ޖަރުމަނުގެ ސަފީރަކަށް ޝާން އައްޔަންކުރަން ކޮމިޓީން ފާސްކޮށްފި
ޝާން މިވަގުތު ހުންނެވީ ފޮރިން މިނިސްޓްރީގެ ޗީފް އޮފް ޕްރޮޓޮކޯލްގެ މަގާމުގައި
ރާއްޖޭގެ ފުރަތަމަ އަންހެން ޕްރޮޓޮކޯލް، ޝާން
ރާއްޖެއިން ޖަރުމަނަށް ކަނޑައަޅާ ސަފީރުގެ މަގާމަށް ގ. ޕެންޒީމާގޭ އާއިޝަތު ޝާން ޝާކިރު ހަމަޖެއްސުމަށް ރައްޔިތުންގެ މަޖިލީހުގެ ޚާރިޖީ ގުޅުންތަކުގެ ކޮމިޓީން ފާސްކޮށްފިއެވެ.
އެ ކޮމިޓީން މިގޮތަށް ނިންމާފައިވަނީ ހޯމަ ދުވަހު ބޭއްވި ކޮމިޓީ ބައްދަލުވުމެއްގައެވެ. އެ ބައްދަލުވުމުގައި ޖަރުމަނަށް ކަނޑައަޅާ ސަފީރަަކަށް ޝާން ހަމަޖެއްސުމަށް ފާސްކޮށްފައިވަނީ އެ ކޮމިޓީ ބައްދަލުވުމުގައި ބައިވެރިވި މެމްބަރުންގެ އިއްތިފާގުންނެވެ.
ޖަރުމަނަށް ކަނޑައަޅާ ސަފީރަކަށް އައު ބޭފުޅަކު އައްޔަންކުރަން ނިންމާފައިވަނީ، އެ މަގާމުގައި ކުރިން ހުންނެވި އަހުމަދު ލަތީފް ރާއްޖެ ގެނެސް އެ މަގާމަށް ޝާން އައްޔަން ކުރެއްވުމަށް ރައީސުލް ޖުމްހޫރިއްްޔާ އިބްރާހީމް މުހައްމަދު ސޯލިހު މަޖިލީހަށް ހުށަހެޅުއްވުމާ ގުޅިގެންނެވެ. އެމަނިކުފާނު ޝާން އައްޔަން ކުރެއްވުމަށް މަޖިލީހަށް މައްސަލަ ހުށަހެޅުއްވީ 2022 އޭޕްރިލް 25 ވަނަ ދުވަހުއެވެ.
އާއިޝަތު ޝާން ޝާކިރަކީ ރާއްޖޭގެ ފުރަތަމަ އަންހެން ޕްރޮޓޮކޯލެވެ. އޭނާ މިވަގުތު ހުންނެވީ ފޮރިން މިނިސްޓްރީގެ ޗީފް އޮފް ޕްރޮޓޮކޯލްގެ މަގާމުގައެވެ. އެ މަގާމަށް ޝާން އައްޔަންކުރެެއްވީ 2020 ނޮވެމްބަރު 15ގައެވެ. ޝާން ވަނީ ބަންގްލަދޭޝްއަށް ކަނޑައަޅާފައި ހުންނަވާ ސަފީރުގެ މަގާމުވެސް އަދާކުރައްވާފައެވެ.
ޖަރުމަނުގެ ސަފީރުގެ މަގާމުގައި ކުރިން ހުންނެވި އަހުމަދު ލަތީފު މިހާރު ވަނީ ރާއްޖޭގެ ފޮރިން ސެކްރެޓަރީގެ މަގާމަށް އައްޔަންކުރައްވާފައެވެ.
