ދަރަނިތައް ދައްކަން 1 މިލިއަން ޑޮލަރުވެސް ނެތް: ވިކްރަމަސިންގހަ

ގައުމުގެ ދަރަނިތައް ދައްކަން އެއް މިލިއަން ޑޮލަރުވެސް ނެތް ކަމަށް ސްރީލަންކާގެ ބޮޑުވަޒީރު ރަނިލް ވިކްރަމަސިންގހަ ވިދާޅުވެއްޖެއެވެ.

ސްރީލަންކާއަށް ވޯލްޑް ބޭންކްގެ ފަރާތުން 160 މިލިއަން އެމެރިކާ ޑޮލަރުގެ ލިބިފައިވާކަން އާންމު ކުރައްވާ ބުދަ ދުވަހު ދެއްކެވެރި ވާހަކަފުޅުގައި ބޮޑުވަޒީރު ވިކްރަމަސިންގހަ ވަނީ މި ފައިސާ އިން އެގައުމަށް ބޭނުންވާ ތެލުގެ އިމްޕޯޓަށް ހަރަދު ނުކުރެވޭނެ ކަމަށް ފާހަގަކުރައްވާފައެވެ. އެހެން ނަމަވެސް މިފައިސާ އެކަމަށް ބޭނުން ކުރެވޭތޯ ވޯލްޑް ބޭންކާއެކު މަޝްވަރާކުރައްވާނެ ކަމަށް ބޮޑުވަޒީރު ވިދާޅުވިއެވެ.

ބޮޑުވަޒީރު ވިކްރަމަސިންގހަ ވަނީ އޭޝިއަން ޑިވެލޮޕްމެންޓް ބޭންކް (އޭޑީބީ) އިން ވެސް މިއަދަދާ ގާތްގަޑަކަށް އެއް އަދަދެއްގެ އެހީ ލިބޭނެ ކަމަށް ވިދާޅުވެފައެވެ.

ސްރީލަންކާގެ މަޖިލިސް މެމްބަރެއް ކަމަށްވާ ހަރްޝަ ޑި ސިލްވާ ވަނީ ބުދަ ދުވަހު އެގައުމު ހާޑް ޑިފޯލްޓަކަށް ދާނެކަން ފާހަގަކުރައްވާފައެވެ. މިއީ ސްރީލަންކާގެ ތާރީހުގައި މިގޮތަށް އެގައުމު ޑިފޯލްޓަކަށް ދިޔަ ފުރަތަމަ ފަހަރެވެ.

މިކަމާ ގުޅިގެން ބޮޑުވަޒީރު ވިކްރަމަސިންގހަ ވަނީ އަންނަ ހަފުތާގެ ތެރޭގައި އެގައުމުގެ ދަރަނިތައް ދައްކާނެ ގޮތުގެ ރިޕޯޓެއް ފޯރުކޮށްދޭނެ ކަމަށް ވިދާޅުވެފައެވެ. ބޮޑުވަޒީރު ވަނީ ބައެއް ދަރަނީގެ މައުލޫމާތުތައް ރަނގަޅަށް ލިބެން ނެތް ކަމަށާއި ބައެއް ދަރަނިތަކުގެ މައުލޫމާތު ގޯސްކަމަށް ވިދާޅުވެފައެވެ.

ބޮޑުވަޒީރު ވިކްރަމަސިންގހަ ވަނީ އެއް ބިލިއަން ޑޮލަރު ވިޔަސް 10 ބިލިއަން ޑޮލަރުވިއަސް، ދަރަނިތައް ދައްކަން އެއް މިލިއަން ޑޮލަރުވެސް މިހާރު ގައުމުގައި ނެތް ކަމަށް ވިދާޅުވެ، މިއީ މިހާރުގެ ގައުމުގެ ހާލަތު ކަމަށް ވިދާޅުވެފައެވެ.