ވިސްނުން ހުރީ ރިއަލް އެސްޓޭޓްގެ ބޮޑެތި ވިޔަފާރިތަކަށް ވަންނަން: އާޒިމް
އާޒިމް ވިދާޅުވީ ބޮޑެތި ޕްރޮޖެކްޓްތައް ފަށަން މިހާރުވެސް މަސައްކަތް ކުރަމުން އަންނަ ކަމަށް
އެމްޓީސީސީގެ ސީއީއޯ އާދަމް އާޒިމް
ރިއަލް އެސްޓޭޓްގެ ކުދި ވިޔަފާރިތަކަށް ނުވަންނާނެ ކަމަށާއި ވިސްނުން ހުރީ ބޮޑެތި ވިޔަފާރިތަކަށް ވަންނަން ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) ގެ ސީއީއޯ އާދަމް އާޒިމް ވިދާޅުވެއްޖެއެވެ.
އާޒިމް މިހެން ވިދާޅުވީ ބުރާސްފަތި ދުވަހު ބޭއްވި އެމްޓީސީސީގެ އަހަރީ އާއްމު ޖަލްސާގައި އެ ކުންފުނީގެ ހިއްސާދާރަކު ކުރެއްވި ސުވާލަކަށް ޖަވާބުދެއްވަމުންނެވެ. އާޒިމް ވިދާޅުވީ މާލޭގައި ހިންގާ ރިއަލް އެސްޓޭޓް ޕްރޮޖެކްޓުތަކަކީ ކުދި ޕްރޮޖެކްޓުތައް ކަމަށާއި އެއަށް ވަންނަން ނުވިސްނަވާ ކަމަށެވެ. އޭގެ ބަދަލުގައި އެމްޓީސީސީން ހަދާނީ ބޮޑެތި ހައުސިން ޔުނިޓުތައް ކަމަށް އޭނާ ވިދާޅުވިއެވެ.
ވިޔަފާރި ފުޅާކުރުމަށް ނިންމާފައިވަނީ ކުރިއަށް އޮތް ދެ އަހަރު ދުވަހުގެ ތެރޭގައި ރާއްޖޭގެ ބަނދަރުތަކާއި ބިން ހިއްކުމާއި އެއާޕޯޓްގެ ގިނަ މަޝްރޫއުތައް ނިމި، އެފަދަ މަޝްރޫއުތައް ލިބޭގޮތް މަދުވާނެތީ ކަމުގައި އާޒިމް ވިދާޅުވިއެވެ.
ނޫސްވެރިންނަށް މައުލޫމާތު ދެއްވަމުން އާޒިމް ވިދާޅުވީ އަމާޒަކީ އެމްޓީސީސީއަކީ ރާއްޖޭގެ އުމްރާނީ ތަރައްޤީގެ ބޮޑެތި މަޝްރޫއުތައް ހިންގުމުގައި އެންމެ ކުރީގައި އޮންނަ ކުންފުންޏަށް ހެދުން ކަމަށެވެ. އެގޮތުން، މިހާރު ވެސް މަސައްކަތް ފަށާފައިވާ ކަމަށާއި އެކަން ކުރުމުގައި ސަރުކާރުގެ އެއްބާރުލުންވެސް ލިބޭ ކަމަށް އޭނާ ވިދާޅުވިއެވެ.
ބޮޑެތި ޕްރޮޖެކްޓުތައް ފަށަން ތައްޔާރުވެފައިވާ ކަން ފާހަގަކުރައްވާ އާޒިމް ވިދާޅުވީ އެ ކުންފުނީގެ ކެޕޭސިޓީ ވެސް ކުރިއާ އަޅާބަލާއިރު ދެ ގުނަ އިތުރު ކުރެވިފައިވާ ކަމަށެވެ. އެގޮތުން ކުރިން އެއްފަހަރާ 20 ޕްރޮޖެކްޓް އެ ކުންފުންޏަށް ހިންގޭއިރު މިހާރު އެއްފަހަރާ 100 ޕްރޮޖެކްޓް ހިންގޭ ވަރަށް އިކުއިޕްމަންޓާއި މުވައްޒަފުން ތިބިކަމަށް އޭނާ ވިދާޅުވިއެވެ.
އާޒިމް އިތުރަށް ވިދާޅުވީ ކުންފުނީގެ ފައިދާ އަހަރަކަށްފަހު އަހަރެއް އިތުރުވަމުން އަންނައިރު، ބޭނުންވަނީ ކޮންމެ އަހަރެއްގެ ފައިދާ 50 މިލިއަން ރުފިޔާއަށް އިތުރު ކުރުންކަމަށެވެ. އެގޮތުން މި އަހަރުގެ އަމާޒަކީ 300 މިލިއަން ރުފިޔާގެ ފައިދާއަކާއެކު އަހަރު ނިންމާލުން ކަމަށް އޭނާ ވިދާޅުވިއެވެ.
އާޒިމް ވިދާޅުވި ގޮތުގައި އެމްޓީސީސީން 2020 ވަނަ އަހަރު 200 މިލިއަން ރުފިޔާގެ ފައިދާއެއް ލަފާ ކުރިއިރު އަހަރު ނިމުނުއިރު 224 މިލިއަން ރުފިޔާ ލިބުނުކަމަށެވެ. އަދި 2021 ވަނަ އަހަރު 250 މިލިއަން ރުފިޔާ ލިބޭނެ ކަމަށް ލަފާ ކުރިއިރު އަހަރު ނިމުނުއިރު 270 މިލިއަން ރުފިޔާ ލިބިފައިވާ ކަމަށް ވެސް އޭނާ ވިދާޅުވިއެވެ.
