ސާފިން ލީގުގެ ޗެމްޕިއަންކަން އާގިލް ހޯދައިިފި

މ.މުލީގައި ކުރިއަށް ދިޔަ އެމްޓީސީސީ ސާފް ލީގުގެ ޗެމްޕިއަންކަން ކ. ތުލުސްދޫއަށް ނިސްބަތްވާ އަޙުމަދު އާގިލް (އައްމަޑޭ) ހޯދައިފިއެވެ.

އޭނާ މުބާރާތުގެ ޗެމްޕިއަންކަން ހޯދީ ގދ. ގައްދޫ ނަޖާހް މުހައްމަދު (ކަބޯ)ގެ މައްޗަށް ކުރި ހޯދައިގެންނެވެ. ނަޖާހުއާ ވާދަކޮށް އޭނާ ޗެމްޕިއަންކަން ހޯދީ 4.43 ގެ ތަފާތަކުންނެވެ.

ފައިނަލުން ބަލިވި ނަޖާހު ވަނީ މީގެ ކުރިން މާޗު މަހުގެ ތެރޭގައި ގައްދޫގައި ބޭއްވި "ކަޅެގަލެކޮޑާ" މުބާރާތުގެ ފައިނަލުގައި ވެސް ވާދަކޮށްފައެވެ. އެ މުބާރާތުގެ ފައިނަލުގައި އޭނާ ވާދަކުރީ އިސްމާއީލް ރަޝީދު (ސްމައިލީ) އާއެވެ.

އިއްޔެ ހަވީރު މުލީގައި ކުރިއަށް ދިޔަ ފައިނަލުގައި އައްމަޑޭ ވަނީ ހަތް ރާޅުން ޖުމުލަ 13.67 ގެ ސްކޯއެއް ހޯދާފައެވެ. ނަޖާހު ވަނީ އަށް ރާޅުން ޖުމުލަ 9.24 ގެ ސްކޯއެއް ހޯދާފައެވެ. ނަޖާހުއަށް އެންމެ ގިނަ ޕޮއިންޓު ހޯދުނީ ތިން ވަނަ ރާޅުގައެވެ. އެ ރާޅުގައި އޭނާ ވަނީ 5.87 ސްކޯ ކޮށްފައެވެ.

މުބާރާތުގެ ޖޫނިއާ ބައިގެ ޗެމްޕިއަންކަން ހޯދީ މ.މުއްޔަށް ނިސްބަތްވާ ޝާނިފް ޝަފީގެވެ. ޖޫނިއާ ބައިގެ ޗެމްޕިއަންކަން އޭނާ ހޯދީ މ.މުލަކަށް ނިސްބަތްވާ ޖުމާން މުހައްމަދާ ވާދަކޮށެވެ. ސާނިފް ޗެމްޕިއަންކަން ހޯދީ 2.89 ގެ ސްކޯއަކުން ޖުމާނުގެ މައްޗަށް ކުރި ހޯދައިގެންނެވެ.

އިއްޔެ މެންދުރު ކުރިއަށް ދިޔަ ޖޫނިއާ ބައިގެ ފައިނަލްގައި ސާނިފް ވަނީ އަށް ރާޅުން 14.43 ސްކޯ ކޮށްފައެވެ. ސާނިފަށް އެންމެ ގިނައިން ސްކޯ ކުރެވުނީ ހަތް ވަނަ ރާޅުގައެވެ. އެއީ 7.50 ގެ ސްކޯއެކެވެ. ސާނިފާ ވާދަކުރި ޖުމާނަށް އަށް ރާޅުން ހޯދުނީ 11.54 ގެ ސްކޯއެކެވެ. ޖުމާނަށް އެންމެ ގިނައިން ސްކޯ ކުރެވުނީ ހަަތަރު ވަނަ ރާޅުގައެވެ. އެ ރާޅުގައި އޭނާ ހޯދީ 6.67 ގެ ސްކޯއެކެވެ.

މޯލްޑިވްސް ސާފިން އެސޯސިއޭޝަނުން ނިންމާފައިވަނީ ޤައުމީ ސާފް ލީގު މި އަހަރު ރާއްޖޭގެ އެކި ކަންކޮޅުތަކުގައި ބޭއްވުމަށެވެ. އެގޮތުން ފަސް ސަރަހައްދެއްގައި މުބާރާތް ބާއްވަން ނިންމައި، ފުރަތަމަ މުބާރާތް ބޭއްވީ ގދ. ގައްދޫގައެވެ. މުލީގައި ކުރިއަށް ދިޔައީ ދެ ވަނަ މުބާރާތެވެ. ތިން ވަނަ މުބާރާތް ބޭއްވުމަށް ތާވަލްކޮށްފައި އޮތީ ޖުލައި 5-9 އަށް ރ.ކިނޮޅުހުގައެވެ. ހިންމަފުށީގައި ހަތަރު ވަނަ މުބާރާތް ކުރިއަށް ގެންދާނީ އޮކްޓޫބަރު 4-8 އަށެވެ. އަދި ފަސް ވަނަ މުބާރާތް ކުރިއަށް ގެންދާނީ މާލޭގައެވެ. ރަންނަމާރި ޗެލެންޖުގެ ނަމުގައި މާލޭގައި މުބާރާތް އޮންނާނީ ނޮވެމްބަރު 18-25 އަށެވެ.