ދަރިން ބަލިތަކުން ރައްކާތެރިކުރަން މަސައްކަތްކުރާ ފަދައިން ނަރަކައިން ސަލާމަތްކުރުމަށްވެސް މަސައްކަތްކުރޭ
13 މެއި 2022 | ހުކުރު 08:18ދަރިން ތަރުބިއްޔަތުކުރުމުގައި ރަސޫލުންނާއި ނަބިއްޔުން އަމަލުކުރެއްވިގޮތުން މިސާލު ނަގަންޖެހޭ
ހުކުރު ނަމާދު
ދަރިން ބަލިތަކުން ރައްކާތެރިކުރަން މަސައްކަތްކުރާ ފަދައިން އެދަރިން ނަރަކައިން ސަލާމަތްކުރުމަށް މަސައްކަތްކުރުމަށް ހުކުރު ޚުތުބާގައި ނަސޭހަތްތެރިވެއްޖެއެވެ.
"ދަރިންގެ އަޤީދާ ރައްކާތެރި ކުރުމަށް ތަރުބިއްޔަތު ދިނުން" މި މައުޟޫއަށް ރާއްޖޭގެ އެކި ކަންކޮޅުތަކުގައި އިއްވި ހުކުރު ޚުތުބާގައި ވަނީ ދަރިންނަކީ ބޮޑުވެގެންވާ ނިއުމަތެއްކަން ފާހަގަކޮށްފައެވެ. އެކުދިންގެ ސަބަބުން ލޮލަށް ފިނިކަން ލިބި، ކުރިމަގު އުޖާލާވެ، ހަޔާތް ބާއްޖަވެރިވާތީއެވެ.
މައިންބަފައިން އެމީހުންގެ ދަރިން ތަފާތު ބަލިތަކުން ހިމާޔަތްކުރުމަށާއި، ދިފާއީ ބާރު ވަރުގަދަކުރުމަށް ވެކްސިން ޖެހުމާއި މިފަދަ އެތައް ކަމެއް ކުރާ ކަމަށެވެ. ދަރިން ދުނިޔަވީ ބަލިތަކުންނާއި، އާފާތްތަކުން ރައްކާތެރިކުރުމަށް މަސައްކަތްކުރާ ފަދައިން އެ ދަރިން ނަރަކައިން ސަލާމަތްކުރުމަށްވެސް މަސައްކަތްކުރަންޖެހޭކަމަށާއި، އެއީ އަޅަމެންނަށް އަމުރުކުރައްވާފައިވާ ކަމެއް ކަމަށް ޚުތުބާގައި ބުނެފައިވެއެވެ.
މިއަދު ބައެއް މައިންބަފައިން ދައްކާ ވާހަކައަކީ އެމީހުންގެ ދަރިން ކުއްލިއަކަށް ނަމާދާ ދުރުވެ، ﷲ ހަރާމްކުރައްވާފައިވާ ކަންކަމަށް އަރައިގަންނަމުންދާ ވާހަކަ ކަމަށް ޚުތުބާގައި ބުނެފައިވެއެވެ. މިފަދަ ކަންކަމަށް ކުދިން އަރައިގަންނަނީ އެކަންކަމުން އެ ކުދިން ހިމާޔަތްކުރުމަށް އަޅަންޖެހޭ ހަރުދަނާ ފިޔަވަޅުތައް ނާޅާތީކަމަށް ޚުތުބާގައި ބުނެފައިވެއެވެ.
ދަރިންނަށް ރަނގަޅު ތަރުބިއްޔަތެއް ދެވޭނީ އަަމަލީ ހެޔޮ ނަމޫނާއިން، ހަރުކަށިކަމާ ދުރުވެގެން ކަމުގައި ޚުތުބާގައި ބުނެފައިވެއެވެ. މިގޮތުން ލުޤްމާނުގެފާނު އެކަލޭގެފާނުގެ ދަރިކަލުންނަށް ނަސޭހަތްދެއްވިގޮތް ނަމޫނާއެއްގެ ގޮތުގައި ބެލުމަށް ޚުތުބާގައި ނަސޭހަތްތެރިވެފައިވެއެވެ.
މީގެ އިތުރުން އިބްރާހިމްގެފާނުވެސް އެކަލޭގެފާނުގެ ދަރިކަލުންނަށް ތަރުބިިއްޔަތު ދެއްވާފައިވަނީ އާލަމްތަކުގެ ވެރި ރަސްކަލާނގެއަށް ކިޔަމަންވުމަށް ކަމަށް ޚުތުބާގައި ބުނެފައިވެއެވެ. އަދި މުސީބާތުގެ ވަގުތުގައިވެސް އެކަލާނގެ އަމުރުފުޅާ އެއްކިބާ ނުވުމަށާއި، މައިންބަފައިންނަށް ކިޔަމަންވުމަށް ކަމަށެވެ. އެއީ އީމާންކަމުގެ ތަރުބިއްޔަތު ކަމުގައި ޚުތުބާގައި ބުނެފައިވެއެވެ. އަހަރުމެންގެ ތަރުބަވީ މަންހަޖުތައް މި ތަރުބިއްޔަތާ އެއްގޮތަށް ފަރުމާކުރަންޖެހިފައިވާކަމަށް ޚުތުބާގައި ވަނީ ބުނެފައެވެ.
