ފާހަގަ ކުރެއްވިއެވެ.
